· Ana səhifə

· Rəsmi

· Heydər Əliyev Fondu

· Əmrlər, sərəncamlar

· Təhsil Nazirliyində

· Xəbərlər

· Pedaqoji yazılar

· Məktəblərimiz

· Bizimlə əlaqə

Azərbaycan Dövlət Neft Akademiyasında baş vermiş faciə ilə əlaqədar  Azərbaycan Respublikasının Prezidenti İlham Əliyevin başsağlığı

2009-cu il aprel ayının 30-da Azərbaycan Dövlət Neft Akademiyasında baş vermiş faciə ilə bağlı hədsiz kədərləndiyimi bildirirəm. Həlak olanların ailələrinə, yaxınlarına və əzizlərinə dərin hüznlə başsağlığı verərək, ulu Tanrıdan onlara rəhmət diləyirəm. Bu çətin günlərinizdə biz hamımız ağır dərdinizi bölüşərək, sizə səbir və təmkinlilik diləyirik. Əmin ola bilərsiniz ki, Azərbaycan dövləti bu hadisə ilə əlaqədar bütün lazımi tədbirləri həyata keçirəcəkdir.

Allah rəhmət eləsin!

İlham ƏLİYEV,

Azərbaycan Respublikasının Prezidenti

Bakı, 30 aprel 2009-cu il

Azərbaycan Dövlət Neft Akademiyasına silahlı basqınla bağlı cinayət işi başlanmışdır

Respublika Baş Prokurorluğunun və Daxili İşlər Nazirliyinin birgə məlumatında deyilir ki, aprelin 30-da saat 9.30 radələrində Azərbaycan Dövlət Neft Akademiyasının Bakı şəhəri, Dilarə Əliyeva küçəsi, 227 saylı ünvanda yerləşən Qaz-neft mədən və neft mexanikası fakültələrinin yerləşdiyi ikinci korpusa daxil olan naməlum şəxsin inzibati binanın birinci mərtəbəsindən altıncı mərtəbəsinədək qarşısına çıxan hər bir kəsə "Makarov" tipli tapançadan atəş açması nəticəsində 12 nəfər ölmüş, 13 nəfər müxtəlif dərəcəli bədən xəsarətləri almışdır.

Daxil olmuş məlumat əsasında hadisə yerinə dərhal polisin xüsusi təyinatlı nizami hissəsinin, ərazi polis və prokurorluq orqanlarının məsul əməkdaşları gəlmişlər. Polis tərəfindən zərərsizləşdiriləcəyini görən silahlı cinayətkar özünü öldürmüşdür.

Cinayətin törədildiyi yer və meyitlər müayinə olunmuş, məhkəmə-tibbi, məhkəmə-trasoloji, məhkəmə-ballistik və digər ekspertizalar təyin edilmişdir.

Cinayəti törətmiş şəxsin üstündən 1980-ci il təvəllüdlü Gürcüstan vətəndaşı Qədirov Fərda Əsəd oğluna məxsus şəxsiyyət vəsiqəsi, "Makarov" tipli tapança, habelə hər biri 40 güllə tutumlu və içərisində 71 güllə olan xüsusi üsulla hazırlanmış 3 ədəd patrondaş, 2 tapança sandıqçası aşkar edilərək götürülmüşdür.

"Ulu öndər Heydər Əliyevi düşünərkən..." 

Aprelin 25-də akademik Zərifə Əliyeva adına məktəbdə ümummilli lider Heydər Əliyevin anadan olmasının 86-cı ildönümü münasibətilə ümumtəhsil məktəblərinin şagirdləri arasında təşkil olunan inşa müsabiqəsinin yekun mərhələsi keçirildi.

 Müsabiqənin təntənəli açılış mərasimində Azərbaycan Respublikasının təhsil naziri Misir Mərdanov, Yeni Azərbaycan Partiyası sədrinin müavini, icraçı katib Əli Əhmədov, millət vəkili Mübariz Qurbanlı, Azərbaycan Təhsil İşçiləri Azad Həmkarlar İttifaqı Respublika Komitəsi sədrinin müavini Şaiq Əsgərov, müsabiqənin Təşkilat Komitəsinin üzvləri və KİV nümayəndələri iştirak edirdilər.

Gəncə Dövlət Universitetinin 70 illik yubileyinə həsr olunmuş tədbir

Aprelin 27-də Gəncə Şəhər İcra Hakimiyyətinin akt zalında Gəncə Dövlət Universitetinin 70-illik yubileyinə həsr olunmuş təntənəli mərasim keçirildi.Tədbir iştirakçıları əvvəlcə Gəncə Şəhər İcra Hakimiyyətinin qarşısında ucaldılmış ulu öndər Heydər Əliyevin abidəsi önünə gül dəstələri qoydular. Azərbaycan Respublikasının Dövlət himni səsləndirildikdən sonra tədbiri giriş sözü ilə Gəncə Şəhər İcra Hakimiyyətinin başçısı Eldar Əzizov açaraq universitetin 70-illik yubileyi   münasibətilə  təhsil  ocağında  çalışan bütün əməkdaşları təbrik etdi, xalqımızın ümummilli lideri Heydər Əliyevin və onun layiqli davamçısı ölkə Prezidenti İlham Əliyevin  ölkədə təhsilin inkişafına göstərdikləri əvəzsiz qayğı  və diqqətdən danışdı.   

