Bir neçə ildir ki , Azərbaycan Respublikası Prezidentinin bədən tərbiyəsi və idman sahəsi ilə bağlı sərəncam və fərmanlarından irəli gələn vəzifələrin yerinə yetirilməsi vəziyyətini, fiziki tərbiyə və idman sahəsində qabaqcıl pedaqoji təcrübəni öyrənmək, təhsil sistemində idman və fiziki tərbiyə işini daha da yaxşılaşdırmaq, bu sahədə çalışan istedadlı gənc idmançıları, məşqçi-müəllimləri aşkar etmək, onları rəğbətləndirmək məqsədilə ayrı-ayrı nominasiyalar üzrə respublika müsabiqələri təşkil olunur.

Təhsil naziri Misir Mərdanovun "Respublika müsabiqəsinin keçirilməsi haqqında" 23 sentyabr 2009-cu il tarixli əmri ilə keçirilən növbəti müsabiqəyə artıq yekun vurulmuş və qaliblər müəyyənləşdirilmişdir.

Dekabrın 28-də Təhsil Nazirliyində müsabiqə qaliblərinin mükafatlandırılması mərasimi keçirildi. Nazirliyin məsul işçilərinin, şöbələrinin və müvafiq struktur bölmə rəhbərlərinin, müsabiqə qaliblərinin, bir sıra idman məktəblərinin nümayəndələrinin və KİV təmsilçilərinin iştirak etdiyi mərasimi açan nazir qonaqları salamladı və dəvəti qəbul etdikləri üçün onlara öz təşəkkürünü bildirdi.

ölkəmizdə idmanın inkişafına daim ciddi fikir verildiyini qeyd edən təhsil naziri bu sahəyə göstərilən diqqət və qayğının ümummilli liderimiz Heydər Əliyevin adı ilə bağlı olduğunu dedi. Son illərdə bu işin ölkə Prezidenti cənab İlham Əliyev tərəfindən uğurla davam etdirildiyini bildirən nazir regionlarda olimpiya mərkəzlərinin yaradılmasını, idmanın müxtəlif sahələrinin inkişafını diqqətə çatdırdı. Nazirin çıxışında Azərbaycanın dünya ölkələri arasında tanınmasında beynəlxalq idman hərəkatının əhəmiyyətindən bəhs olundu.

Daha sonra keçirilən müsabiqə haqqında danışan Misir Mərdanov məlumat verdi ki, ümumiyyətlə, Təhsil Nazirliyi sistemində 158 idman məktəbi fəaliyyət göstərir. Bu məktəblərdə 27 idman növü inkişaf etdirilir və 453 bölmədə 8938 qrup fəaliyyət göstərir. Həmin müəssisələrdə 5136 nəfər məşqçi-müəllim işləyir. Onlardan 3468 nəfəri ixtisaslı, 50 nəfəri yüksək, 500 nəfəri isə I-II kateqoriyalı məşqçi-müəllimdir.

İdman məktəblərinin maddi və tədris-texniki bazalarının möhkəmləndirilməsi istiqamətində görülmüş işləri diqqətə çatdıran nazir bildirdi ki, bir sıra rayonlarda və Bakıda yerləşən müəssisələrin boks və tennis zalları, "Təhsil" Respublika İdman Mərkəzinin inzibati binası əsaslı təmir olunmuş və lazımi avadanlıqlarla təmin edilmişdir. Naxçıvan Şəhər Şahmat Məktəbi üçün yeni, dünya standartları səviyyəsində, müasir inventar və avadanlıqlarla təmin olunmuş bina tikilib istifadəyə verilmişdir. Sumqayıt və Mingəçevir şahmat məktəbləri isə əsaslı surətdə yenidən qurulur və yaxın vaxtlarda istifadəyə veriləcəkdir.

Sevindirici haldır ki, Naxçıvan şəhər, Samux, Xızı rayonlarında yeni şahmat məktəblərinin açılışında, Yevlax və Şamaxı rayon şahmat məktəblərinin isə əsaslı təmirdən sonra açılış mərasimlərində ölkə Prezidenti cənab İlham Əliyev də iştirak etmişdir.

Cari tədris ilində Gəncə şəhər 1 nömrəli əsas internat məktəbinin bazasında Gəncə şəhər futbol təmayüllü internat tipli gimnaziya yaradılmışdır. Bakı şəhərinin 51, 171, 237, 239, 136 nömrəli orta, Makarenko adına internat, Füzuli rayonu 27 nömrəli orta məktəblərində və "Təhsil" Respublika İdman Mərkəzinin Bakı filialında yeni süni örtüklü futbol meydançaları yaradılmışdır. Həmin təhsil ocaqlarında AFFA-nın mütəxəssislərinin iştirakı ilə futbol dərsləri tədris olunur.

10 nominasiya üzrə keçirilən VII respublika müsabiqəsində Təhsil Nazirliyi sistemində fəaliyyət göstərən 153 idman məktəbinin iştirak etdiyini bildirən Misir Mərdanov daha sonra qalibləri mərasim iştirakçılarına təqdim etdi.

Nazir müsabiqə qaliblərini təbrik edərək ən xoş arzularını bildirdi. Onlara diplomlar və hədiyyələr təqdim olundu.

Gənclər və idman nazirinin müavini İsmayıl İsmayılov, Ailə, Qadın və Uşaq Problemləri üzrə Dövlət Komitəsi sədrinin müavini Aynur Sofiyeva və olimpiya çempionu Fərid Mansurov da təbriklərə qoşularaq qaliblərə yeni nailiyyətlər arzuladılar. 

Hicran ƏKBƏROVA