Məhəmməd Əleyhissəlamın bu məşhur kəlamı xarici ölkələrə gedib mükəmməl elm və təhsil almaq istəyən hər bir kəs üçün ülvi bir tövsiyədir. Eləcə də "Təhsil millətin gələcəyidir" - söyləyən ümummilli lider Heydər Əliyev ölkəmizə rəhbərlik etdiyi bütün zamanlarda savadlı kadrların hazırlanıb yetişməsini, gənclərin xaricdə təhsil alıb Azərbaycana lazım olan peşəkar kadr kimi formalaşmalarını diqqət mərkəzində saxlamış, onlara həmişə qayğı göstərmişdir.

Təhsilimizin bugünkü inkişafı, tərəqqisi, qloballaşan dünyada özünəməxsus yer tutması buna əyanı sübutdur.

Ölkə Prezidenti cənab İlham Əliyevin imzaladığı sərəncamla "2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı" təsdiq edilmişdir. Qürur hissilə deyə bilərik ki, bu gün azərbaycanlı tələbələr dünyanın ən inkişaf etmiş ölkələrinin nüfuzlu ali məktəblərində təhsil alırlar. Belə tələbələrdən biri də 1988-ci ildə Bakı şəhərində anadan olmuş Orxan Salmanlıdır. O, Bakıdakı 96 nömrəli orta məktəbdə beşinci sinfə kimi oxuduqdan sonra, 1998-ci ildə Türkiyə Diyanət Vəqfi Bakı Türk Liseyində təhsilini davam etdirmişdir. 2005-ci ildə liseyi əla qiymətlərlə bitirən  Orxan sənədlərini ikinci qrupa verərək qəbul imtahanından 697 bal toplamışdır. Qeyd edək ki, bu imtahanlar test üsulu ilə keçirilməyə başlanandan bəri ən yüksək bal idi. Orxan həmin balla Azərbaycan Respublikasının Prezidenti yanında Dövlət İdarəçilik Akademiyasında oxumaq şansı qazansa da, onun arzusu  xaricdə təhsil almaq olmuşdu. Odur ki, o, Türkiyə Orta Doğu Texniki Universitetinə qəbul olur. Həmin günləri xatırlayan Orxan bildirdi ki, "Türkiyəyə təhsil almağa yola düşəndə Bakı Əyləncə Mərkəzində tələbələrlə görüşən təhsil nazir Misir Mərdanov bizə xeyir-dua verdi, uğurlar arzuladı. Bu yolu uğurla başa vuracağıma çox əmin idim. Elə də oldu, bu il təhsilimi fərqlənmə diplomu ilə başa çatdırdım. Bu münasibətlə universitetdə iyun  ayında keçirilən yığıncaqda bütün tələbələr adından çıxış üçün mənə söz veriləndə böyük qürur hissi keçirdim. Onu da deyim kı, həmişə təhsilimizə öz diqqət və qayğısını əsirgəməyən Heydər Əliyev Fondu bu yığıncaqda, fərqlənən məzun olduğum üçün, məni Fondun döş nişanı ilə təltif etdi. Bütün bu qayğıya görə ölkə Prezidenti İlham Əliyevə, təhsil naziri Misir Mərdanova, Azərbaycanın Türkiyədəki səfirliyinin təhsil atteşesi Nəcibə Nəsibovaya öz dərin  minnətdarlığımı bildirirəm"...

Sonda onu da qeyd edək ki, bu il təhsilini başa vuran Orxan Salmanlı sənədlərini magistraturaya verərək dünyanın ən nüfuzlu ali məktəblərinə London İqtisadiyyat Universiteti (LSE), Paris Biznes Universiteti (HEC), ABŞ-ın Duke Universiteti, İngiltərənin Varvik Universitetinə qəbul olmuşdur.

Orxan Avropanın ən yaxşı iqtisad universiteti kimi tanınan London İqtisadiyyat Universitetində oxumağı planlaşdırıb. Buranı bitirdikdən sonra isə arzusu doktoranturaya qəbul olmaqdır. O, elmin ən yüksək zirvəsini fəth etmək istəyi ilə yaşayır. Orxana bu çətin və şərəfli yolda uğurlar diləyirik.

Ədalət DAŞDƏMİRLİ