Avropanın ən böyük şəhərlərindən biri olan Parisdə fəaliyyət göstərən Şərq Dilləri və Şivilizasiyaları İnstitutunda (İNALKO) on il bundan əvvəl Azərbaycan dilinin tədrisinə başlanmışdır.

Bu günlərdə ölkəmizin Fransadakı səfiri Elçin Əmirbəyov Azərbaycan dilinin tədrisinin vəziyyətini öyrənmək məqsədilə İNALKO-da olmuş və təhsil ocağının rektoru Jak Löqranla görüşmüşdür.

İlk tanışlıq xarakteri daşıyan görüşdə  institutla əməkdaşlığın perspektivləri barədə  geniş fikir mübadiləsi aparılıb. Cənab Jak  Löqran ölkəmizlə rəhbərlik etdiyi təhsil ocağı  arasında yaradılmış əlaqələrə görə çox  böyük məmnunluq hissi keçirdiyini qeyd  edib. Azərbaycanda səfərdə olduğunu,  qədim tarixə və zəngin mədəniyyətə malik ölkə  ilə tanışlığın onda xüsusi təəssürat oyatdığını vurğulayıb.

Görüş zamanı Şərq Dilləri və Sivilizasiyaları İnstitutunda Azərbaycanın birinci xanımı, Heydər Əliyev Fondunun prezidenti, YUNESKO və İSESKO-nun xoşməramlı səfiri Mehriban xanım Əliyevanın iştirakı ilə açılmış Azərbaycan dili fakültəsinin fəaliyyəti müzakirə olunub. Qeyd edilib ki, bizim əsas məqsədimiz Azərbaycan dili tədrisinin daha da təkmilləşdirilməsi və gücləndirilməsidir. Tədris zamanı yalnız dil, yəni linqvistik aspektlərin öyrədilməsi ilə kifayətlənməməli, ölkəmizlə maraqlanan tələbələrdə, eyni zamanda  Azərbaycan tarixi və mədəniyyəti haqqında geniş təsəvvür yaradılmalıdır.

Bu məqsədlə tədris proqramının yenidən nəzərdən keçirilməsi ilə bağlı təklif irəli sürülüb. 

Hicran ƏKBƏROVA