Bu günlərdə Buxarestdəki Avropa Nikolae Titulesku Fondunda Rumıniyada təhsil almış azərbaycanlı tədqiqatçıların elmi işlərindən ibarət kitabların təqdimat mərasimi keçirilib. Mərasimdə çıxış edən Avropa Nikolae Titulesku Fondunun icraçı direktoru, professor Corce Potra qeyd edib ki, 3 gənc azərbaycanlı müəllifin rumın dilində elmi iş müdafiə etməsi və bu işlərin nəşri çox böyük əhəmiyyətə malikdir. Rumıniyanın tanınmış ali təhsil ocaqlarında doktorluq elmi dərəcəsinə layiq görülmələri münasibətilə gənc tədqiqatçıları təbrik edən Babeş-Bolyai Universiteti Türkologiya və Mərkəzi Asiya Araşdırmalar İnstitutunun direktoru, professor Təhsin Cəmil Avropa İttifaqının üzvü olan Rumıniyanın Qafqaz və Orta Asiya regionu, xüsusilə Azərbaycanla əlaqələrin inkişafına  xüsusi diqqət yetirməsinin vacib olduğunu vurğulayıb. Rumıniya İqtisadi Elmlər Akademiyasının professoru Floriana Bran öz çıxışında Azərbaycanın neft və qaz ehtiyatlarının bütün Avropanın enerji təhlükəsizliyində oynadığı mühüm roldan bəhs edib. Buxarest Yazıçılar Assosiasiyasının sədri Horia Qıbea, Spiru Haret Universitetinin əməkdaşı Lyudmila Rotaru, nüfuzlu "Geopolitika" jurnalının redaktoru Vasili Similyanu və başqaları tədbirdəki çıxışlarında nəşrlərin ayrı-ayrı önəmli xüsusiyyətləri haqqında danışmışlar.

Mərasimdə Azərbaycanın Rumıniyadakı səfirliyinin əməkdaşları, tanınmış din, ədəbiyyat və incəsənət xadimləri, Buxarest şəhərində akkreditə olunan xarici ölkələrin diplomatları, Rumıniyada yaşayan həmvətənlərimiz və bu ölkədə təhsil alan azərbaycanlı tələbələr iştirak etmişlər.  

Hicran ƏKBƏROVA