"Məktəb liderliyinin inkişafı" mövzusunda seminar keçirildi

Akademik Zərifə Əliyeva adına məktəbdə "Məktəb liderliyinin inkişafı" mövzusunda Azərbaycan Respublikasının Təhsil Nazirliyi ilə Müasir Təhsil və Tədrisə Yardım Mərkəzinin  birgə keçirdikləri ikigünlük seminar fevralın 6-da öz işinə başladı.

Seminarı Müasir Təhsil və Tədrisə Yardım Mərkəzinin proqramlar üzrə direktoru Elmina Kazımzadə açaraq məktəb liderliyinin inkişafı ilə bağlı öz fikir və mülahizələrini iştirakçılarla bölüşdü, məktəb direktorlarının üzərinə düşən vəzifələrə toxundu.  Qeyd etdi ki, rəhbərlik etdiyi qurumun Açıq Cəmiyyət İnstitutunun maliyyə dəstəyi ilə həyata keçirdiyi "Məktəb liderliyi" layihəsi məktəb direktorlarının liderlik keyfiyyətlərinin artırılması, məktəb liderliyini inkişaf etdirməklə təhsildə hesabatlılığın və şəffaflığın inkişaf etdirilməsi məqsədini daşıyır.

Sonra çıxış üçün söz alan ABŞ-ın Cənubi Konnektikut Universitetinin professoru Ketrin Maqno məktəb liderliyinin inkişafından, bu sahədə dünya təcrübəsindən söz açdı.

Seminarda "liderlik nədir", "liderlik və idarəetmə", "liderliyin növü", "liderlik və dəyişiklik" anlayışları ətrafında iştirakçılar tərəfindən geniş müzakirələr və fikir mübadiləsi aparıldı.  T.İsmayılov adına "İntellekt" məktəb-liseyin direktoru Ceyran Kuliyeva, Sumqayıt şəhərindəki 11 nömrəli məktəbin direktoru Ofelya Babayeva, Bakıdakı 220 nömrəli məktəbin direktoru Almaz Əsgərova rəhbərlik etdikləri təhsil müəssisələrində görülmüş işlərlə bağlı təqdimatla çıxış etdilər.

Təqdimatlardan sonra seminar iştirakçıları tərəfindən liderlik yanaşmaları mövzusunda müzakirələr davam etdirildi.

Seminarın fevralın 7-də keçirilən ikinci iş günündə iştirak edən təhsil naziri Misir Mərdanov  mövzunun aktuallığına toxunaraq burada söylənilənlərin məktəb direktorları üçün mühüm əhəmiyyət kəsb etdiyini bildirdi. Təhsil naziri "Məktəb liderliyinin inkişafı" mövzusunda  məruzə-təqdimatla çıxış etdi. Cəmiyyətin inkişafında təhsilin rolundan söz açan nazir  müasir dünyada hər bir ölkənin uğurlu  gələcəyinin  həmin ölkədə təhsilin səviyyəsi ilə müəyyən olunduğunu söylədi. Təhsil naziri qeyd etdi ki, təbii sərvətlərin bolluğu dövlətin inkişafının əsas göstəricisi deyil,başlıcası  bu sərvətlərin cəmiyyətin  hərəkətverici qüvvəsi olan insan kapitalına çevrilməsini təmin etməkdir.Təsadüfi deyil ki, ABŞ, Yaponiya, Cənubi Koreya, Finlandiya və digər inkişaf etmiş ölkələr malik olduqları maddi resurslardan daha çox təhsil sisteminin yetişdirdiyi insan kapitalından böyük gəlirlər əldə etmişlər. Bu ölkələrdə inkişafa təsir göstərən amillər içərisində təhsilin çəkisi hiss olunacaq dərəcədə yüksəkdir və təxminən 70 faiz təşkil edir.

