Oktyabrın 1-də Azərbaycan Dillər Universitetində (ADU) 1 və 2 saylı İngilis dili, Alman və Fransız dili fakültələrinin IV kurs tələbələrinin pedaqoji təcrübəsinin başlanmasına həsr olunmuş konfrans keçirildi. ADU-nun tədris işləri üzrə prorektoru, professor Natiq Yusifov, pedaqoji təcrübənin tələbələrin gələcək karyeralarında mühüm rol oynadığını, bilik və bacarıqlarının üzə çıxarılmasında mühüm əhəmiyyət kəsb etdiyini bildirdi. İndiyədək həyata keçirilən pedaqoji təcrübələrin uğurla başa çatdığını vurğulayan prorektor qazanılan nailiyyətlərdə pedaqoji təcrübəyə rəhbərlik edən pedaqoq, metodist və psixoloqların böyük əməyi olduğunu konfrans iştirakçılarının diqqətinə çatdırdı. Pedaqoji təcrübənin keçirilməsi üçün bütün normativ-hüquqi məsələlərin həll olunduğunu  bildirən N.Yusifov problem yaranacağı təqdirdə, fakültə dekanlarına müraciət etməyin vacibliyini önə çəkdi. O, pedaqoji təcrübə müddətində tələbələrə uğurlar arzuladı.

ADU-nun Pedaqogika kafedrasının müdiri, professor, əməkdar elm xadimi Nurəddin Kazımov nəzəriyyədə mənimsənilən biliklərin, yeni ideyaların və təlim metodlarının təcrübədə tətbiq edilməsinin zəruri olduğunu bildirdi.  Digər çıxış edənlər də pedaqoji təcrübə müddətində tələbələrin intizam qaydalarına ciddi riayət etmələrinin, nəzəriyyədə öyrəndikləri biliklərin tədrisdə tətbiq olunmasının vacibliyini vurğuladılar. Sonda ADU-nun pedaqoji təcrübə rəhbəri Bəxtiyar Həmzəyev pedaqoji təcrübəyə təhkim olunan müəllim və tələbələrin siyahısını təqdim etdi.

2010-2011-ci tədris ilində oktyabrın 1-dən noyabrın 5-dək ADU-nun 442 tələbəsi  Bakının 30 məktəbində pedaqoji təcrübə keçəcək. 

ADU-nun Mətbuat xidməti