Təhsil müəssisələrində qaz cihazlarından istifadə haqqında

Azərbaycan Respublikası təhsil nazirinin əmri

Azərbaycan Respublikası Nazirlər Kabinetində ölkə ərazisində son zamanlar yaşayış evlərində və istehsalat sahələrində qaz sızması ilə əlaqədar baş vermiş bədbəxt hadisələrin qarşısının alınması üzrə təxirəsalınmaz tədbirlərin görülməsi barədə 29 yanvar 2009-cu il tarixində müşavirə keçirilmişdir. Müşavirədə qazanxanaları olmayan məktəblərdə, məktəbəqədər müəssisələrdə qazdan istifadəyə yol verildiyi və bununla əlaqədar Fövqəladə Hallar Nazirliyi, Sənaye və Energetika Nazirliyi və Təhsil Nazirliyi tərəfindən birgə araşdırmaların aparılmasının və belə halların aradan qaldırılmasının, qısa müddət ərzində bu növ obyektlərin tikinti norma və qaydalarının tələblərinə riayət edilməklə istilik sistemləri və qızdırıcıları ilə təmin olunmasının vacibliyi qeyd edilmişdir.

Qərara alınmışdır ki, Fövqəladə Hallar Nazirliyinin rəhbərliyi altında, Sənaye və Energetika Nazirliyi, "Azəriqaz" Səhmdar Cəmiyyəti, şəhər, rayon icra hakimiyyətləri, Təhsil Nazirliyi ilə birlikdə istifadəsi mümkün olmayan, binaların qızdırılması üçün qazdan istifadə olunan məktəb və məktəbəqədər müəssisələrin və digər obyektlərin müəyyənləşdirilməsi üçün birgə komissiya yaradaraq araşdırmalar aparılsın, tikinti norma və qaydalarının tələblərinə cavab verməyən hallar müəyyənləşdirildikdə onların qarşısı qəti şəkildə alınsın. Təhsil Nazirliyi sistemində qazdan istifadə ilə əlaqədar nəzarət funksiyalarını həyata keçirən əməkdaşların məsuliyyətinin artırılması üçün zəruri tədbirlər görülsün.

Qeyd olunanları nəzərə alaraq

ƏMR EDİRƏM:

1. Nazirliyin tabeliyində olan müəssisələrin, Bakı Şəhəri üzrə Təhsil İdarəsinin, rayon (şəhər) təhsil şöbələrinin rəhbərlərinə tapşırılsın ki, qısa müddət ərzində təhsil müəssisələrində istifadə edilən qaz cihazlarına baxış keçirilsin, aşkara çıxarılan pozuntuların aradan qaldırılması üçün qəti tədbirlər görülsün. Bu zaman zəruri hallarda Fövqəladə Hallar Nazirliyinin müvafiq bölmələrinin, eləcə də digər aidiyyəti dövlət orqanlarının texniki, məsləhət və başqa yardımından istifadə edilsin. Görülən işlərin nəticəsi barədə qısa müddətdə Təhsil Nazirliyinə məlumat verilsin. Təhsil müəssisələrinin rəhbərləri xüsusi araşdırmalar zamanı Fövqəladə Hallar Nazirliyinə və digər aidiyyəti qurumların mütəxəssislərinə zəruri şərait yaratsınlar.

2. Təhsil Nazirliyinin nəzdindəki Əsaslı Tikinti İdarəsi (A.Dəmirov) nazirliyin xətti ilə istifadəyə verilən, əsaslı təmir edilən, istilik sistemi dəyişdirilən təhsil müəssisələrində istilik sistemlərinin tikinti norma və qaydalarının tələblərinə cavab verməsi vəziyyətini araşdırsın və bu barədə Təhsil Nazirliyinə məlumat versin.

3. İqtisadiyyat şöbəsi (H.Zeynalov) daxil olan məlumatları ümumiləşdirsin və Nazirlər Kabinetinə təqdim edilmək üçün hazırlasın.

4. ümumi şöbə (İ.Mirzəyev) bu əmrin qısa zamanda yerlərə çatdırılmasını təmin etsin.

5. Əmrin icrasına nəzarəti özümdə saxlayıram.

Misir MƏRDANOV,

Azərbaycan Respublikasının təhsil naziri

9 fevral 2009-cu il