Təhsil naziri son illərdə  Azərbaycanda da insan kapitalının formalaşdırılması və davamlı inkişafın dövlətin əsas prioritetlərindən biri elan olunmaqla, təhsil sektoruna vəsait qoyuluşunun xeyli artdığını bildirdi. ölkə başçısı cənab İlham Əliyev tərəfindən təhsilə xüsusi diqqət və qayğı göstərildiyini qeyd edən nazir respublikamızda bu sahədə görülən işlərdən danışdı. Təhsilə ayrılan büdcə vəsaitinin, onun inkişafına yonəldilmiş investisiya  xərclərinin ilbəil artdığını dedi. Ekranda təhsilin maliyyəşdirilməsinin inkişaf dinamikasını göstərən cədvəllər, statistik rəqəmlər nümayiş olundu.

ölkədə təhsillə bağlı 14 inkişafyönümlü Dövlət Proqramının  həyata keçirildiyini söyləyən nazir bununla bağlı görülən işlər, həyata keçirilən tədbirlər, əldə olunan nailiyyətlər, perspektivlər haqqında ətraflı məlumat verdi.

Təhsil müəssisələrimizdə əlverişli təlim mühitinin yarandığını söyləyən nazir Misir Mərdanov  təhsil işçilərinin üzərinə düşən vəzifələrə toxundu. Təhsilin keyfiyyətindən danışan  nazir  bildirdi ki, təhsilə yönəldilən maliyyə  resurslarının ildən-ilə artması, təhsil infrastrukturunun müasir standartlara uyğunlaşdırılması, məzmun və qiymətləndirmə islahatları, dərsliklərlə, İKT ilə təminat sahəsində əhəmiyyətli nailiyyətlər, çoxsaylı proqram və layihələrin həyata keçirilməsi son nəticədə keyfiyyət göstəricilərinin də adekvat olaraq  yuksəlməsinə gətirib çıxarmalıdır. Hazırda təhsilin keyfiyyətinə təsir edən əsas amillərin və onların təsir imkanlarının düzgün müəyyənləşdirilməsi vacib məsələlərdəndir. Nazir təhsilin keyfiyyətinə təsir edən əsas amilləri qeyd edərək onların hər biri haqqında ətraflı danışdı.

Məruzə-təqdimatda məktəb direktorları ilə bağlı problemlər, onların təyinatı sahəsindəki yeniliklər  diqqətə çatdırıldı, həmçinin bu vəzifədə işləyənlərə verilən tələblər də sadalandı. "Təhsil Sektorunun İnkişafı üzrə II Layihə (2009-2014)" cərçivəsində  bununla əlaqədar nəzərdə tutulan tədbirlər haqqında danışıldı, qarşıda duran perspektivlər qeyd olundu. Təhsil müəssisələrinə rəhbərlik edənlərin öz işlərinə daha məsuliyyətlə yanaşmalarının, yüksək biliyə, idarəçilik və hərtərəfli dünyagörüşünə malik olmalarının vacibliyinə toxunan nazir bununla bağlı seminar iştirakçılarına bir sıra tövsiyələr verdi, mövzu ilə əlaqədar digər mühüm məsələlərdən də geniş söz açaraq  öz fikir və mülahizələrini söylədi.

Məruzə-təqdimat başa çatdıqdan sonra nazir Misir Mərdanov seminar iştirakçılarını maraqlandıran sualları cavablandırdı.

Seminarda   qeyri-hökumət təşkilatları ilə əməkdaşlıqdan, əldə olunan təcrübədən söz açıldı. İştirakçılara Müasir Təhsil və Tədrisə Yardım Mərkəzinin monitorinq araşdırmaları barədə məlumatları çatdırıldı. Sonda  məktəb direktorları və direktor müavinlərindən  ibarət işçi qrupu yaradıldı, növbəti seminar üçün mövzular müəyyənləşdirildi və məktəb idarəetməsi  ilə bağlı kitabın hazırlanması qərara alındı. 

Samirə HüSEYNQIZI