Oktyabrın 20-də təhsil naziri  Misir  Mərdanov  Koreya universitetlərinin I Təhsil sərgisində iştirak etmək üçün ölkəmizdə səfərdə olan Beynəlxalq Təhsil və İnkişaf üzrə Koreya Milli İnstitutunun (NIIED) Beynəlxalq Təhsil Mübadiləsi Departamentinin direktoru cənab çunq Nam Jonun başçılıq etdiyi nümayəndə heyəti  ilə görüşüb.

Cənab çunq Nam Jonu və onun rəhbərlik etdiyi nümayəndə heyətini  Təhsil Nazirliyində görməyindən məmnunluq hissi keçirdiyini söyləyən nazir Azərbaycanla Koreya arasında mövcud olan əlaqələrin ilbəil sürətlə inkişaf etdiyini dedi. Təhsil naziri, xüsusilə, hər iki ölkənin prezidentlərinin qarşılıqlı səfərlərindən sonra ölkələrimiz arasında yaranmış sıx dostluq münasibətlərinin daha yüksək səviyyədə qurulduğunu qeyd etdi. Koreya Respublikasının dünyanın ən qabaqcıl ölkələrindən biri olduğunu deyən nazir ölkələrimizin təhsil sahəsindəki əməkdaşlığını müsbət qiymətləndirdi. Təhsil naziri Koreya Respublikasına səfərini xatırlayaraq orada təhsillə bağlı işgüzar və səmərəli görüşlər keçirildiyini vurğuladı.

Azərbaycanlı gənclərin xaricdə təhsili məsələsinə toxunan təhsil naziri Misir Mərdanov hazırda 60-dan çox tələbənin  Koreyanın ən nüfuzlu ali məktəblərində oxuduğunu söylədi.

ölkələrimizin təhsillə bağlı əlaqələrindən ətraflı söz açan nazir onu da qeyd etdi ki, Bakı Dövlət Universitetində və Azərbaycan Dillər Universitetində  Koreya dili tədris olunur. Təhsil naziri Koreya universitetlərində də  Azərbaycan dilinin tədrisi ilə bağlı müəyyən işlərin aparıldığını dedi.

Ali təhsil sahəsində əlaqələrin daha da inkişaf etdirilməsinin zəruriliyindən danışan nazir Misir Mərdanov bu səfərin hər iki tərəf üçün mühüm əhəmiyyət kəsb etdiyini bildirdi.

Təhsil naziri çıxışının sonunda koreyalı qonaqlara səfərlərinin uğurlu keçməsini, işlərində müvəffəqiyyətlər arzuladı.

Beynəlxalq Təhsil və İnkişaf üzrə Koreya Milli İnstitutunun (NIIED) Beynəlxalq Təhsil Mübadiləsi Departamentinin direktoru cənab çunq Nam Jo səmimi qarşılandıqlarına görə rəhbərlik etdiyi nümayəndə heyətinin adından Azərbaycan Respublikasının təhsil naziri Misir Mərdanova təşəkkürünü bildirdi. ölkələrimiz arasındakı oxşar cəhətlərdən danışan qonaq Azərbaycanın, həqiqətən, inkişaf etmiş bir ölkə olduğunu söylədi. Qeyd etdi ki, bu gün Azərbaycan xüsusilə iqtisadiyyat və təhsil sahələrində böyük uğurlar qazanıb. Bu, bir dost ölkə kimi onları çox sevindirir. Azərbaycanlı gənclərin Koreyanın nüfuzlu universitetlərində təhsil almaları onlar üçün olduqca xoşdur və bundan məmnunluq duyurlar. Gələcəkdə Koreyanın ali məktəblərində təhsil alan azərbaycanlı gənclərin sayının artacağına ümid etdiyini bildirən nümayəndə heyətinin rəhbəri bu səfərin, təşkil olunan sərginin  hər iki ölkənin ali təhsil sahəsində əməkdaşlığının genişlənməsinə və möhkəmlənməsinə, ölkələrarası tələbə mübadiləsinə əlverişli imkan yaradacağını söylədi.

Sonra görüşdə iştirak edən Koreya, Kimçon, Kyunq Puk, Mokpo Milli, Pusan Milli, Seul  Dövlət Texnologiya və digər universitetlərin nümayəndələri təmsil etdikləri ali məktəblər haqqında geniş məlumat verdilər. çıxış edənlər   Azərbaycanın ali məktəbləri ilə tanışlığın  onlar üçün böyük maraq kəsb etdiyini bildirdilər.

Görüşün sonunda koreyalı qonaqlar təhsil naziri Misir Mərdanovla xatirə şəkli çəkdirdilər. 

Samirə KƏRİMOVA