Təhsil Nazirliyində görüş

Aprelin 28-də Azərbaycan Respublikasının təhsil naziri Misir Mərdanov çin Xalq Respublikasının ölkəmizdəki fövqəladə və səlahiyyətli səfiri Can Yannyan ilə görüşüb.        

Azərbaycanda təhsilin müasir tələblər səviyyəsinə yüksəldilməsi yönündə görülən kompleks işlərdən, həyata keçirilən islahatlardan bəhs edən nazir ölkə Prezidenti cənab İlham Əliyevin rəhbərliyi ilə uğurla reallaşdırılan dövlət siyasətində təhsil sektoruna xüsusi önəm verildiyini diqqətə çatdırıb. ölkə təhsilinin keyfiyyətcə yeni mərhələyə qədəm qoyduğunu bildirən nazir qeyd edib ki, atılan məqsədyönlü addımlar sayəsində dünya təhsil sisteminə inteqrasiya istiqamətində ciddi uğurlar qazanılıb və bir çox ölkələrlə səmərəli, qarşılıqlı əlaqələrin inkişafına nail olunub. 

Akademik Zərifə xanım Əliyevanın anadan olmasının 86-cı ildönümü qeyd olundu

Aprelin 28-də görkəmli oftalmoloq alim Zərifə xanım Əliyevanın adını daşıyan orta məktəbdə anadan olmasının 86-cı ildönümünə həsr olunmuş tədbir keçirildi. öncə Fəxri xiyabanı ziyarət edən qonaqlar sonra akademik Zərifə Əliyeva adına məktəblə tanış oldular. "Xatirələrdə yaşayan" adlı tədbirdə təhsil naziri Misir Mərdanov, rabitə və informasiya texnologiyaları naziri Əli Abbasov, Azərbaycan Dövlət Pedaqoji Kollecinin direktoru, əməkdar müəllim, YAP Qadınlar şurasının sədri Nurlana Əliyeva, millət vəkilləri və digər qonaqlar iştirak edirdilər.

Yaşlıların təhsilinə dair konfrans

Aprelin 30-da Azərbaycan Müəllimlər İnstitutunda "Müasir şəraitdə yaşlıların təhsili: problemlər və perspektivlər" mövzusunda respublika elmi konfransı keçirildi.

Plenar iclası Azərbaycan Müəllimlər İnstitutunun rektoru,  professor Aqiyə Naxçıvanlı açaraq  müasir şəraitdə təhsilin mühüm məsələlərindən birinə həsr olunmuş elmi konfransın "Yaşlıların təhsili XXI əsrin açarıdır" şüarı altında keçirildiyini bildirdi. Mövzu ilə  bağlı müəyyən fikirlərini söyləyən rektor çıxış üçün sözü təhsil naziri Misir Mərdanova verdi.

Təhsil naziri yaşlıların təhsili ilə bağlı  respublika  elmi konfransının keçirilməsini yüksək qiymətləndirərək bu məsələnin son dərəcə aktual olduğunu  və hamı üçün mühüm əhəmiyyət kəsb etdiyini söylədi. Nazir qeyd etdi ki, yaşlıların təhsili  ömür boyu təhsil sisteminin tərkib hissəsi olmaqla, vətəndaşların cəmiyyətdə və iqtisadiyyatda daim baş verən dəyişikliklərə uyğunlaşmasını təmin etmək məqsədilə çevik tədris proqramları əsasında həyata keçirilən təhsil prosesidir. 

Azərbaycan təhsili: yaxın keçmişə, bu günə və gələcəyə bir baxış

(Əvvəli qəzetimizin ötən saylarında)

XX əsrin ortalarından etibarən aparıcı dünya dövlətlərinin ən mühüm prioritetləri sırasında təhsilin inkişafına əsaslanan "bilik iqtisadiyyatı"nın formalaşdırılması, insan kapitalının yaradılması və beləliklə, davamlı inkişafın təmin olunması amilləri xüsusi yer tutmağa başladı.

İnsan kapitalı nəzəriyyəsi ötən əsrin 50-60-cı illərində Amerika iqtisadçılarının tədqiqatları nəticəsində yaradılmışdır. İşçi qüvvəsinin formalaşdırılması problemləri, insanın yaradıcılıq və faydalılıq imkanlarının artırılması bu nəzəriyyənin əsas hədəfləri kimi müəyyənləşdirilmişdir. 

