Yaponiyanın Gürcüstandakı səfirliyinin maliyyə dəstəyi ilə Gürcüstanın Kvemo Kartli-Borçalı bölgəsinin Marneuli rayonundakı Axıllələ baza məktəbinin binası bərpa olunmuşdur. Bərpa işlərinə və məktəbin yeni avadanlıqla təchiz olunmasına 74 min dollardan artıq vəsait xərclənmişdir.

Avqustun 12-də Axıllələ kəndində məktəbin yenidən qurulması işlərinin başa çatması münasibətilə tədbir keçirilmişdir. Tədbiri Kvemo Kartli-Borçalı bölgəsinin qubernatoru David Kirkitadze açaraq Yaponiyanın Gürcüstandakı səfirliyinin milli azlıqların probleminin həlli məsələsində xüsusi xidmətlərini vurğulamış və xeyirxah işlərə görə təşəkkürünü bildirmişdir.

Reinteqrasiya məsələləri üzrə Gürcüstanın dövlət naziri Temur Yakobaşvili demişdir ki, səfirlik ölkəmizin milli azlıqlar yaşayan bölgələrində müxtəlif layihələri uğurla həyata keçirir. Bir il bundan əvvəl səfir yeni layihə həyata keçirmək niyyətini açıqlamış və biz Marneuli rayonundakı Axıllələ kənd məktəbi binasının yararsız vəziyyətdə olduğundan burada bərpa işləri aparmağı təklif etmişdik.

Nazir vurğulamışdır ki, səfirlik təklifimizi məmnuniyyətlə qəbul etmiş və bir ildə məktəb binasının əsaslı surətdə yenidən qurulması işlərini başa çatdırmışdır.

Yaponiyanın Gürcüstandakı səfiri Masaiosi Qamaxaro axıllələlilər üçün belə gözəl şəraitin yaradılmasından məmnunluq duyduqlarını və gələcəkdə bu cür layihələri davam etdirəcəklərini söyləmişdir. Səfir məktəbin müəllim və şagirdlərinə təhsildə uğurlar diləmişdir.

Məktəbin direktoru Məhərrəm Xəlilov ölkə rəhbərliyinə, Yaponiyanın Gürcüstandakı səfirinə və səfirliyin bütün əməkdaşlarına bu təhsil ocağının 115 şagirdi, 17 müəllimi adından minnətdarlığını bildirmişdir. O, tədbir iştirakçılarını əmin etmişdir ki, artıq hər cür şəraitə malik olan məktəbin pedaqoji kollektivi şagirdlərin biliklərin əsaslarına yiyələnmələri üçün səy və bacarığını əsirgəməyəcəkdir.

Mərasimdə qeyd olunmuşdur ki, bu, Yaponiya səfirliyinin Marneulidə həyata keçirdiyi ilk layihə deyildir. Ötən il rayonun Qızılhacılı kəndində səfirliyin maliyyə dəstəyi ilə müasir ambulatoriya istifadəyə verilmiş, kənd təsərrüfatının inkişafı yönümündə müxtəlif layihələr həyata keçirilmişdir.