Ulu öndər Heydər Əliyevin 85 illiyinə həsr edilmiş elmi-nəzəri konfrans

Lənkəran Dövlət Universitetində ümummilli lider Heydər Əliyevin anadan olmasının 85-ci ildönümünə həsr edilmiş "Heydər Əliyev irsi və Azərbaycanda güclü dövlət, modernləşmiş iqtisadiyyat və azad vətəndaş cəmiyyətinin quruculuğuna dair İlham Əliyev strategiyası" mövzusunda elmi-nəzəri konfrans keçirilmişdir. Konfransdan əvvəl universitetin əməkdaşları və qonaqlar ulu öndər Heydər Əliyevin abidəsi önünə əklillər qoymuş, LDU-nun Heydər Əliyev muzeyi və idarəçilik məktəbində olmuş, ümummilli liderin həyat və fəaliyyətini əks etdirən eksponatlara baxmışlar.

Sonra konfrans öz işinə başlamışdır.

Konfransı açan universitetin rektoru, fizika-riyaziyyat elmləri doktoru, professor Asəf İsgəndərov demişdir ki, ümummilli lider, dahi şəxsiyyət Heydər Əliyevin anadan olmasının 85-ci ildönümünə həsr olunmuş bugünkü konfrans ulu öndərin tükənməz xəzinəsi olan irsini öyrənməklə bu irsin xalqımızın dövlətçilik və tərəqqi tarixində müstəsna əhəmiyyətini bir daha sübut etdi. Azərbaycan dünyanın ən dinamik inkişaf edən ölkəsinə çevrilmiş, təhsilin, elmin, mədəniyyətin tərəqqisində böyük nailiyyətlər əldə etmişdir.

Azərbaycanda iqtisadi potensialı intellektual kapitala çevirmək işində böyük işlər görülür. Möhtərəm Prezidentin Azərbaycanda güclü dövlət, müasirləşmiş iqtisadiyyat və azad vətəndaş cəmiyyəti quruculuğu strategiyası uğurla həyata keçirilir. Rektor sözünə davam edərək bildirmişdir ki, bu gün Azərbaycanda olan siyasi sabitlik, iqtisadi inkişaf, xalqın mənafeyinə xidmət edən islahatlar ölkə rəhbəri cənab İlham Əliyevin adı ilə bağlıdır. ölkədə aparılan böyük quruculuq və abadlıq işləri, infrastruktur layihələrin həyata keçirilməsi, ölkəmizin demokratik dövlətlər birliyinə daha sürətlə inteqrasiyasının təmin edilməsi dövlət başçısı cənab İlham Əliyevin yürütdüyü siyasətin əsas istiqamətlərindəndir.

Lənkəran şəhər icra hakimiyyətinin başçısı Süleyman Mikayılovun konfrans iştirakçılarına təbriki oxunmuşdur.

Milli Məclisin İqtisadiyyat daimi komissiyasının sədri, akademik Ziyad Səmədzadə "Heydər Əliyev irsi və Azərbaycanda güclü dövlət, modernləşmiş iqtisadiyyat və azad vətəndaş cəmiyyətinin quruculuğuna dair İlham Əliyev strategiyası" mövzusunda məruzə etmişdir. Məruzə ətrafında Bakı Dövlət Universiteti ilahiyyat fakültəsinin dekanı, akademik Vasim Məmmədəliyev, Milli Məclisin Elm və təhsil daimi komissiyasının sədr müavini, AMEA-nın müxbir üzvü, professor Bəxtiyar Əliyevin çıxışları dinlənilmişdir.

Məruzə və çıxışlarda qeyd edilmişdir ki, ümummilli lider Heydər Əliyevin zəngin bioqrafiyası, böyük ideya-nəzəri irsi Azərbaycanda yaşayan bütün xalqlar üçün örnək və həyat məktəbidir. Bütün ömrünü xalqa həsr etmiş Heydər Əliyev Azərbaycan dövlətçiliyinin əbədiliyini təmin etmiş, dövlət müstəqilliyinin möhkəmləndirilməsi kimi çox çətin vəzifəni uğurla həll edərək ölkənin hərtərəfli inkişafı və onun iqtisadi cəhətdən güclü dövlətə çevrilməsi üçün etibarlı zəmin yaratmışdır.

