Azərbaycan Dillər Universitetində dünya türkologiyasının banisi Mahmud Kaşğarinin 1000 illik  yubileyi qeyd olundu.

Azərbaycan Dillər Universitetinin rektoru, millət vəkili, professor Səməd Seyidov  çıxış edərək keçirilən bu tədbirin əhəmiyyətindən söz açdı.

Natiq bildirdi ki, əvvəllər çar Rusiyası dövründə Azərbaycan tarixi, mədəniyyəti birtərəfli öyrənilirdi. Bu gün isə Azərbaycan öz qızıl dövrünü  yaşayır, çünki müstəqil şəkildə öz tarixini, öz mədəniyyətini, musiqisini tam şəkildə öyrənir, təbliğ edir və dünyaya çatdıra bilir. ADU-nun  da  bu işdə xüsusi rolu var.

Mahmud Kaşğarinin "Divani-lüğətit- türk" divanını Azərbaycan dilinə tərcümə edən türkoloq alim, Bakı Dövlət Universitetinin  professoru  Ramiz Əsgər Mahmud Kaşğarinin 1000 illiyinin ADU- da  keçirilməsinin önəmli olduğunu vurğulayaraq dedi: - Orta türk  dövrünün ilkin və möhtəşəm abidələrindən biri olan bu əsərdə türkün min il  bundan əvvəlki dili, ədəbiyyatı, mədəniyyəti, coğrafiyası, milli mənəvi dəyərləri, adət və ənənələri öz əksini tapmışdır.

Sonra ADU-nun Azərbaycan dilçiliyi kafedrasının professorlarından  Adil Babayevin, Əqidə Axundovanın  və İkram Qasımovun  Mahmud Kaşğarinin "Divani -lüğətit-türk"əsəri  ilə əlaqədar məruzələri dinlənildi.

 Şakir CƏFƏROV