Lənkəran Dövlət Universitetində "Fəal təlim üsulları və kredit sistemində biliyin qiymətləndirilməsi" mövzusunda "dəyirmi masa" keçirildi.

LDU-nun rektoru, fizika-riyaziyyat elmləri doktoru, əməkdar elm xadimi, professor Asəf İsgəndərov tədbiri açaraq təhsil sistemində fəal təlim üsullarını və kredit sistemində biliyin qiymətləndirilməsinin rolunu iştirakçıların nəzərinə çatdırdı. Boloniya prosesinə uyğun olaraq kredit təhsil formasının Lənkəran Dövlət Universitetində də tətbiq olunduğundan və bunun səmərəli nəticələr verməsindən söhbət açan rektor bildirdi ki, yeni üsul ilk dəfə "Azərbaycan dili və ədəbiyyatı" və "Coğrafiya" ixtisaslarının birinci kurslarında tətbiq olunub. Qeyd edildi ki, 2009-2010-cu tədris ilindən universitetdə bütün ixtisaslar üzrə tədris kredit sisteminə keçirilib.

Təhsildə fəal təlim üsulları, kredit sisteminin mahiyyəti və əsas şərtlər "dəyirmi masa"da müzakirə edildi. Müzakirədə universitetin kimya-biologiya kafedrasının müdiri, dosent Məmmədhüseyn Hüseynov, riyaziyyat-informatika kafedrasının dosenti, fizika-riyaziyyat elmləri namizədi Mirnamiq Bəşirov, Azərbaycan Dövlət Pedaqoji Universitetinin dosenti İlham Əhmədov, İxtisasartırma və kadrların yenidən hazırlanması fakültəsinin metodistləri Bəxtiyar Muradxanlı, Şahvələd Rzayev və başqaları iştirak edirdilər.

"Dəyirmi masa"da təhsildə fəal təlim metodlarının tətbiqinin zərurəti, tətbiqi üsulları, əlaqədar olaraq tələbə ilə müəllimin bu təlimdə yeri, rolu, əldə etdiyi nəticələrin tədrisin nəticəsinə təsiri, universitetin özünütəhsil metodologiyası, təhsil proqramları məzmununun keyfiyyətcə qiymətləndirilməsi və s. məsələlərdən geniş danışıldı. Qeyd edildi ki, universitetdə 2 ildir "Fəal təlim üsulları" kabineti fəaliyyət göstərir.

Müzakirədə tələbələr və magistrantlarla yanaşı, ictimaiyyətin nümayəndələri də iştirak edirdilər. Müzakirə olunan məsələyə iştirakçıların da münasibəti dinlənildi, onları maraqlandıran suallara cavablar verildi.

Universitetin rektoru, professor Asəf İsgəndərov "dəyirmi masa"da yekun sözü söylədi. Bildirdi ki, universitetdə kredit sisteminə keçid milli və bəşəri mənəvi dəyərlərə uyğun qurulub.

Hacı Etibar ƏHƏDOV