Konfransın sonunda Azərbaycan Respublikasının Prezidenti cənab İlham Əliyevə müraciət qəbul edilmişdir.

Konfrans iştirakçıları dövlət başçısı cənab İlham Əliyevin apardığı daxili və xarici siyasətini bəyəndiklərini, ətrafında sıx birləşməklə növbəti Prezident seçkilərində onu yekdilliklə müdafiə edəcəklərini bildirdilər.

Konfransda rayonun elm, təhsil müəssisələrinin və ictimaiyyətin nümayəndələri iştirak edirdilər.

Hacı Etibar ƏHƏDOV,

Lənkəran Dövlət Universiteti Mətbuat və 

informasiya xidmətinin rəhbəri

Böyük ədibin 100 illiyi münasibətilə

Görkəmli yazıçı, tanınmış ədəbiyyatşünas, ictimai xadim Mir Cəlal Paşayevin anadan olmasının 100 illiyi Naxçıvan Dövlət Universitetində təntənə ilə qeyd olunmuşdur.

Yubileylə bağlı keçirilən konfransı giriş sözü ilə açan rektor, akademik İsa Həbibbəyli ölkə Prezidenti İlham Əliyevin "YUNESKO-nun 2008-2009-cu illərdə görkəmli şəxsiyyətlərin və əlamətdar hadisələrin qeyd edilməsi proqramına Azərbaycanla bağlı daxil olmuş yubileylərin keçirilməsi haqqında" 31 yanvar 2008-ci il tarixli sərəncamında yazıçı Mir Cəlal Paşayevin 100 illik yubileyinin təşkili ilə bağlı müddəadan bəhs etmişdir. ölkə başçısının Azərbaycan elminə və mədəniyyətinə yüksək diqqətini vurğulayan rektor məruzəsində professor Mir Cəlal Paşayevin zəngin elmi və ədəbi yaradıcılığından danışmışdır.

Konfransda tədris işləri üzrə prorektor, dosent Hüseyn Həşimli "Professor Mir Cəlal Paşayevin lirikasının yeni janrları", elektron kitabxananın şöbə müdiri, filologiya elmləri namizədi Aypara Behbudova "Mir Cəlalın satirik hekayələrinin sənətkarlıq xüsusiyyətləri", Azərbaycan ədəbiyyatı kafedrasının baş müəllimi Seyfəddin Eyvazov "Mir Cəlal Paşayev-sadəlik və müdriklik" mövzularında məruzə etmişlər. Məruzəçilər ədibin yaradıcılığında nəzərəçarpan XX əsrin milli məfkurəsini, insan xarakterlərinin açıq təqdimini, mövzu rəngarəngliyi və sənətkarlığını yüksək qiymətləndirmiş, onun yetişməkdə olan ədəbi gəncliyə örnək olduğunu bildirmişlər.

Filologiya elmləri doktoru Əbülfəz Quliyev ictimai fikrin inkişafında mühüm xidmətləri olan professor Mir Cəlal Paşayevin Azərbaycan elminə, təhsilinə verdiyi töhfələrdən danışmış, yüksək ixtisaslı mütəxəssislərin hazırlanmasındakı əvəzsiz xidmətlərindən bəhs etmişdir. öz müəllimi haqqında xatirələrini dinləyicilərlə paylaşan natiq, görkəmli alimin nəcib insani keyfiyyətlərindən söz açmışdır.

Konfransdan sonra professor Mir Cəlal Paşayevin əsərlərindən ibarət kitab sərgisi nümayiş etdirilmişdir.

