Kəlbəcər rayon 37 nömrəli əsas məktəbin ingilis dili müəllimi Vüqar Rzayev ona Azərbaycan dili və ədəbiyyat fənnindən dərslərin verilməməsi barədə müxtəlif idarə və təşkilatlara ərizələr ünvanlayıb. Surəti bizim redaksiyaya da daxil olan həmin ərizələrdən birində Vüqar müəllim ona qarşı olan haqsızlıqlardan bəhs edir və direktorun cəzalandırılmasını istəyir.

Doğrusu, Vüqar müəllimin labirintə bənzəyən bu əcaib-qəraib ərizəsini höccələyə-höccələyə düz 7 dəfə oxusaq da, bir çox suallara cavab tapa bilmədik.

Birincisi, öyrənmək istəyirdik ki, Vüqar müəllim hansı rayonun ərazisində yaşayır. O, ərizəsində yazır: "Biz çələbixan köçkünlər qəsəbəsində məskunlaşmışıq və Kəlbəcər məktəbində işləyirik". Daha sonra öyrənmək istədim ki, görəsən o, ali təhsillidirmi, hansı institutu, universiteti və ya texnikumu bitirib? Görəsən, neçə ildir ingilis dilindən dərs deyir? Neçə saat dərs yükü var ki, hələ üstəlik Azərbaycan dili və ədəbiyyat fənnindən də dərs demək istəyir?

Bütün bunlar bir yana, diqqətimizi daha çox cəlb edən ərizənin müəllim adına yaraşmayan dərəcədə savadsız yazılması oldu.

Vüqar müəllim cəmi-cümlətanı iki vərəqlik ərizəsində düz 28 orfoqrafik və üslub səhvinə yol verib. Səhvlərin çoxluğunu nəzərə alaraq onları sadalamağı lazım bilmirik. Ancaq fikirləşirik ki, görəsən bu savadla şagirdlərə o, Azərbaycan dili və ədəbiyyat fənnini necə tədris edə bilər? ümumiyyətlə, o, əgər ingilis dilini də şagirdlərinə belə öyrədirsə, vay o şagirdlərin halına. Görəsən, belə savadla Vüqar müəllimin nəinki əlavə dərs saatı tələb etməyə, ümumiyyətlə, onun dərs deməyə haqqı varmı?

Yəqin ki, bu suallara aidiyyəti təşkilatlar cavab tapacaq. 

ƏDALƏT