Sentyabrın 15-də Azərbaycan Memarlıq və İnşaat Universitetində yeni tədris ilinin başlanması - "Bilik günü" münasibətilə təntənəli yığıncaq keçirildi.

Mərasim başlanmazdan əvvəl universitet rektorluğunun, ictimai təşkilatlarının, professor-müəllim heyətinin nümayəndələri, tələbə fəalları xalqımızın ümummilli lideri Heydər Əliyevin universitetin həyətində ucaldılmış abidəsi önünə gələrək, əziz xatirəsini ehtiramla yad etdilər və büstünün önünə tər güllər qoydular.

Tədbiri giriş sözü ilə universitetin rektoru, professor Gülçöhrə Məmmədova açaraq əlamətdar gün münasibətilə müəllimləri, tələbələri və valideynləri təbrik etdi. Azərbaycan Respublikasının Prezidenti cənab İlham Əliyevin elm və təhsilə göstərdiyi diqqət və qayğıdan, bu sahədə imzaladığı fərman və sərəncamlardan danışan rektor qeyd etdi ki, dövlət başçısının elm və təhsili müstəqil dövlətimizin davamlı inkişaf strategiyasının ən vacib istiqamətlərindən biri hesab etməsi bu sahənin müasir standartlara uyğun inkişafı üçün gözəl şərait yaratmışdır.

Rektor bildirdi ki, bu il 24 ixtisas üzrə 1164 nəfər gənc universitetimizin tələbəsi adına layiq görülmüşdür. Onların arasında yüksək bal toplayanlar da çoxdur.

Rektor tələbə gənclərə yaxşı oxumağı, elmin sirlərinə dərindən yiyələnməyi, ictimai işlərdə fəal olmağı tövsiyə etdi.

Sonra universitetin inşaat fakültəsinin dekanı Hikmət Məmmədov çıxış edərək bildirdi ki, Azərbaycan Memarlıq və İnşaat Universiteti bu gün respublikamızda memarlıq və inşaat istiqamətləri üzrə milli kadrların hazırlanmasında müstəsna xidmətləri olan elm-təhsil ocağıdır. İndi ölkəmizdə aparılan geniş tikinti, quruculuq və abadlıq işlərində bizim universitetin hazırladıqları kadrlar yaxından iştirak edirlər.

Tədbirdə qəbul imtahanlarında yüksək bal toplayaraq, Azərbaycan Memarlıq və İnşaat Universitetinin tələbəsi adına layiq görülmüş bir qrup gəncə tələbə bileti və qiymət kitabçaları təqdim olundu. 

Akif HACIYEV,
Azərbaycan Memarlıq və
İnşaat Universitetinin "İnşaatçı
kadrları" qəzetinin redaktoru