Fevralın 9-da "Landmark" otelində Təhsil Nazirliyi və "Microsoft Azərbaycan" şirkətinin birgə "Təhsildə informasiya texnologiyalarının tətbiqi" mövzusunda konfransı keçirildi.  Konfransda təhsil naziri Misir Mərdanov, Təhsil Nazirliyinin Təhsil sisteminin informasiyalaşdırılması idarəsinin rəisi Samir Məmmədov, bu tədbirin keçirilməsinə dəstək vermiş "Ultra", "İntel", HP şirkətlərinin və "Mədəd" humanitar təşkilatının nümayəndələri, paytaxt məktəblərinin, eləcə də respublikanın müxtəlif bölgələrindəki bir sıra təhsil müəssisələrinin direktorları və qabaqcıl müəllimləri iştirak edirdilər.

Tədbiri "Microsoft Azərbaycan" şirkətinin "Təhsildə əməkdaşlıq" proqramının meneceri Emin Axundov açaraq təmsil etdiyi şirkətin təhsil sahəsindəki fəaliyyətindən söz açdı. E.Axundov keçirilən bugünkü konfransda bir sıra məsələlərin geniş müzakirəsinin nəzərdə tutulduğunu, həmçinin "İnnovativ müəllimlər" müsabiqəsinin nəticələrinin açıqlanacağını dedi. Məlumat üçün bildirdi ki, müsabiqə Təhsil Nazirliyinin "Microsoft" şirkəti ilə təhsil sahəsində uzunmüddətli əməkdaşlığının tərkib hissəsidir və "2008-2012-ci illərdə Azərbaycan Respublikasında təhsil sisteminin informasiyalaşdırılması üzrə Dövlət Proqramı"na müvafiq olaraq keçirilmişdir. Müsabiqədə paytaxtın və 12 bölgənin ümumtəhsil məktəbindən 200-ə yaxın müəllim iştirak edib, onlardan 25-i finala vəsiqə qazanıb. Həmin finalçılar arasından I, II, III yerləri tutan qaliblər artıq müəyyənləşib və bu gün onların adları məlum olacaq.

Sonra çıxış üçün söz təhsil naziri Misir Mərdanova verildi. Təhsil naziri iştirakçıları salamlayaraq, keçirilən tədbirin vacibliyini diqqətə çatdırdı. "Microsoft" şirkəti ilə Təhsil Nazirliyi arasında mövcud əməkdaşlıqdan danışan nazir Misir Mərdanov qeyd etdi ki, adıçəkilən şirkət ölkəmizdə təhsillə bağlı müxtəlif layihələrin həyata keçirilməsində yaxından köməklik göstərir. Nazir onu da bildirdi ki, İKT ilə bağlı ölkəmizdə fəaliyyət göstərən digər şirkətlər də təhsildə İKT-nin tətbiqi işində fəallıq göstərirlər. Bunu müsbət hal  kimi dəyərləndirən  nazir  Misir Mərdanov daha sonra son illər müasir cəmiyyətdə təhsilin vacib komponentlərinə çevrilmiş  İKT ilə təhsil müəssisələrinin təmin olunması sahəsində xeyli işlərin görüldüyünü dedi. Təhsil naziri məlumat üçün bildirdi ki, 2009-cu ildə 500 məktəb genişzolaqlı sürətli İnternetə qoşulub. Belə məktəblərin sayının bu il daha da artırılacağını söyləyən nazir Misir Mərdanov "2008-2012-ci illərdə Azərbaycan Respublikasında təhsil sisteminin informasiyalaşdırılması üzrə Dövlət Proqramı" çərçivəsində bir sıra mühüm işlərin reallaşdırılmasının nəzərdə tutulduğunu dedi. çıxışının sonunda konfrans iştirakçılarına uğurlar arzulayan təhsil naziri belə tədbirlərin təhsil işçiləri üçün  faydalı olduğunu qeyd etdi.

Sonra "İnnovativ müəllimlər" müsabiqəsinin  qaliblərinin adları açıqlandı. II-III yerin  sahiblərinə DVD pleyerlər və noutbuklar hədiyyə verildi. Müsabiqədə I yeri tutan 1 nəfər isə bu il martın sonunda Almaniyada keçiriləcək Avropa İnnovativ Müəllimlər Forumunda Azərbaycanı təmsil edəcəkdir. Qalibləri təhsil naziri Misir Mərdanov təbrik edərək onlara ən xoş arzularını çatdırdı. 

 Konfransda daha sonra müəllimlərin  informasiya texnologiyalarının tətbiqi üçün motivasiya sistemi, uşaqların İnternetdə təhlükəsizliyi məsələləri təhsil işçiləri və mütəxəssislər tərəfindən müzakirə olundu.

Konfrans geniş diskussiya və fikir mübadiləsi şəraitində başa çatdı. 

Samirə KƏRİMOVA