Azərbaycan Dillər Universitetində də "Bilik günü" qeyd edildi. ADU-nun İctimaiyyətlə əlaqələr və mətbuat xidmətinin rəhbəri Zeynəb Kazımovadan aldığımız məlumata görə, universitetin akt zalında ali məktəbə bu il daxil olan tələbələrlə görüş Azərbaycan Respublikasının Dövlət himni ilə başladı. Sonra ADU-nun rektoru, millət vəkili, professor Səməd Seyidov professor-müəllim heyətini və tələbə adını qazananları yeni dərs ilinin başlanması münasibətilə təbrik etdi. Yeni tədris ilində rəhbərlik etdiyi ali məktəbə 1000 nəfərə yaxın tələbənin daxil olduğunu bildirən rektor onları savadlı, vətənpərvər, eyni zamanda iradəli olmağa çağırdı.

ADU haqqında, yeni tətbiq olunan Boloniya prosesi, fakültələr, real və virtual kitabxana barədə  tələbələrə məlumat verən rektor S.Seyidov universitetdə fəaliyyət göstərən müxtəlif mərkəzlərdən tələbələrin səmərəli istifadə etməsini arzuladığını dilə gətirdi, onları hər zaman təşəbbüs göstərməyə çağırdı.

Tədbirdə rektor 654 balla tərcümə fakültəsinə daxil olan Minayə Cəfərovaya noutbuk hədiyyə etdi. Digər yüksək balla universitetə daxil olan tələbələrə də hədiyyələr, tələbə biletləri və qiymət kitabçaları təqdim edildi. Valideynlər adından danışan Hənifə Qayınbəyova övladının məhz bu ali məktəbə daxil olduğuna görə sevindiyini dedi.

Görüşün sonunda Azərbaycan Dillər Universitetinin himni səsləndi və ali təhsil ocağının fəaliyyətini özündə əks etdirən slayd nümayiş etdirildi.

Ş.CƏFƏROV