Avqustun 1-də Beynəlxalq İnformasiya Mərkəzinin (BİM) sədri, "Milli Qəhrəmanlar" qəzetinin baş redaktoru Mirbəşir Seyidzadənin təşkilatçılığı ilə Milli Qəhrəmanların ailə üzvləri, bir qrup ziyalı və ictimaiyyət nümayəndələri Biləsuvar rayonuna gələrək Azərbaycanın Milli Qəhrəmanı Mübariz Ağakərim oğlu İbrahimovun ailə üzvləri ilə görüşüblər.

Əvvəlcə görüş iştirakçıları rayon mərkəzindəki ulu öndər Heydər Əliyev parkında ümummilli liderin abidəsini ziyarət edərək önünə gül-çiçək dəstələri qoyublar. Milli Qəhrəmanın doğulduğu Əliabad kəndində keçirilən görüşdə Mübarizin uşaqlıq illəri və xidmətdə olduğu dövrlər xatırlanıb.

Görüşün sonunda Milli Qəhrəman Mübariz İbrahimovun atasına, oğlunun əziz xatirəsinə həsr edilmiş, Azərbaycanın xəritəsi və üçrəngli bayrağı üzərində Mübarizin əksi olan portret, "Milli Qəhrəmanlar Zirvəsi" kitabı hədiyyə olunub.

ƏDALƏT