Spartakiadaya yekun vuruldu

Ulu öndər Heydər Əliyevin 85 illiyi ilə əlaqədar Azərbaycan Texniki Universitetinin akt zalında ali təhsil müəssisələrinin işçiləri arasında spartakiadanın yekun mərhələsi keçirilmişdir.

Təhsil Nazirliyi və Azərbaycan Təhsil İşçiləri Azad Həmkarlar İttifaqı Respublika Komitəsinin birgə təşkil etdiyi spartakiada 6 idman növünü (voleybol, dama, şahmat, nərd, tennis və futzal) əhatə etmişdir.

Mayın 1-də başlanan spartakiadanın yekun mərhələsinin bağlanışında təhsil nazirinin müavini Elmar Qasımov, Azərbaycan Təhsil İşçiləri Azad Həmkarlar İttifaqı Respublika Komitəsinin sədr müavini Şaiq Əsgərov, spartakiadanın baş hakimi Tofiq Xanəliyev, tələbə idman cəmiyyətlərinin rəhbərləri və digər şəxslər iştirak edirdi.

12 ali məktəbin 286 nəfər təhsil işçisi spartakiadada öz bacarığını nümayiş etdirmişdir.

Spartakiadanın bağlanış mərasimində çıxış edən nazir müavini Elmar Qasımov ümummilli lider Heydər Əliyevin və onun siyasi kursunun layiqli davamçısı, ölkə Prezidenti İlham Əliyevin bütün sahələrə, o cümlədən təhsilə göstərdikləri qayğıdan söz açdı. Son dövrlərdə təhsil və idmanda qazanılmış uğurlara toxunan nazir müavini keçirilən spartakiadanın əhəmiyyətindən və idmanın kütləviliyini təmin etməkdə onun rolundan danışdı.

Sonra Şaiq Əsgərov çıxış edərək TİAHİ Respublika  Komitəsinin idmanın kütləviliyinə nail olmaq üçün gördüyü işlərdən bəhs etdi. Komitə sədrinin müavini qalibləri təbrik etdi, məğlub olanlara isə ruhdan düşməməyi məsləhət gördü. Tədbirdə digər çıxışlar da oldu.

Sonda Elmar Qasımov və Şaiq Əsgərov qaliblərə diplom, kubok və qiymətli hədiyyələr təqdim etdilər. Spartakiadada ümumi komanda hesabında I yerə Azərbaycan Dillər Universiteti, 2 və 3-cü yerlərə isə müvafiq olaraq Bakı və Sumqayıt Dövlət Universitetlərinin nümayəndələri layiq görülmüşlər.

Fazil İDRİSOĞLU,

foto müəllifindir