ötən tədris ili nə ilə yadda qaldı?

Ali və orta ixtisas təhsili sahəsində son bir ilin hesabatı

2007-2008-ci tədris ili respublikanın ali və orta ixtisas təhsili sahəsi üçün də uğurlu olmuşdur. Tədris ili ərzində fəaliyyət göstərmiş 49 dövlət və qeyri-dövlət ali təhsil müəssisəsində 130430 tələbə təhsil almış, 14467  nəfər professor-müəllim onların təlim-tərbiyəsi ilə məşğul olmuşdur.

Başa çatdırılan tədris ilində ölkəmizdə istehsal proseslərinin genişləndirilməsi, iqtisadiyyatımızın sürətli inkişafı və yeni iş yerlərinin açılması ilə əlaqədar olaraq mövcud istiqamətlərin və ixtisasların siyahısına yeni ixtisasların əlavə olunması və bəzi ali məktəblərdə yeni açılmış ixtisaslar üzrə Dövlət təhsil standartlarının hazırlanması işi davam etdirilmişdir.

Semestr və yekun imtahan sessiyalarının təşkili və gedişi, əvvəlki illərdə olduğu kimi, 2007-2008-ci tədris ilində də diqqət mərkəzində saxlanılmışdır. Belə ki, qış imtahan sessiyası dövründə nazirlikdə Mərkəzi Operativ Qərargah (MOQ), "Qaynar xətt", ali və orta ixtisas təhsili müəssisələrində müvafiq qərargahlar fəaliyyət göstərmiş, tələbələrin biliyinin qiymətləndirilməsində obyektivliyin təmin olunması, yol verilmiş neqativ halların aradan qaldırılması istiqamətində müəyyən müsbət işlər görülmüşdür.

Ali təhsil müəssisələrində tələbələrin biliyinin çoxballı sistemlə qiymətləndirilməsi üzrə aparılan eksperimentin nəticələrinin yekun təhlili aparılmış, bu sistem kredit sisteminə keçmək üçün bir mərhələ kimi qiymətləndirilmişdir.

Azərbaycan Respublikası Təhsil Nazirliyinin 16 yanvar 2006-cı il tarixli, 15 nömrəli əmri ilə təsdiq olunmuş "Azərbaycan Respublikasının ali təhsil sistemində 2006-2010-cu illərdə Boloniya Bəyannaməsinin müddəalarının həyata keçirilməsi üçün tədbirlər planı"na uyğun olaraq ikipilləli ali təhsil sisteminin inkişaf etdirilməsi, ali təhsildə kredit sisteminə keçilməsi, respublikada ali təhsil haqqında bakalavr diplomuna əlavənin Avropa ölkələrinin ali təhsil haqqında verilən diplomların əlavələrinə uyğunlaşdırılması, xaricdə və Azərbaycanda verilən diplomların Boloniya prosesinə qoşulan ölkələrdə tanınması, Boloniya Bəyannaməsində başlıca yer tutan kredit sisteminə tətbiqi ilə bağlı eksperiment aparılan ixtisaslar üzrə 2006-2007-ci tədris ilinin qış imtahan sessiyasının nəticələri təhlil edilmiş, "Ali təhsil müəssisələrində kredit sistemi ilə tədrisin təşkili barədə nümunəvi əsasnamə"də müvafiq dəyişikliklər aparılmışdır.

Azərbaycan Respublikası Təhsil Nazirliyinin kollegiya qərarının icrasını təmin etmək məqsədilə nazirliyin 19 aprel 2007-ci il tarixli, 340 nömrəli əmrinə müvafiq olaraq 2007-2008-ci tədris ilindən ali məktəblərdə tədrisin təşkilində kredit sisteminin tətbiqi ilə bağlı eksperimentin əhatə dairəsinin genişləndirilmiş, kredit sistemi tətbiq olunan ali məktəblərin sayı 21-ə çatdırılmışdır.

