Xəbər verdiyimiz kimi, ölkə Prezidenti cənab İlham Əliyevin imzaladığı müvafiq sərəncama uyğun olaraq Azərbaycanın Milli Qəhrəmanı Mübariz İbrahimovun adının əbədiləşdirilməsi ilə bağlı bir sıra tədbirlər həyata keçirilib.  Bu  yaxınlarda  Biləsuvar şəhərində xüsusi istedada malik uşaqlar üçün inşa olunmuş lisey-məktəb kompleksinə M.İbrahimovun adı verilib.

İndi rayon mərkəzinə yaraşıq verən, müasir arxitektura üslubunda yeni inşa olunmuş bu kompleksdə xüsusi istedada malik 107 şagird təhsil alır ki, onların da bir hissəsi ətraf rayonlardan olan uşaqlardır. Liseydə yeddinci sinifdən yuxarı test üsulu ilə seçilərək qəbul olunmuş şagirdlərə 33 müəllim dərs deyir. Həmin müəllimlərdən  20  nəfəri  Biləsuvar  rayonunun  ümumtəhsil  məktəblərindən  seçilərək bu liseydə dərs demək üçün cəlb olunmuşdur. Onlardan biri də Milli  Qəhrəman  Mübariz İbrahimovun vaxtı ilə təhsil aldığı Əliabad kənd orta məktəbinin fizika müəllimi S. İsayevdir.

Lisey-məktəbin direktoru Anar Məmmədov bildirmişdir ki, növbəti illərdə  burada  təhsil alacaq şagirdlərin sayını 300-ə çatdırmaq nəzərdə tutulur.

Bizim isə ən böyük arzumuz budur ki, Milli Qəhrəman Mübariz İbrahimovun adını daşıyan liseydə təhsil alan şagirdlərin xüsusi istedadlarına Mübarizin Vətən, torpaq sevgisi, döyüş şücaəti də qatılsın və onların hər biri sabahımızın mübarizləri olsunlar.

ƏDALƏT