Sentyabrın 28-də "British Council"in  Azərbaycandakı ofisinin direktoru  Paul Klementson və Proqramlar üzrə  direktoru Nigar Baimova  Azərbaycan Dillər Universitetində (ADU) oldular. 

Tədbirdə  "British Council" ilə əməkdaşlıqdan, universitetlərarası əlaqələrin qurulmasından danışıldı. ADU-nun Tədris işləri üzrə prorektoru, professor Natiq Yusifov və  Beynəlxalq əlaqələr üzrə prorektoru  Jalə Qəribova  ingilis dilinin  keyfiyyətinin artırılmasında "British Council" ilə əməkdaşlığın daha da gücləndirilməsinin  vacib  olduğunu bildirdilər.  İngilis dilinin metodikası kafedrasının müdiri Gülnar Hüseynzadə  isə dedi ki, "British Council" ilə əməkdaşlıq zəruridir:  "Biz tələbələrə ingilis dilini mükəmməl şəkildə öyrətmək istəyirik. Buna görə də "British Council"in bizə bu işdə köməklik göstərməsini istərdik".  Görüş zamanı müzakirə edilən məsələlərdən biri də kitabxana profilinin daha da genişləndirilməsi oldu.

"British Council"in direktoru  Paul Klementson  bir çox layihələrin keçirilməsinin məqsədəuyğun olduğunu bildirdi.

Tədbirin sonunda iştirakçılar ADU-nun İnformasiya Resurs Kompleksi ilə tanış oldular. İRK-nın direktoru Şəhla  Xudiyeva qonaqlara kompleks və orada olan mərkəzlər haqqında məlumat verdi. 

Xatırladaq ki, ötən il oktyabrın 23-də Azərbaycan Dillər Universiteti ilə "British Council" arasında qarşılıqlı əməkdaşlıq haqqında müqavilə imzalanmışdı. Müqaviləyə əsasən, "British Council" ADU-ya kitab fondu hədiyyə etmişdir. 

Zeynəb KAZIMOVA