Müəllim cəmiyyəti işıqlandıran bir günəşdir. Bu günəş öz şəfəqləri ilə daim insanların yoluna nur saçır. Belə müəllimlərdən biri də Bakıdakı 134 nömrəli orta məktəbin riyaziyyat müəllimi Aidə Əliyevadır. O, 1955-ci ildə Dərbənd şəhərində anadan olmuş, 1967-ci ildə isə ailəsi ilə birlikdə Bakı şəhərinə köçmüşdür.1976-cı ildə APİ-nin riyaziyyat fakültəsini bitirərək pedaqoji fəaliyyətə başlamışdır.

Aidə müəllim sadəliyi,səmimiliyi və tələbkarlıgı ilə seçilən, peşəsinin vurğunu olan bir müəllimdir. O öz nüfuzunun keşiyində durmağı, bunun üçün özünə daim nəzarət etməyi, şagirdlərin və valideynlərin gözü ilə özünə kənardan baxmağı bacarır. Elə bu keyfiyyətləri özündə cəmləşdirməyi onun əsl müəllim olduğunu sübut edir.

A.Əliyeva gənc yaşlarından bu müqəddəs peşəyə bağlanmış,qəlbi müəllim olmaq arzusu ilə döyünmüşdü. Məhz bu istək, arzu onu məktəbə gətirmiş və müəllim peşəsinə yiyələnməsinə stimul vermişdi.Riyaziyyat fənnini seçməsi isə  təsadüfi deyildi. O bu fənni çox sevir və düşünür ki, riyaziyyat dəqiq fənn olaraq  bütün elmlərin açarıdır.

Aidə müəllim həmişə öz üzərində işləyərək elmin sirlərini daha da mükəmməl öyrənməyə,bilik və bacarığını artırmaga çalışır.Bu çalışqanlıq və fədakarlıq onu özü də bilmədən zirvələrə ucaldır. A.Əliyeva 1996-cı ildə "İlin ən yaxşı müəllımı" müsabiqəsinin qalibi olmuşdur.

Şagirdlərini öz övladı kimi sevən və onların şəxsiyyət kimi formalaşmasında xüsusi rol oynayan Aidə müəllim vaxtaşırı uşaqlarla gəzintiyə çıxır, dünyagörüşlərinin genişləndirilməsinə çalışır.

Aidə müəllimin dediklərindən:

- Müəllim həmişə öz adını,şərəfini hər şeydən üstün tutmalıdır. Mənə elə gəlir ki, müəllimin ədalətli və obyektiv olması əsas şərtlərdəndir. Müəllim  hərtərəfli intellektual inkişafa malik olmalı, xüsusən öz ixtisası sahəsində dərin biliklərə yiyələnməlidir. Mən də bütün müəllimlər kimi həmişə çalışıram kı, tədris materiallarını şagirdlərə çatdıram. Bu, mənim üzərimə düşən müqəddəs vəzifə borcudur. Daim bu vəzifənin öhdəsindən gəlməyə, onu yerinə yetirməyə çalışıram.Mənim həyatda ən böyük arzum müəllim olmaq idi. Bu arzuma çatmışam və buna görə öz müəllimlərimə borcluyam. İndi mən də bir müəllim kimi çalışıram ki, şagirdlərim  öz arzularına çataraq, istədikləri peşəyə yiyələnsinlər. Bunun üçün əlimdən gələni əsirgəmirəm. Biz müəllimlər həmişə onları gələcəyə inamla baxmağa,zirvələri fəth etməyə ruhlandırmalıyıq. Çalışmalıyıq ki, onlarda olan potensialı ortaya çıxarıb səmərəli istifadə edək, respublikamız və xalqımız bundan bəhrələnsin.

Şagirdlərimdən çox razıyam.Onlar heç vaxt mənim əməyimi itirməyiblər. Ən zəif şagirdim belə, az da olsa, riyaziyyatın sirlərindən xəbərdardılar.

Hazırda həm respublikamızın, həm də Avropanın bir çox ali təhsil müəssisələrində oxuyan şagirdlərim var.Arzu edirəm ki, onlar təhsillərini uğurla başa vuraraq respublıkamızın quruculuq işlərində yaxından iştirak etsinlər. Dövlətimizin bayrağını daim uca tutaraq ölkə Prezidenti cənab İlham Əliyevin ətrafında birləşsinlər.Möhtərəm Prezidentimizin həyata keçirdiyi siyasi,iqtisadi siyasətdə ona dəstək olsunlar.Mən buna inanıram və şagirdlərimlə fəxr edirəm.

Bəli, biz də şagirdlərinin  könüllərində özünə yer qazanan Aidə müəllimə  müqəddəs işində uğurlar diləyirik. 

Niyazi RƏHİMOV