Ali təhsil sistemində bizi düşündürən ciddi problemlərdən biri də müəllim hazırlığı ilə bağlıdır.

Bununla əlaqədar olaraq Azərbaycan Respublikası Nazirlər Kabinetinin 20 iyun 2007-ci il tarixli, 102 nömrəli qərarı ilə "Azərbaycan Respublikasında fasiləsiz pedaqoji təhsil və müəllim hazırlığının konsepsiya və strategiyası" təsdiq edilmiş, "Müəllim hazırlığı" alt-komponenti çərçivəsində təhsilin əsasları fənni üzrə kurrikulum və dərsliyin, habelə "İbtidai sinif müəllimi hazırlığı"nı təmin edən kurrikulumların layihələri hazırlanmışdır.

2008-ci ilin martından başlayaraq ali məktəblərdə istehsal təcrübəsinin, təlim prosesinin tədris-metodiki sənədlərlə təminatının, magistratura pilləsində və qiyabi şöbədə tədrisin təşkilinin və kredit sisteminin tətbiqinin monitorinqi keçirilmişdir.

Azərbaycan Respublikası Prezidentinin sərəncamına uyğun olaraq "2008-2012-ci illərdə Azərbaycan Respublikasının ali təhsil sistemində islahatlar üzrə Dövlət Proqramı"nın, eləcə də "Ali təhsilin bakalavr pilləsində ixtisasların siyahısı"nın layihələri hazırlanmış, təsdiqə təqdim olunmuşdur.

Bununla yanaşı, "Azərbaycan Respublikasında ali və orta ixtisas musiqi təhsilinin inkişaf Proqramı (2008-2012-ci illər)" hazırlanmışdır.

2007-2008-ci tədris ili ali təhsil üzrə beynəlxalq və milli konfrans və seminarlarla zəngin olmuşdur. 2008-ci il aprelin 10-da Azərbaycan Dillər Universitetində "Təhsildə keyfiyyətin təminatı: tələblər və zərurətlər" mövzusunda beynəlxalq konfrans, mayın 26-27-də "Boloniya prosesinin inkişafının əsas istiqamətləri" mövzusunda milli seminar keçirilmişdir.

2007-2008-ci tədris ili respublikamızın orta ixtisas təhsili sahəsində də uğurlu illərdən biri kimi qeyd oluna bilər. Belə ki, yola saldığımız dərs ilində orta ixtisas məktəbləri tələbələrinin qış imtahan sessiyasına görə bilik keyfiyyətinin göstəricisi 58,7 faiz, müvəffəqiyyət faizi isə 87,4 faiz olmuşdur.

Orta ixtisas məktəblərindən Azərbaycan Maliyyə-İqtisad Kolleci, Göyçay Dövlət İdarəetmə və Texnologiya Kolleci, Bakı Dövlət İdarəetmə və Texnologiya Kolleci, Sumqayıt Dövlət Texniki Kolleci akkreditasiya olunmuşdur.

Orta ixtisas məktəblərində tələbə biliyinin qiymətləndirilməsinin çoxballı sisteminə keçid üzrə normativ sənədlər hazırlanıb müzakirəyə təqdim olunmuşdur. İki orta ixtisas məktəbində bir ixtisas üzrə semestr imtahanlarının eksperiment qaydasında test üsulu ilə təşkilinə başlanılmışdır.

Ali və orta ixtisas təhsili sistemində istehsalat (pedaqoji) təcrübəsinin təşkili, qiyabi formada təhsil alanların tədrisinin təşkili məsələləri öyrənilib müvafiq normativ sənədlər hazırlanmışdır.

Mütəxəssis hazırlığının ixtisas strukturu yeniləşdirilmiş, hər bir sahə üzrə inkişaf proqramlarının layihəsi hazırlanmışdır.

İlham MUSTAFAYEV,

Təhsil Nazirliyinin Ali və orta ixtisas

təhsili şöbəsinin müdiri