Şamaxıda Yaponiya hökumətinin vəsaiti hesabına tikilmiş yeni məktəb binası istifadəyə verildi

İyunun 23-də Şamaxı şəhərindəki İnşaatçılar qəsəbəsində Yaponiya hökumətinin "Ot kökləri və insan təhlükəsizliyi" qrant proqramının vəsaiti hesabına inşa edilmiş 200 şagird yeri olan orta məktəb binasının açılışı olmuşdur. Mərasimdə Yaponiyanın Azərbaycandakı səfiri Masamutsu Oki iştirak etmişdir.

Qəsəbə sakinləri, müəllimlər və məktəblilər qonağı hörmətlə, gül dəstələri ilə qarşılamışlar.

Səfir səmimi münasibət üçün təşəkkürünü bildirmiş, yeni təhsil ocağının istifadəyə verilməsi münasibətilə mərasim iştirakçılarını təbrik etmişdir. Şamaxıya ilk dəfə gəldiyini söyləyən diplomat şəhərin özünəməxsus gözəlliyindən, insanların mehribanlığı və qonaqpərvərliyindən məmnunluğunu bildirmişdir. Yeni məktəb binasının burada Yaponiya hökuməti tərəfindən 2-ci qrant vəsaiti hesabına tikildiyini qeyd edən natiq 2001-ci ildə Şamaxı şəhər orta internat məktəb binasının da Yaponiya vəsaiti hesabına əsaslı təmir edildiyini diqqətə çatdırmışdır. çıxışının sonunda qonaq demişdir ki, yapon xalqı öz ölkəsini Günəşin doğduğu yer adlandırır. Sizlərə Günəş kimi işıqlı gələcək, uğurlu təhsil arzulayıram. Rayon icra hakimiyyətinin başçısı Nazim İsmayılov Azərbaycan ilə Yaponiya arasında dostluq və əməkdaşlığın yüksək səviyyədə olduğunu, əlaqələrimizin getdikcə dərinləşdiyini diqqətə çatdırmış, bunu əsası ulu öndərimiz Heydər Əliyev tərəfindən qoyulan və Prezident İlham Əliyevin uğurla davam etdirdiyi daxili və xarici siyasətin məntiqi nəticəsi kimi dəyərləndirmişdir. ölkəmizdə son illər təhsil sahəsində, ümumən sosial-iqtisadi sahədə həyata keçirilən irimiqyaslı layihələrdən, qazanılan uğurlardan bəhs edən icra hakimiyyətinin başçısı qədim tarixi olan Şamaxıda görülən işlərdən də ətraflı bəhs etmişdir. Natiq qrant layihəsinə görə sakinlər adından Yaponiya hökumətinə, səfir Masamutsu Okiyə təşəkkürünü bildirmişdir.

Səfir və icra hakimiyyətinin başçısı açılışı bildirən rəmzi lenti kəsmiş, qonaqlar sinif otaqlarını gəzmiş, məktəblilər üçün yaradılan şəraitlə tanış olmuşlar. Açılış mərasimindən sonra səfir Şamaxı şəhəri ilə tanış olmuşdur. Tamamlama işlərinin aparıldığı Heydər Əliyev adına parkı gəzən qonaqlar burada Heydər Əliyev muzeyinə baxmışlar. Milli memarlıq üslubu saxlanılmaqla inşa edilən ikimərtəbəli muzey qonaqlarda xoş təəssürat yaratmışdır. Nazim İsmayılov zövqlə tərtib edilmiş ayrı-ayrı eksponatlar, nadir fotoşəkillər barədə məlumat vermişdir.

AzərTAc

Salyanın Qardili və Təzəkənd kəndlərində yeni məktəb binası tikilmişdir

Salyanın Qardili kəndində 260, Təzəkənd kəndində isə 140 şagird yerlik yeni məktəb binaları tikilmişdir.

Sentyabrın 15-dək istifadəyə veriləcək bu təhsil ocaqlarında tədrisi müasir tələblər səviyyəsində təşkil etmək üçün bütün zəruri şərait yaradılacaqdır.

