Bakının 8 nömrəli orta məktəbinin müəllimi İlhamə Əkbərova Microsoft korporasiyasının Berlində keçirdiyi Avropa İnnovativ Müəllimlər Müsabiqəsinin yekunlarına görə, ilk "iyirmiliyə" daxil olub. İ.Əkbərova Azərbaycanı "Məzmunda innovasiyalar"  nominasiyası üzrə "Çoxüzlülər bizim ətrafımızdadır" layihəsi ilə təmsil edirdi. Müsabiqədə 41 ölkədən 80-dən çox müəllim iştirak edirdi.

Avropanın ən yaxşı 20 innovativ müəllimi sırasında İlhamə Əkbərova cari ilin oktyabr ayında Keyptaun şəhərində (CAR) keçiriləcək Ümumdünya İnnovativ Müəllimlər Müsabiqəsində iştirak etmək hüququnu qazanıb.

İlhamə Əkbərova ölkəmizi Berlində Təhsil Nazirliyi və "Microsoft Azərbaycan" şirkəti tərəfindən həyata keçirilən, "MƏDƏD", "ULTRA", "İntel", "HP" tərəfindən dəstəklənən Azərbaycan üzrə İnnovativ müəllimlər müsabiqəsinin qalibi kimi təmsil edirdi. Müsabiqə "2008-2012-ci illərdə Azərbaycan Respublikasında təhsil sisteminin informasiyalaşdırılması üzrə Dövlət Proqramı" çərçivəsində ümumtəhsil məktəb müəllimlərinin motivasiya sisteminin formalaşmasına dəstək məqsədi də daşıyır.

Müsabiqə innovasiya yanaşmasının və informasiya texnologiyalarının yardımı ilə məktəbin tədris  proqramını daha səmərəli şəkildə həyata keçirməyə imkan verən ən yaxşı təhsil layihələrinin müəyyən edilməsinə istiqamətlənmişdi.