Xəbər verdiyimiz kimi, 2010-2011-ci tədris ilində I siniflərdə dərs deyəcək ibtidai sinif müəllimləri üçün təlim kursları təşkil etmək məqsədilə  Təhsil Nazirliyi ilə 4 qeyri-hökumət təşkilatı arasında müqavilələr imzalanıb. Həmin təşkilatlardan biri bu məqsədlə keçirilən tenderdə 3 lot üzrə qalib gəlmiş Müasir Təhsil və Tədrisə Yardım Mərkəzidir. Mərkəz tərəfindən 3 lot üzrə 28 təlim mərkəzində 17 nəfər təlimçinin iştirakı ilə 1851 birinci sinif müəlliminin yeni kurikulumların tətbiqi ilə bağlı təlim kurslarından keçirilməsi nəzərdə tutulub. Artıq iyunun üçüncü ongünlüyündən etibarən təlimlərə başlanıb. İlk təlimlər Mərkəzin qalib gəldiyi 1-ci lot üzrə paytaxtın Nizami rayonundakı 220, Xətai rayonundakı 27, Sabunçu rayonundakı 310 və Suraxanı rayonundakı 87 nömrəli orta məktəblərdə yerləşən 4 mərkəzdə iyunun 21-dən 26-dək keçirilib. Bu təlimlərdə 172 nəfər birinci sinif müəllimi iştirak edib. Mərkəzin təlimçilərindən Təranə İsmayılova, Eteri Bəkirova, Afət Allahverdiyeva və başqalarının apardıqları məşğələlərdə ibtidai sinif müəllimləri kurikulumun tətbiqi ilə bağlı pedaqoji bacarıqlarını, fənn üzrə biliklərini artırıb, müasir təlim metodları ilə işləmək bacarıqlarına yiyələniblər. Kursları başa vuran müəllimlərə sertifikatlar təqdim olunub. 

Y.ƏLİYEV