Azərbaycan Dillər Universitetinin (ADU) "Azərbaycanda şifahi və yazılı tərcümənin tədrisi sahəsində islahatlar" layihəsi Avropa İttifaqının TEMPUS IV çağırış üzrə elan etdiyi müsabiqədə qalib gəlmişdir.

ADU-nun mətbuat xidmətindən AzərTAc-a bildirmişlər ki, bu layihənin seçilməsi Azərbaycan təhsil sisteminin böyük nailiyyəti kimi qeyd olunmalıdır. Bu, Azərbaycandan olan universitetin Avropa İttifaqı layihəsində ilk idarəçiliyi və Avropa universitetlərinin ölkəmiz tərəfindən ilk əlaqələndiricisi olacaqdır.

Azərbaycanın ali məktəblərinin bir çoxu əvvəlki dövrlərdə TEMPUS proqramında iştirak etmişdir. ADU 2005-2006-cı illərdə TEMPUS layihələrinin iştirakçısı olmuşdur. Bu layihədə isə Azərbaycan Dillər Universiteti sadəcə tərəfdaş-iştirakçı deyil, layihənin rəhbəri (əlaqələndiricisi) kimi çıxış edəcəkdir. Bu, Azərbaycanın təhsil idarəçiliyində zəngin beynəlxalq təcrübə əldə edilməsinə, islahatların daha da inkişaf etdirilməsinə və ölkəmizin təhsil sisteminin dünya təhsil sisteminə inteqrasiyasına təkan verəcəkdir.

Layihə 3 il müddətinə nəzərdə tutulmuşdur. Bu layihə bütövlükdə Azərbaycanda tərcüməçilik sahəsinin inkişafını məqsəd kimi qarşısına qoyduğu üçün buraya ölkəmizin təhsil sisteminin coğrafi baxımından bütün strateji bölgələri cəlb edilmişdir.

Təhsil Nazirliyi bu layihənin iştirakçı tərəflərindən biridir.

Layihədə ADU və Təhsil Nazirliyindən əlavə, Naxçıvan, Lənkəran, Gəncə Dövlət universitetləri, Bakı Pedaqoji Kadrların İxtisasartırma və Yenidənhazırlanma İnstitutu da iştirak edirlər.

Avropa tərəfindən isə layihəyə Fransanın Strasburq, Almaniyanın Leypsiq universitetləri, İtaliyanın Milan Tərcüməçilik İnstitutu və Böyük Britaniyanın Esseks Universiteti cəlb edilmişdir.

Bütövlükdə layihədən 230-dan artıq tələbə, 350-dək professor-müəllim heyəti və 30-dək inzibati heyət yararlana biləcəklər.

ADU-nun təqdim etdiyi bu layihə TEMPUS proqramının Cənubi Qafqaz regionu üçün nəzərdə tutduğu məbləğin 70 faizdən çoxunu təşkil edir.

AzərTAc