Martın 10-da Azərbaycan Texniki Universitetində faşizm üzərində qələbənin 65 illiyinə həsr olunmuş tədbir keçirildi.Tədbirdə universitetin professor-müəllim və tələbə heyəti, İkinci Dünya müharibəsi veteranları, Respublika Veteranlar Şurasının nümayəndələri və digər qonaqlar iştirak edirdilər. Öncə iştirakçılar İkinci Dünya müharibəsində və Qarabağ savaşında şəhid olan həmvətənlərimizin xatirəsini bir dəqiqəlik sükutla yad etdilər.

Tədbiri giriş sözü ilə açan Azərbaycan Texniki Universitetinin rektoru, texnika elmləri doktoru, professor Havar Məmmədov bildirdi ki, İkinci Dünya müharibəsi  bəşər tarixinin ən dəhşətli, qanlı faciəsidir. Qeyd edildi ki,700 mindən çox vətəndaşımız həmin müharibədə iştirak etmiş, bunlardan 300 min  nəfərə yaxını həlak olmuşdur. Döyüşçülərimizdən 50 nəfərə yaxını göstərdikləri qəhrəmanlıqlara görə Sovet İttifaqı Qəhrəmanı adına layiq görülmüş, on minlərlə iştirakçı isə müxtəlif orden və medallarla təltif edilmişdir.

Sonra H.Məmmədov ulu öndər Heydər Əliyevin İkinci Dünya müharibəsi iştirakçılarına olan diqqət və qayğısından söhbət açaraq bildirdi ki, ümummilli liderimizin qoyduğu bu ənənə hörmətli Prezidentimiz İlham Əliyev tərəfindən davam etdirilir.

Sonra Respublika Veteranlar Şurasının üzvü, İkinci Dünya müharibəsi veteranı, istefada olan general-mayor Bahadur Hüseynov, Az.TU-nun fəlsəfə və politologiya kafedrasının müdiri, İkinci Dünya müharibəsi veteranı, fəlsəfə elmləri doktoru, professor Fərrux Ramazanov və digər çıxış edənlər  müharibənin dəhşətlərindən söz açıb, qələbənin 65 illiyi münasibətilə veteranları təbrik etdilər.

Belə tədbirlərin keçirilməsini təqdirəlayiq hal kimi qiymətləndirən veteranlar ölkə başçısı İlham Əliyevə və universitetin kollektivinə minnətdarlıqlarını bildirdilər. 

Niyazi RƏHİMOV