Məktəbəqədər təhsil müəssisələri üçün hazırlanmış təlim vəsaitlərinin təqdimatı oldu

Fevralın 10-da "Europe Hotel"də ölkə Prezidenti cənab İlham Əliyevin təsdiq etdiyi "Azərbaycan Respublikasında məktəbəqədər təhsilin yeniləşdirilməsi üzrə Dövlət Proqramı (2007-2010-cu illər)" çərçivəsində Təhsil Nazirliyi və "çaşıoğlu" şirkətlərinin birgə layihəsi əsasında məktəbəqədər təhsil müəssisələri üçün hazırlanmış təlim vəsaitlərinin təqdimat mərasimi keçirildi.

Təhsil Nazirliyinin məsul şəxslərinin, struktur bölmə rəhbərlərinin, millət vəkillərinin, müvafiq sahə üzrə tanınmış alim və mütəxəssislərin, məktəbəqədər təhsil müəssisələri rəhbərlərinin, "çaşıoğlu" şirkətlərinin əməkdaşlarının və KİV nümayəndələrinin iştirak etdiyi mərasim açıq elan olunduqdan sonra çıxış üçün söz təhsil naziri Misir Mərdanova verildi.

Dəvəti qəbul edib tədbirdə iştirak edən bütün qonaqlara öz təşəkkürünü bildirən təhsil naziri bu gün onların xalqımızın həyatında çox böyük əhəmiyyəti olan bir hadisənin şahidi olduqlarını bildirdi. çıxışına davam edən Misir Mərdanov respublikamızda məktəbəqədər təhsilin real vəziyyəti, əsas problemlər və bu sahə ilə bağlı həlli vacib olan məsələlər haqqında məlumat verdi. Məktəbəqədər təhsil müəssisələrində, eləcə də ailələrdə uşaqlarla aparılan təlim-tərbiyə işlərinin  böyük əhəmiyyət kəsb etdiyini deyən nazir qeyd etdi ki, məhz məktəbəqədərki dövr uşağın psixi inkişafı və şəxsiyyətinin formalaşmasında mühüm rol oynayır. Buna görə də dünyanın əksər ölkələrinin təhsil sistemində məktəbəqədər təhsil müəssisələrinin xüsusi yeri var. Misir Mərdanov belə ölkələrin qabaqcıl təcrübəsindən söz açdı və bu təcrübədən yararlanmağın zəruriliyini vurğuladı.

ölkəmizdə uzun illərdir ki, bu sahənin diqqətdən kənarda qaldığını deyən nazir bildirdi ki, son iki ildə "Azərbaycan Respublikasında məktəbəqədər təhsilin yeniləşdirilməsi üzrə Dövlət Proqramı (2007-2010-cu illər)" çərçivəsində bir çox mühüm işlər görülmüş və tədbirlər həyata keçirilmişdir. Bunlardan ən önəmlisi məhz bu gün təqdim olunan təlim vəsaitləridir. O, bir il ərzində hazırlanmış bu materialların artıq məktəbəqədər təhsil müəssisələrinə çatdırıldığını, tərbiyəçilər və uşaqlar tərəfindən çox bəyənildiyini qeyd etdi.

Təhsil naziri Misir Mərdanov dövlətimizin hədiyyəsi olan bu vəsaitlər toplusunun uşaqları həm məktəbə, həm də həyata hazırlamaq sahəsində böyük xidməti olacağına əminliyini ifadə edərək layihədə əməyi olan  hər kəsə, alim və mütəxəssislərə, eləcə də "çaşıoğlu" şirkətlər qrupunun əməkdaşlarına təşəkkürünü bildirdi.

Mərasimdə daha sonra təqdim olunan təlim materialları-test kitabları, metodik vəsaitlər, oyunlar, plakat dəstləri, nağıllar, oyun diskləri, səsli və plakat nağıllar haqqında hazırlanmış reklam çarxı nümayiş etdirildi.

Tədbirdə çıxış edən millət vəkilləri Şəmsəddin Hacıyev, Qənirə Paşayeva, Nizami Cəfərov, Gülər Əhmədova, Ailə, Qadın və Uşaq Problemləri üzrə Dövlət Komitəsinin nümayəndəsi Sədaqət Qəhrəmanova, Təhsil Nazirliyinin Məktəbəqədər təhsil sektorunun müdiri Nərminə Alnağıyeva, metodist Südabə Abdullayeva, 134 nömrəli Beynəlxalq Təhsil Kompleksinin direktoru Sara Xanlarova, bir sıra təlim vəsaitlərinin müəllifləri  Laləzar Cəfərova və Aygün Məcidova , Binəqədi rayonundakı 266 nömrəli uşaq bağçasının müdiri Dilbər Səmədova vəsaitlərin çox gözəl tərtib olunduğunu və yüksək keyfiyyətlə hazırlandığını deyərək  onların kiçikyaşlı uşaqların tərbiyəsində əhəmiyyətli rol oynayacağına inandıqlarını bildirdilər, bir sıra məsələlərlə bağlı rəy və təkliflərini səsləndirdilər.

Tədbirin rəsmi hissəsindən sonra Nizami Rayon Uşaq Yaradıcılıq Mərkəzinin yetirmələri xalq oyunları və mahnılardan ibarət bədii proqramla çıxış etdilər.

Hicran ƏKBƏROVA