Oktyabrın 5-də Beynəlxalq Müəllimlər Günü ilə əlaqədar Bakı Pedaqoji Kadrların İxtisasartırma və Yenidənhazırlanma İnstitutunda Gəncliyin Elmi-Mədəni İnkişafı İctimai Birliyi (CEMİİB) ilə birgə hazırlanmış "Müridlik-müdrikliyin gənclik sədasıdır" mövzusunda tədbir keçirildi.

Tədbiri giriş sözü ilə açan BPKİYİ-nin rektoru, professor Asəf Zamanov müəllimləri əlamətdar gün münasibətilə təbrik edərək, onlara gələcək fəaliyyətlərində uğurlar arzuladı. Professor A.Zamanov çıxışını ulu öndər Heydər Əliyevin müəllim haqqında söylədiyi fikirlərlə başlayaraq, bu əlamətdar günün dünyanın bir çox ölkələrində, eləcə də respublikamızda keçirilməsini dövlətimizin müəllimə olan diqqət və qayğısının bariz nümunəsi kimi qiymətləndirdi. Son illər ölkə Prezidenti cənab İlham Əliyevin  təhsilə və təhsil işçilərinə göstərdiyi diqqətdən danışan natiq, təhsil strukturunun yeniləşməsini, maddi-texniki bazaların standartlara uyğun səviyyəyə çatdırılmasını və müəllimlərə göstərilən qayğını təqdirəlayiq hal kimi qiymətləndirərək ölkə başçısına təşəkkürünü bildirdi. O, təhsil aldığı orta məktəbin müəllimləri haqqında xoş fikirlər səsləndirərək, onlarla mütəmadi olaraq əlaqə saxladığını bildirdi.

Sonra söz "Simurq" Azərbaycan Mədəniyyəti Assosiasiyasının prezidenti, professor, kulturoloq Fuad Məmmədova verildi. O, Azərbaycan müəllimləri haqqında xoş fikirlər səsləndirdi, həmişə olduğu kimi müasir dövrümüzdə də müəllimə böyük ehtiyacın olduğunu və dövlətin formalaşmasında müəllimin üzərinə düşən məsuliyyətin ciddiliyini vurğuladı. Bildirildi ki, müəllim, hər şeydən öncə, yüksək mədəniyyətə, dərin intellektual biliyə malik olmalı, gələcək nəslin hərtərəfli formalaşmasına diqqət yetirməlidir.

Tədbirdə çıxış edən professor Əbdül Əlizadə XX əsrin ən böyük müəllimi ümummilli liderimiz Heydər Əliyevin olduğunu, onun ideyaları əsasında qurulan müasir dövlətimizin sürətlə inkişaf etdiyini və bu yolda müəllimlərin əməyinin yüksək qiymətləndirildiyini qeyd etdi. Bildirildi ki, müəllimlər şagirdlərin dərin və hərtərəfli bilik almaları, yaşadıqları dövrün problemlərindən baş çıxarmaları üçün bütün bilik və bacarıqlarını sərf edirlər. Valideynlə bərabər, bəlkə də, ondan daha çox əziyyət çəkmək, kədəri ilə kədərlənib, sevinci ilə sevinmək müəllimlərin üzərinə düşən ağır və məsuliyyətli yükdür.

Çıxış edən CEMİİB-nin sədri Sərdar Yusifoğlu əlamətdar gün münasibətilə bütün Azərbaycan müəllimlərini təbrik edərək, belə bir şəraitin yaradılmasına görə institutun rəhbərliyinə və kollektivinə dərin minnətdarlığını bildirdi. O, müəllimlərin qarşısında nitq söyləməyin çətin və şərəfli olduğunu qeyd edərək, müəllim adını uca tutduğunu və ömrü boyu müəllimlərə borclu olduğunu bildirdi.

Gənclər və İdman Nazirliyinin məsul işçisi Ramil Məmmədov, institutun Psixologiya kafedrasının müdiri, psixologiya elmləri namizədi Hökümə Əliyeva müqəddəs müəllim əməyindən söz açdılar.

Çıxışlardan sonra institutun rəhbərliyi fərqlənənlərə müxtəlif nominasiyalar üzrə diplom və mükafatlar verdi. 

Niyazi RƏHİMOV