Qarsdakı Qafqaz Universitetinin rektoru Abamüslüm Güvənin başçılq etdiyi professor-müəllim heyəti Azərbaycanın Qarsdakı baş konsulu Ayxan Süleymanov ilə görüşmüşdür.

Baş konsul Qafqaz Universitetindəki Heydər Əliyev Tədris Mərkəzinin fəaliyyətini yüksək qiymətləndirərək, bu mərkəzin gənc nəslin maariflənməsinə işıq saldığını söyləmişdir. O, Türkiyədə ilk dəfə olaraq bu universitetdə açılmış Azərbaycan dili və ədəbiyyatı kafedrasının fəaliyyətini də yüksək qiymətləndirmiş, diplomatik nümayəndəliyimizin bundan sonra da Qafqaz Universitetinin ölkəmizdəki ali təhsil ocaqları ilə əməkdaşlığında fəal iştirak edəcəyini bildirmişdir.

Abamüslüm Güvən demişdir ki, ulu öndər, türk tarixinin ən böyük şəxsiyyətlərindən biri olan Heydər Əliyev universitetin fəxri doktoru olmuşdur. Azərbaycan Prezidenti İlham Əliyev də iki il əvvəl Heydər Əliyev Tədris Mərkəzini ziyarət etmişdir. Bu mərkəz Heydər Əliyev Fondunun dəstəyi ilə 2007-ci ildə açılıb və uğurla fəaliyyət göstərir.  Fond  bu  təhsil  ocağına lazımi avadanlıq və əyani vəsaitlər də hədiyyə etmişdir.

AzərTAc