Yunanıstanın paytaxtı Afinada 4-8 oktyabr 2010-cu il tarixində Ümumdünya Fəlsəfə Forumunun "Ən yaxşı fəlsəfi ideyalar bəşəriyyətin firavanlığı naminə" devizi altında I tarixi Dialektik Simpoziumu keçirilib. Simpoziumda ölkəmizi Astara Pedaqoji Kollecinin direktoru, fəlsəfə doktoru, Rusiya Fəlsəfə Cəmiyyətinin üzvü, əməkdar müəllim Əlihəsən Həmzəyev təmsil etmişdir. Əlihəsən müəllim elmi ezamiyyəti barədə aşağıdakıları bildirmişdir:

- Forumun iclasları dörd gün ərzində yunan parlamentinin antik zalında iş proqramına müvafiq keçirildi.  Dünyanın 20-dən artıq ölkəsindən gəlmiş məşhur filosoflar bəşəriyyətin üzləşdiyi qlobal problemlərdən danışmış və bu problemlərin həllinin praktik yolları barədə öz fikir və ideyalarını söyləmişlər. Açığını deyim ki, belə bir mötəbər forumda dünyanın dörd tərəfindən gəlmiş alimlərin qarşısında çıxış etmək nə qədər çətin və məsuliyyətli olsa da, bir o qədər şərəfli və fəxarətli idi. Yunan parlamentinin antik zalında iştirakçıları Azərbaycan dilində salamlamaq məndə qürur hissi oyatdı. "Qloballaşma, mədəniyyətlərin dialoqu və milli eynilik problemləri" mövzusunda məruzəm filosoflar tərəfindən böyük maraqla qarşılandı.

Simpoziumun xüsusi medalına və sertifikatına layiq görülməyim təkcə mənə deyil, bütün Azərbaycan elminə verilən qiymətdir. Forumun yaradıcısı, prezidenti və Təşkilat Komitəsinin sədri, Yunanıstanın mədəniyyət naziri Elias Demirçioğlu və Forumun vitse-prezidenti, Təşkilat Komitəsinin həmsədri, Rusiya Fəlsəfə Cəmiyyətinin və Rusiya Humanitar Cəmiyyətinin üzvü, YUNESKO-nun eksperti, nəzəri və praktik fəlsəfə haqqında fundamental kitabların müəllifi İqor Kondraşin və digər filosoflarla görüşlərim xüsusilə unudulmazdır. Alimlərlə söhbətlərimdə ən çox rast gəlinən mövzulardan önəmlisi Qarabağ mövzusu idi. Mən onlara çatdırırdım ki, Qarabağ əzəli Azərbaycan torpağıdır və daim Azərbaycan torpağı olaraq qalacaqdır.

Azad ABDULLAYEV