Azərbaycanın Rusiya Federasiyasındakı səfirliyi Moskvada azərbaycanlı uşaqların təhsil aldığı 3 ümumtəhsil məktəbinin texniki təchizatı ilə əlaqədar aksiya keçirmişdir. Humanitar məsələlər üzrə müşavir Nigar Axundova başda olmaqla səfirliyin nümayəndələri azərbaycanlı ailələrdən olan 200-dən çox şagirdin təhsil aldığı 1331, 544 və 1233 nömrəli məktəblərə kompüter dəstləri hədiyyə etmişlər.

Səfirliyin nümayəndələri qeyd etmişlər ki, bu aksiyanın məqsədi həmvətənlərimizin təhsil aldığı tədris müəssisələrinin maddi-texniki bazasını möhkəmlətmək, onların təhsil səviyyəsini müasir tələblərə uyğunlaşdırmaq, məktəblərə kömək etməkdir. Diplomatlar məktəblərin rəhbərləri və kollektivləri, şagirdlər və onların valideynləri ilə söhbət etmiş, tədris prosesi ilə tanış olmuş, azərbaycanlı məktəblilərin təhsildə müvəffəqiyyətləri ilə maraqlanmışlar.

Azərbaycan səfirliyinin bu aksiyası üç Moskva məktəbinin pedaqoji kollektivləri və valideynlər tərəfindən yüksək qiymətləndirilmişdir. Tədris müəssisələrinin direktorları V.Məmmədova, T.Danilkina və İ.Beluxina Azərbaycanın RF-dəki səfiri Polad Bülbüloğluna və səfirliyin nümayəndələrinə bu məktəblərə göstərdikləri diqqət və qayğıya görə dərin minnətdarlıq bildirmişlər.

Görüşlərdə tədris prosesində Azərbaycan dilinin, ölkəmizin tarixinin, mədəniyyətinin və coğrafiyasının daha dərindən öyrənilməsini nəzərdə tutan etnik-mədəni komponenti inkişaf etdirməyin zəruriliyi vurğulanmışdır. Qeyd edilmişdir ki, əsas fənlərə əlavə olaraq adaptasiya edilmiş xüsusi tədris proqramlarının və metodikaların işlənib hazırlanması zəruridir. Səfirlik tərəfindən həmin məktəbləri dərsliklər, Azərbaycan ədəbiyyatı və ölkəmiz haqqında müxtəlif mətbu məhsullarla təmin etmək, öz səhifələrində Azərbaycanın mədəniyyəti və incəsənəti barədə söhbət açan "Baku" jurnalını hər ay həmin məktəblərə göndərmək təklif olunmuşdur.  

AzərTAc