Finala vəsiqə  

Aysun Bədəlova Ağcabədi şəhər 2 nömrəli orta məktəbin IV sinfində oxuyur. Şahmatı çox sevdiyi üçün 2007-ci ildən rayonun Uşaq-Gənclər Şahmat Məktəbində məşğul olur. Burada keçirilən təlim məşqlərində həmişə fəallıq göstərir. Elə bunun nəticəsidir ki, Aysun 2009-cu il 7-17 dekabr tarixlərində Astara şəhərində keçirilmiş Dünya Azərbaycanlılarının Həmrəylik Gününə həsr olunmuş Açıq Respublika Şahmat turnirində III yerə, 2010-cu il 1-10 fevral tarixlərində Bakı şəhərində keçirilmiş 2 Fevral - Gənclər Gününə həsr olunmuş şahmat turnirində II yerə, 2010-cu il 9-18 mart tarixlərində isə Saatlı rayonunda keçirilmiş uşaq-gənclər şahmat məktəbləri komandalarının respublika birinciliyinin zona yarışında II yeri tutaraq finala vəsiqə qazanıb. 

Respublika müsabiqəsinin qalibi 

Əşrəf Paşayev Ağcabədi şəhər 3 nömrəli məktəb-liseydə yaxşı qiymətlərlə oxumaqla bərabər, rayon texniki yaradıcılıq mərkəzinin dərnək üzvüdür.

"Əyləncəli fizika" dərnəyinin rəhbəri Fazil Alıyev onun gələcəyinə böyük ümidlər bəsləyir. Təsadüfi deyildir ki, Əşrəf dəfələrlə bu ümidləri doğruldaraq rayon, zona, respublika müsabiqələrində I yeri tutmuşdur. Onun hazırladığı məişət texnikası modeli 2010-cu ilin aprelində Təhsil Nazirliyinin səmərələşdirici və ixtiraçılıq diplomuna layiq görülüb.

Hazırda Əşrəf yeni modellər üzərində işləyir. 

Elnay QALİBOĞLU,
Cavid ƏMRAHOV,
Bakı Avrasiya Universitetinin IV kurs tələbələri