Xatırladaq ki, rayonun 1 nömrəli orta məktəbi Heydər Əliyev Fondunun təşəbbüsü ilə əsaslı təmir olunur, Yeni Uluxanlı kəndində dövlət vəsaiti ilə 200 şagird yerlik orta məktəb tikilir. Yerli bələdiyyələr isə "Bir bələdiyyə, bir sinif otağı" layihəsinin icrasına başlamışlar. Layihələrə əsasən bu il rayon məktəblərinin birinci siniflərində oxuyacaq şagirdlərin istifadəsinə yüksək səviyyədə təmir olunmuş 40 sinif otağı veriləcəkdir.

AzərTAc

İnternat məktəb dərs ilini uğurla başa vurub

ölkəmizdə fəaliyyət göstərən internat tipli tədris ocaqlarından biri olan kar uşaqlar üçün 3 nömrəli respublika internat məktəbində son illər intizam zəifləmiş, təlim-tərbiyə işinin keyfiyyəti aşağı düşmüşdü. Şagirdlər məktəbdən yayınır, müəllim və tərbiyəçilər işlərinə məsuliyyətlə yanaşmırdılar.

Məktəbin və pedaqoji kollektivin işgüzar, bacarıqlı, qayğıkeş bir rəhbərə ehtiyacı vardı. 2007-ci ilin iyununda məktəbə direktor təyin olunan Bahar Kərimova ilk günlərdən internatda tədris intizamını möhkəmləndirmək, əlverişli təlim mühiti yaratmaq istiqamətində fəaliyyətə başladı. Məktəbi yeni tədris ilinə hazırlamaq məqsədi ilə təmir işlərinə başlandı. Sinif və yataq otaqları, dəhlizlər təmir edildi. Şagirdlər üçün yeni çarpayılar, yataq dəstləri alındı. Yararsız hala düşən qapı və pəncərələr yeniləri ilə əvəz olundu.

Təlim-tərbiyənin keyfiyyətinin yüksəldilməsi üçün də bir çox işlər görüldü. İlk növbədə, müəllimlər ixtisaslarına uyğun dərs saatları, tərbiyəçilər isə tərbiyəçilik vahidləri ilə təmin edildilər. Məktəbdaxili nəzarət gücləndirildi. Metodbirləşmələrin işi canlandırıldı. İnternat məktəbdə qarşılıqlı dərs dinləmələr, "açıq dərs"lər keçirilməyə başlandı. Dinlənilən dərslər geniş müzakirə olunur və müəllimlərə köməkliklər göstərilir. Məktəbdə kompüter otağı yaradılmışdır. Şagirdlər burada informatika dərslərini keçməklə yanaşı, asudə vaxtlarında kompüterdən istifadə edirlər.

Dərsləri maraqlı qurmaq üçün müəllimlər əyaniliyə üstünlük verir və lazımi vəsaitlər hazırlayırlar. Bayram və tarixi günlər təntənə ilə qeyd edilir, müntəzəm olaraq mədəni-kütləvi tədbirlər keçirilir, vaxtaşırı şəhərin görməli yerlərinə gəzintilər təşkil olunur.

Şagirdlərin asudə vaxtlarının səmərəli təşkilində, onların istedad və qabiliyyətlərinin inkişafında mühüm rol oynayan dərnəklərin işinə xüsusi nəzarət edilir. Bacarıqlı və qabiliyyətli şagirdlər dərnəklərə cəlb olunmuşlar. Məktəbin "Zirvə" futbol komandası əlillər arasında keçirilən yarışda II yerə çıxmışdır.

Rəsm, "Bacarıqlı əllər" dərnəklərinin üzvlərinin əl işləri respublika üzrə keçirilən sərgidə nümayiş etdirilmiş, burada yer tutan şagirdlər mükafatlandırılmışlar.

Görülən işlər tezliklə öz bəhrəsini vermiş, internat məktəb dərs ilini uğurla başa vurmuşdur.

Y.ƏLİYEV