Sentyabrın 28-də  Bakı Slavyan Universitetində BSU ilə Türkiyənin Qazi Universiteti arasında yeni əməkdaşlıq müqaviləsinin imzalanması mərasimi keçirildi. Tədbiri giriş sözü ilə açan BSU-nun rektoru, professor  Kamal Abdullayev bildirdi ki, bu gün universitetin dünyanın bir çox tanınmış təhsil ocaqları  ilə sıx əlaqələri mövcuddur. BSU artıq Türkiyə Respublikasının Qafqaz Universiteti (Qars), Ankara Universiteti (Ankara), Akdeniz Universiteti (Antalya), İstanbul Kültür Universiteti (İstanbul), Qazi Universiteti (Ankara) və digər nüfuzlu təhsil və elm ocaqları ilə əməkdaşlıq edir. Bu gün Türkiyənin məşhur Qazi Universitetinin rektoru, professor Rıza Ayhan və digər qonaqların iştirakı ilə 2005-ci ildə iki universitet arasında bağlanmış müqavilənin  vaxtı başa çatdığından yeni əməkdaşlıq müqaviləsi imzalanacaq.

K.Abdullayev qeyd etdi ki, ötən illər ərzində  mövcud müqavilə iki    universitet arasında elm, təhsil, mədəniyyət sahəsində  daha yüksək əlaqələrin qurulması, tələbə-müəllim mübadiləsi, müştərək elmi  konfrans  və  seminarların təşkil olunması üçün əsas rolu oynamışdır.

Bu gün bağlanacaq müqavilədə elm və təhsil sahəsində əməkdaşlıqla bərabər, Bakı Slavyan Universitetinin professor- müəllim kollektivinin Qazi Universitetinin tərkibində fəaliyyət göstərən, dünya  standartlarına cavab verən, son texnologiyalarla təchiz edilmiş tibbi klinikada pulsuz müalicə alması da  nəzərdə tutulmuşdur.

Sonra  Qazi Universitetinin rektoru, professor Rıza Ayhan çıxış etdi. O, Azərbaycanda  olmağından və BSU ilə əməkdaşlıq etmələrindən çox  məmnun olduğunu bildirdi və iki universitet arasında bağlanan əməkdaşlıq müqaviləsinin əhəmiyyətindən  ətraflı danışdı.

Həmin gün iki universitet arasında yeni əməkdaşlıq müqaviləsi imzalandı və   qonaqlar BSU ilə yaxından tanış oldular . 

Şakir CƏFƏROV