Naxçıvan Muxtar Respublikası Təhsil Nazirliyinin yeni inzibati binası istifadəyə verilmişdir.

Naxçıvan MR təhsil naziri Piri Nağıyev tədbirdə çıxış edərək demişdir ki, son illər muxtar respublikada 150-dən çox təhsil müəssisəsi istifadəyə verilmişdir. Muxtar respublikadakı bütün məktəblər kompüterlə təmin olunmuş, 68 faizindən çoxu İnternetə qoşulmuşdur. Nazir Təhsil Nazirliyinin yeni inzibati binasının istifadəyə verilməsinə görə muxtar respublikanın təhsil işçiləri adından minnətdarlığını bildirmişdir.

Naxçıvan Muxtar Respublikası Ali Məclisinin sədri Vasif Talıbov Təhsil Nazirliyinin yeni inzibati binasının istifadəyə verilməsi münasibətilə kollektivi təbrik etmiş, onlara işlərində uğurlar arzulayaraq demişdir ki, Naxçıvan MR Təhsil Nazirliyi üçün yeni binanın istifadəyə verilməsi ulu öndərimiz Heydər Əliyevin təhsil sahəsində həyata keçirdiyi tədbirlərin Azərbaycan Prezidenti cənab İlham Əliyev tərəfindən uğurla davam etdirilməsinin və təhsilə qayğısının nəticəsidir.

Müasir tələblər səviyyəsində tikilmiş dördmərtəbəli binanın bir hissəsində Naxçıvan Şəhər Təhsil Şöbəsi fəaliyyət göstərəcəkdir.

İnzibati bina Naxçıvan şəhərinin ən yaraşıqlı tikililərindən biri kimi bu qədim şəhərin simasını daha gözəlləşdirmişdir.