Heydər Əliyev Fondunun Azərbaycan-Gürcüstan dostluq münasibətlərinə yeni töhfəsi

Gürcüstanın Dmanisi rayonunda kompüter-tədris mərkəzi istifadəyə verildi

İyunun 15-də Heydər Əliyev Fondunun təşəbbüsü ilə Gürcüstanın Dmanisi rayonunda inşa edilmiş kompüter-tədris mərkəzinin binası istifadəyə verilmişdir. Tədbirin iştirakçıları əvvəlcə Tbilisidə ümummilli lider Heydər Əliyevin adını daşıyan parkda ulu öndərin abidəsi önünə əklil və gül dəstələri qoymuş, görkəmli şəxsiyyətin xatirəsini ehtiramla yad etmişlər. Kompüter-tədris mərkəzi binasının açılış mərasimində Azərbaycanın və Gürcüstanın dövlət himnləri səsləndirilmişdir.

Tədbiri Gürcüstanın tanınmış musiqiçisi, bəstəkar Roman Şxiladze açaraq qonaqları təqdim etmişdir. Kvemo Kartli-Borçalı bölgəsinin qubernatoru David Kirkiladze yerli sakinlərin müasir informasiya-kommunikasiya texnologiyalarına daha dərindən yiyələnmələri baxımından belə bir mərkəzin açılmasının əhəmiyyətini vurğulamışdır.

Heydər Əliyev Fondunun icraçı direktoru Anar Ələkbərov tədbir iştirakçılarını Azərbaycanın birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyevanın adından salamlamışdır.

A.Ələkbərov əsasını ümummilli lider Heydər Əliyevin qoyduğu Azərbaycan-Gürcüstan dostluq münasibətlərinin hazırda Prezidentlər İlham Əliyev və Mixail Saakaşvili tərəfindən uğurla inkişaf etdirildiyini, ölkələrimizin birinci xanımları  Mehriban Əliyevanın və Sandra Elizabet Rulofsun da bu əlaqələrə öz töhfələrini verdiklərini demişdir.

A.Ələkbərov Heydər Əliyev Fondunun fəaliyyəti haqqında məlumat verərək demişdir ki, Fond Azərbaycanda və xaricdə təhsil, səhiyyə, mədəniyyət, elm və digər sahələrlə bağlı layihələr hazırlayıb həyata keçirir. Bir neçə ay əvvəl Heydər Əliyev Fondu Pakistanın Müzəffərabad şəhərində qızlar üçün orta məktəb binası istifadəyə vermişdir.

Bildirilmişdir ki, Heydər Əliyev Fondunun prezidenti Mehriban xanım Əliyeva Gürcüstanda yaşayan soydaşlarımızın problemlərini daim diqqət mərkəzində saxlayır. Bu gün istifadəyə verilən kompüter-tədris mərkəzi bu diqqətin bariz nümunəsidir. Bu, Heydər Əliyev Fondunun Gürcüstanla bağlı həyata keçirdiyi sonuncu layihə deyildir. Fond bu istiqamətdə işləri davam etdirəcəkdir.

Azərbaycanın Gürcüstandakı səfiri Namiq Əliyev, Milli Məclisin deputatı Qənirə Paşayeva Prezidentlər İlham Əliyevin və Mixail Saakaşvilinin rəhbərliyi ilə möhkəmlənən Azərbaycan-Gürcüstan dostluq münasibətlərinə Heydər Əliyev Fondunun verdiyi töhfələri qeyd etmişlər. Bugünkü tədbir də ölkələrimiz arasında dostluq münasibətlərinin təzahürüdür.

Gürcüstanın hakim "Vahid Milli Hərəkat" Partiyasının baş katibi, deputat Zurab Melikaşvili, təhsil və elm naziri Giorgi Nodiya mərkəzin açılışına görə Heydər Əliyev Fondunun prezidenti Mehriban xanım Əliyevaya təşəkkür etmiş, Fondla hər cür əməkdaşlığa hazır olduqlarını bildirmişlər.

Mərkəzin açılışını bildirən rəmzi lent kəsildikdən sonra mərasim iştirakçıları bina ilə yaxından tanış olmuşlar.

Təhsilin inkişafına xüsusi diqqət yetirən Heydər Əliyev Fondunun layihəsi çərçivəsində inşasına ötən ilin sonlarında başlanmış bu mərkəzin binası ən müasir tələblərə və standartlara tam cavab verir. İkimərtəbəli binanın foyesində ümummilli lider Heydər Əliyevin böyük portreti asılmışdır. Burada, həmçinin Azərbaycan Prezidenti İlham Əliyevin və Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın fəaliyyətini əks etdirən fotoguşə yaradılmışdır. Müasir tipli istilik sistemi ilə təchiz olunmuş mərkəzin dərs otaqları, iki böyük zalı, kitabxanası, müəllimlər otağı, yardımçı otaqları, yeməkxanası mebel dəstləri və avadanlıqla təmin edilmişdir. Mərkəzin yerləşdiyi küçəyə asfalt döşənmiş, ətrafda yaşıllıq sahəsi salınmışdır.

Mərkəzdəki 70-dən çox kompüterin hamısı birbaşa İnternetə qoşulmuşdur və həm azərbaycanlı, həm də gürcü uşaqlar burada pulsuz kompüter dərsləri keçə biləcəklər. Bununla yanaşı, burada hər iki millətin uşaqları ingilis, azərbaycanlılar gürcü dilini öyrənəcəklər. Mərkəz kütləvi tədbirlərin, seminarların keçirilməsi üçün də əlverişlidir.

Heydər Əliyev Fondu mərkəzi əyani vəsaitlər,  kitablar, dərsliklər, CD və DVD-lərlə təmin etmişdir. Mərkəzlə tanışlıqdan sonra təhsil və elm naziri Giorgi Nodiyaya Heydər Əliyev Fondunun hazırladığı "Qarabağ xanəndələri" musiqi albomu hədiyyə edilmişdir.

Mərasim Azərbaycanın və Gürcüstan incəsənət ustalarının konsert proqramı ilə davam etmişdir.

AzərTAc