Təhsil nazirinin rəhbərlik etdiyi nümayəndə heyəti İordaniyada səfərdə olub

Azərbaycan Respublikasının təhsil naziri, professor Misir Mərdanovun rəhbərlik etdiyi bir qrup təhsil işçisindən ibarət nümayəndə heyəti aprelin 19-dan 24-dək İordaniya Haşimilər Krallığında səfərdə olub. Səfərdə məqsəd İordaniyanın təhsil sistemi ilə tanışlıq, iki ölkə arasında təhsil sahəsində mövcud əlaqələrin inkişaf etdirilməsi, daha geniş əməkdaşlıq imkanlarının müəyyənləşdirilməsi idi. Nümayəndə heyəti zəngin səfər proqramı çərçivəsində dost ölkənin təhsil və elm nazirliklərində, bir sıra ali təhsil müəssisələrində və orta məktəblərdə görüşlər keçirib, İordaniya təhsil sistemi ilə yaxından tanış olub.

İcra hakimiyyəti və təhsil

Gədəbəydə rayon icra hakimiyyəti başçısının iştirakı ilə "dəyirmi masa" keçirildi

Müzakirələrdə dövlətin təhsil siyasətinin uğurla həyata keçirilməsində rayon icra hakimiyyətinin rolu xüsusi vurğulandı

Xəbər verdiyimiz kimi, aprelin 21-də Gədəbəydə rayon icra hakimiyyətinin təşəbbüsü ilə "Azərbaycan müəllimi" qəzetinin redaksiyası ilə birgə "dəyirmi masa" keçirilmişdir. "Rayon icra hakimiyyətinin təhsilə qayğısı" mövzusuna həsr olunmuş tədbirdə Gədəbəy Rayon İcra Hakimiyyətinin başçısı Kamran Rzazadə, rayon təhsil şöbəsinin müdiri Ramiz Məmmədov, bir qrup qabaqcıl məktəb direktoru, təlim-tərbiyə işləri üzrə direktor müavini, müəllim, "Azərbaycan müəllimi" qəzetinin əməkdaşları iştirak etmişlər.

ümumtəhsil məktəblərində, peşə liseylərində 

buraxılış imtahanları və şagirdlərin sinifdən-sinfə keçirilməsi haqqında 

Qaydalar

Bu Qaydalar Azərbaycan Respublikası Prezidentinin 1 mart 2005-ci il tarixli 203 nömrəli fərmanı ilə təsdiq olunmuş "Azərbaycan Respublikasının Təhsil Nazirliyi haqqında Əsasnamə"nin, Nazirlər Kabinetinin 12 mart 1994-cü il tarixli, 109 nömrəli qərarı ilə təsdiq olunmuş "Azərbaycan Respublikası ümumtəhsil məktəbinin nümunəvi Əsasnaməsi"nin, Nazirlər Kabinetinin 13 yanvar 2009-cu il tarixli, 9 nömrəli qərarı ilə təsdiq olunmuş "Azərbaycan Respublikasının ümumi təhsil sistemində Qiymətləndirmə Konsepsiyası"nın icrasını təmin etmək məqsədilə qəbul edilir.

I. ümumi müddəalar

1. ümumtəhsil məktəblərinin I - VIII və X siniflərində imtahan aparılmır, şagirdlər müsbət illik qiymətlər əsasında yuxarı sinfə keçirilir.

O, zəhmətkeş alim, qayğıkeş ana idi

Susuz həyat olmadığı kimi, elmsiz yaşayış qeyri-mümkündür. Allahın sevərək işığına yönəltdiyi insanlar elmə yiyələnməklə vətəninə, xalqına və bütün dünyaya misilsiz xeyir verirlər. Həmin insanlar dünyalarını dəyişib əbədiyyətə qovuşandan sonra həyatda qoyduqları xeyirxah və ləyaqətli əməlləri ilə qədirbilənlər tərəfindən hörmət və ehtiramla yad edilir, xatırlanırlar.

 Belə insanlardan biri yaxından tanıdığım, xarakteri və insani keyfiyyətləri ilə qəlbimdə özünə əbədi yer salmış, filologiya elmləri doktoru, professor, Azərbaycan Elmlər Akademiyasının müxbir üzvü olmuş Zərifə Budaqova haqqında söz açmaq niyyətindəyəm.

Zərifə İsmayıl qızı Budaqova 1929-cu il aprelin 28-də İrəvanda dünyaya göz açmışdır. 1936-cı ildə İrəvan şəhər orta məktəbinə, 1943-cü ildə isə pedaqoji texnikuma daxil olub. Həmin texnikumu əla qiymətlərlə başa vurduqdan sonra, 1945-1948-ci illərdə İrəvan Pedaqoji İnstitutunun tələbəsi olmuşdur.