|
Son illər təhsilimizdə aparılan islahatların bir
istiqaməti də şagirdlərin biliklərinin
qiymətləndirilməsini əhatə edir. Hazırlanmış
yeni qiymətləndirmə mexanizmi indi dərsdə
şagirdlərin hər hansı mövzuya cavabını deyil,
bütün dərsdəki fəaliyyətini, onun təlimdə əldə
etdiyi bütün nailiyyəti özündə əks etdirir.
Yeni mexanizmə əsasən tətbiq olunan
qiymətləndirmənin 3 növündən biri olan summativ
qiymətləndirmədən təcrübəmdə geniş istifadə
edirəm.
Məlum olduğu kimi, summativ qiymətləndirmə
şagirdlərin təlimin müəyyən mərhələlərində
standartlar üzrə əldə etdikləri nailiyyət
səviyyəsinin qiymətləndirilməsidir. Summativ
qiymətləndirmənin ən mühüm cəhəti şagirdlərin
əldə etdikləri biliklərin tətbiqinə hansı
səviyyədə nail olunduğunu aşkar etməkdən
ibarətdir.
Summativ qiymətləndirmənin iki növündən
təcrübədə daha çox istifadə olunur. Onlardan
biri olan kiçik summativ qiymətləndirmə bölmə və
bəhslərin sonunda, ikincisi - böyük summativ
qiymətləndirmə isə yarımilin sonunda aparılır.
Qiymətləndirmənin bu növünü şagirdlər arasında
keçirilən bilik yarışlarında da tətbiq etmək
mümkündür. Bunu nəzərə alaraq ikinci sinif
ingilis dili kitabında 4-6 unit-dən sonra "Test
Yourself"ə əsaslanaraq ikinci siniflər arasında
"Uşaqlara sevinc bəxş edək" layihəsi əsasında
"Xoşbəxt uşaqlar" adı altında tədbir keçirdik.
Tədbir əslində Bakı şəhəri 31 (müəllim-Vüsalə),
60 (müəllim-Nüşabə Baxşıyeva), 150
(müəllim-Qəmər Rüstəmova), 164 (müəllim Gülsüm
Axundova), 35 (müəllim Pərvanə Talıbova), 46
nömrəli (müəllim-Dilarə Bünyatova) məktəblər
arasında hər sinifdən 5 şagird olmaqla ikinci
sinif şagirdləri ilə keçirilən yarış idi.
Yarışın məqsədi şagirdlərin biliyini aşkara
çıxarmaq və onları ruhlandırmaq, ingilis dilinə
maraqlarını artırmaq idi. Tədbir 46 nömrəli orta
məktəbdə keçirildi. Məktəbin direktoru Sevinc
Budaqova qonaqları salamladı və uşaqlara uğurlar
arzuladı. Tədbir "Uşaq ili"nə, Uşaq Hüquqları
Haqqında Konvensiyanın 20 illiyinə həsr
olunmuşdu. Layihənin ideya rəhbəri AMB sədri
Məlahət Mürşüdlü, maliyyə dəstəyi İREX direktoru
Andrea Kalan, British Council və USA Embassy
idi.
Tədbirin sonunda bütün uşaqların nailiyyətləri
summativ qiymətləndirilərək onlara sertifikat və
kitablar hədiyyə olundu. Yer tutan şagirdlərə
xüsusi hədiyyələr, həmin məktəbin müəllimlərinə
isə əyani vəsait və kitablar, disklər verildi.
Uşaqların biliyini "Test Yourself" prinsipinə
əsaslanaraq qiymətləndirdik.
Xüsusi cədvəl üzrə aparılan qiymətləndirmənin
nəticələrinə əsasən 164 nömrəli məktəbin
komandası I, 31 və 150 nömrəli məktəblərin
komandaları II, 35, 46 və 60 nömrəli məktəblər
isə III yeri tutdular.
Yeri gəlmişkən qeyd edək ki, müəllimlər
şagirdlərn şifahi nitqini summativ
qiymətləndirmək məqsədi ilə eyni tipli deyil,
rəngarəng çalışma növlərindən istifadə etsələr
yaxşı olar. Belə çalışmalar dərsi daha maraqlı
və intensiv edir.
Xarici təşkilatlar tədbiri bəyəndilər,
dəstəklədilər, tövsiyələrini verdilər və ona
digər məktəblərin də qoşulmasını təklif etdilər.
Gülsüm Axundova,
Bakıdakı 164 nömrəli orta
məktəbin ingilis dili müəllimi,
Dilarə Bünyatova,
Bakıdakı 46 nömrəli orta
məktəbin ingilis dili müəllimi |
