18 nömrəli Bakı Peşə Liseyinin Pedaqoji Şurasında qəbul edilmiş qərara, eləcə də illik fəaliyyət planında nəzərdə tutulmuş müvafiq müddəaya uyğun olaraq tədris müəssisəsində təhsilalanların ictimai təşkilatı - "Tələbə Parlamenti" yaradılmışdır. Bu zaman təhsil qanunvericiliyi, ictimai təşkilatlar barədə mövcud reqlamentləşdirici sənədlər və Təhsil Nazirliyinin aidiyyəti təlimatları əsas götürülmüş, əvvəlcədən parlamentin müvəqqəti əsasnamə layihəsi hazırlanmışdır. Bütün qruplarda layihənin ətraflı müzakirəsi keçirilmiş, təhsilalanlara bu ictimai təşkilatın yaradılmasının əsas məqsəd və məramı açıqlanmışdır. Hər bir qrupda təşkil olunmuş iclaslar zamanı parlamentin idarə heyətinə tələbələr tərəfindən namizədlər (26 nəfər, onlardan 12-si qız tələbələrdir) müəyyənləşdirilmiş, heyətin birinci iclasında, fəaliyyət platformaları dinlənildikdən sonra gizli səsvermə yolu ilə Parlamentin sədri (3-cü kurs  tələbəsi  Vüqar İsmayılzadə)  və  sədr  müavini (1-ci kurs tələbəsi Ülviyyə Sevdimalıyeva) seçilmişdir.

Parlamentin nəzərdə tutulmuş iş planına tələbələrin təhsili, məişəti, davranış qaydaları, dərsə davamiyyəti, təhsil nailiyyətləri ilə bağlı qarşıya çıxan problemlərin rəhbərlik yanında qaldırılması və onların lazımi səviyyədə həllinə nail olma, idarəetmə prosesində fəal iştirak, tədris müəssisəsində və liseydən kənarda keçirilən tədbirlərdə, ictimai həyatda, o cümlədən də idman və hərbi hazırlıq yarışlarında təmsil olunma, "Müəllimlər təhsilalanların gözü ilə" və s. kimi sorğuların keçirilməsi, onların nəticələrinin ümumiləşdirilməsi və digər məsələlər salınmışdır.

İdarə heyətinin qəbul etdiyi qərarlara lisey rəhbərliyi qarşısında müvafiq vəsatətlərin qaldırılması, daxili intizam qaydalarına əməl etməyən tələbələrlə söhbətlərin aparılması, istedadlı gənclərin müəyyənləşdirilməsi işinə əməli köməkliyin göstərilməsi, stimullaşdırma, mükafatlandırma üçün əsaslandırılmış təkliflərlə çıxış etmə və sair bu səpgili məsələlər parlamentin əsas vəzifələri kimi müəyyənləşdirilib.

Müasir idarəetmə mexanizmlərinin prosesə müvəffəqiyyətli tətbiqi üçün bu ictimai təşkilatın xüsusi rolunu qeyd etməklə liseyin bütün müəllim, mühəndis - pedaqoji kollektivi və administrativ heyəti "Tələbə Parlamenti"nin normal fəaliyyətinə zəruri dəstəyin verilməsi, qaldırılan problemlərin vaxtında həlli, gənclərə lazımi köməyin göstərilməsi, onlar üçün zəruri şəraitin yaradılmasını əsas məqsədlərdən biri kimi öz qarşısına qoymuşdur.