Həyatda və təbiətdə olan hər şey diqqət, nəvaziş, qayğı və kömək istəyir, tələb edir. Bu yöndən yanaşılanda "Allahın şah əsəri olan təbiət"ə (Z.Yaqub) daha çox qayğı gərəkdir. Təbiət maddi nemətlər mənbəyi, zövq və gözəllik qaynağıdır. Dünya iqlim tipinin böyük bir qismini özündə birləşdirən Azərbaycan təbiətinin, flora və faunamızın qorunub saxlanılmasına dövlət və hökumət xüsusi əhəmiyyət verirlər. Ölkə Prezidenti İlham Əliyevin sərəncamı ilə 2010-cu ilin "Ekologiya ili" elan olunması bu baxımdan böyük əhəmiyyət daşıyır. Hələ ötən əsrin ortalarından Azərbaycanın müxtəlif bölgələrində yaradılmış qoruq və yasaqlıqlar milli təbiətimizi gələcək nəsillər üçün yaşatmaq məqsədilə təşkil olunmuşdu. Həmin tarixi-coğrafi məkanlar haqqında nə bilirik?

İbtidai sinif şagirdləri və məktəbəqədər azyaşlı uşaqlar üçün "Göyərçin" jurnalı bu suala cavab verən dəyərli bir kitabça nəşr etmişdir. Rəngli fotolarla çap olunmuş topluda Göygöl, Pirqulu, Qobustan, Qaragöl, Ağgöl, Türkançay, Hirkan, Zaqatala, Qarayazı, Qızılağac, İsmayıllı və İlisu qoruqları haqqında elmi ədəbiyyatdan istifadə etməklə hazırlanmış zəngin informasiyalı mətnlər, qoruqlardan görüntülər, heyvan və bitki nümunələrinin şəkilləri əksini tapmışdır.

Qusar, Şəki, Abşeron, Ordubad, Şəmkir, Korçay, İsmayıllı, Qızılağac, Bəndovan, Laçın və Kiçik Qızılağac yasaqlıqlarında nələr var? Bu suala sonrakı səhifələrdə yığcam məlumatlarla cavab verilir.

"Azərbaycan" nəşriyyatının çapdan buraxdığı kitabça ekologiya, təbiətimizin zənginlikləri barədə bilik mənbəyi olacaq.

Ş.ELNUR