dvv international Almaniya Xalq Universitetləri Birliyinin Beynəlxalq Əməkdaşlıq İnstitutu olaraq 2002-ci ildən Azərbaycanda yerli təhsil sisteminin təkmilləşdirilməsi və Avropa təhsil sisteminə inteqrasiyası məqsədi ilə yaşlıların qeyri-formal təhsili sahəsində layihələr, tədqiqatlar, sorğular və müxtəlif maarifləndirici tədbirlər həyata keçirir. Bunlara sosial, iqtisadi, vətəndaş təhsili və mədəni sahələrdə fəaliyyəti aid etmək olar.

2009-cu ilin dekabr ayında dvv international Avropa Komissiyasının "Qeyri-Hökumət və Yerli Özünüidarəetmə Qurumları İnkişafda" proqramı çərçivəsində "Yaşlıların təhsili mərkəzləri yoxsulluğun azaldılması, təhsil və sosial həmrəylik üçün imkan kimi (COPE)"  layihəsini başlayıb. 30 aylıq müddəti əhatə edəcək layihə Azərbaycanın cənub rayonlarında (Masallı, Cəlilabad, Lənkəran, Yardımlı, Lerik və Astara) həyata keçirilir. 2010-cu il mart ayının 10-da Bakıda, aprel ayının 9-da isə Masallıda layihənin təqdimatı olmuşdur.

Layihənin əsas vəzifələri təhsil xidmətləri təklif etmək üçün Yaşlıların təhsili mərkəzləri (YTM) şəbəkəsini yaratmaq, təhsil və məşğulluq üçün yeni imkanlar yaratmaqla yoxsulluğun azaldılmasını dəstəkləmək,  etnik azlıqların sosial inteqrasiyasını təmin etmək və yaşlıların təhsilinin cəmiyyətin inkişafında əhəmiyyətli rolunu vurğulamaqdır. Layihənin məqsədi səmərəli təhsil sistemi yaratmaq və onun davamlılığını təmin etmək üçün tərəfdaşlıq qurmaq və YTM şəbəkəsi, yerli özünüidarəetmə və qeyri-hökumət təşkilatlarının heyətlərinin bacarıqlarını artırmaqdır. Bazar yönümlü təhsil kursları vasitəsi ilə insan resurslarının bacarıqları və məşğulluq səviyyəsi artacaq və yaşlıların təhsili Azərbaycanın cənub hissəsində yoxsulluğun azaldılması üçün vasitə kimi təbliğ olunacaq.  

Layihə çərçivəsində yaşlıların təhsili mərkəzlərinin işi ilə yaxından tanış olmaq məqsədilə 9 nəfərdən ibarət qrup 17-25 iyul 2010-cu il tarixlərində Almaniyanın Hanover şəhərində təcrübə toplama səfərində olmuşdur. Səfərdə Almaniya Xalq Universitetləri Birliyinin Beynəlxalq Əməkdaşlıq İnstitutunun Azərbaycan Respublikasındakı nümayəndəliyi, Yaşlıların Təhsili Assosiasiyası, Azərbaycan Müəllimlər İnstitutu, Aqroməsləhət təşkilatının Masallı Regional Mərkəzi, GDG Profeşnlz şirkəti, Yayımların Monitorinq Mərkəzi, Azərbaycan Diplomatiya Akademiyası və Masallı İctimai Maarifləndirmə Mərkəzinin nümayəndələri iştirak etmişlər.

Bundan başqa layihəyə 30 "dəyirmi masa" və 7 forumun həyata keçirilməsi, təlimçilər üçün təlim, yeni tədris vəsaitlərinin hazırlanması, yerli icmalar üçün təlim kursları və KİV ilə əlaqələrin qurulması kimi fəaliyyət növləri də daxildir. Eyni zamanda 1000-dən çox yerli sakin kənd təsərrüfatı, turizm, "Azərbaycan dili işgüzar ünsiyyət üçün", biznes sahibkarlığı və idarəetmənin əsasları və vətəndaş təhsili kurslarına cəlb olunacaq. 35 layihə işçisi  və yerli təlimçi layihənin həyata keçirilməsini və nəzarətini icra edəcək.

Gələcəkdə ölkənin digər bölgələrində də ictimai maarifləndirmə mərkəzlərinin fəaliyyətinin qurulması və əhaliyə müxtəlif qeyri-formal təhsil imkanlarının təklif olunması nəzərdə tutulub. 

İsgəndər SADİQ,
Almaniya Xalq Universitetləri Birliyi
Beynəlxalq Əməkdaşlıq İnstitutunun Azərbaycan Respublikasındakı
nümayəndəliyinin milli koordinatoru