Seyid SURƏ

Yubiley müsabiqəsinin rayon üzrə yekun tədbiri

Bakı Şəhəri üzrə Təhsil İdarəsi və Təhsil İşçiləri Azad Həmkarlar İttifaqı Respublika Komitəsi birlikdə paytaxtın ümumtəhsil məktəblərinin şagirdləri arasında "Biz Heydər Əliyev irsini öyrənirik" mövzusunda yaradıcılıq müsabiqəsi keçirmişdir. Ulu öndərin 85 illik yubileyinə həsr olunmuş müsabiqədə Yasamal rayonunda yerləşən ümumtəhsil məktəblərinin şagirdləri də iştirak etmişlər. Müsabiqə çərçivəsində iştirakçıların əl işlərinə, İnternet layihələrinə və şeir ifalarına baxış olmuşdur.

Aprelin 16-da isə Bakıdakı 20 nömrəli məktəbdə ümummilli liderimiz Heydər Əliyevin anadan olmasının 85 illik yubileyinə həsr edilmiş "Biz Heydər Əliyev irsini öyrənirik" mövzusunda yaradıcılıq müsabiqəsinin rayon üzrə yekun tədbiri keçirildi.

Tədbir iştirakçıları əvvəlcə təhsil ocağının 3-cü mərtəbəsindəki foyedə Yasamal rayonu ərazisində yerləşən bir çox məktəblərin şagirdlərinin və bağça uşaqlarının böyük öndər Heydər Əliyevin 85 illik yubileyinə həsr etdikləri foto-stendlərə, albomlara, müxtəlif materiallardan hazırlanmış əl işlərinə sonsuz maraqla tamaşa etdilər.

Məktəbin akt zalında keçirilən tədbirdə Bakı Şəhəri üzrə Təhsil İdarəsinin müdirinin müavini Məhəbbət Qarabağlı Heydər Əliyev haqqında geniş çıxışında ulu öndərin şəxsiyyətinin böyüklüyündən, Azərbaycan xalqı qarşısındakı tarixi xidmətlərindən, təhsilə, müəllimlərə göstərdiyi qayğıdan bəhs etdi. Heydər Əliyev irsinin öyrənilməsinin zəruriliyini, şagirdlərin Heydər Əliyev nümunəsində tərbiyəsinin, onun keçdiyi həyat yolu haqqında şagirdlərə dərin bilik və ətraflı məlumat verilməsinin vacibliyini vurğuladı.

Sonra tədbirdə YAP Yasamal rayon təşkilatının sədri Fikrət İsmayılov və Yasamal rayon icra hakimiyyətinin şöbə müdiri Rafiq Əzizov da çıxış etdilər. çıxışlarda vurğulandı ki, dünyanın nadir şəxsiyyətlərindən olan Heydər Əliyev hər bir insan üçün həyat nümunəsi, mədəniyyət, intellekt mücəssəməsi, idarəçilik və siyasət məktəbidir. Bu irsin öyrənilməsi və gənc nəslə çatdırılması təhsil işçilərinin, bütövlükdə təlim-tərbiyə müəssisələrinin qarşısında duran ən ümdə vəzifələrdəndir.

Tədbirdə daha sonra rayonun 13, 18, 38, 53, 68, 153, 173 və 199 nömrəli məktəblərin şagirdləri ümummilli lider Heydər Əliyevə həsr olunmuş kompozisiyalarla çıxış etdilər. Şagirdlərin bir-birindən maraqlı, ulu öndərə məhəbbət ruhunda səslənən çıxışları başa çatdıqdan sonra "Biz Heydər Əliyev irsini öyrənirik" müsabiqəsinin qaliblərinə Bakı Şəhəri üzrə Təhsil İdarəsinin və Təhsil İşçiləri Azad Həmkarlar İttifaqı Yasamal Rayon Komitəsinin fəxri fərmanları və mükafatları təqdim olundu.

Ədalət DAŞDƏMİRLİ

"İnsan alverinə qarşı mübarizənin təbliği" mövzusunda konfrans

Aprelin 9-da Azərbaycan Müəllimlər İnstitutu İnsan Alverinə Qarşı Mübarizə İdarəsi ilə birlikdə "İnsan alverinə qarşı mübarizənin təbliği" mövzusunda konfrans keçirdi.

 Tədbirdə İnsan Alverinə Qarşı Mübarizə İdarəsinin bölmə rəisi, polkovnik-leytenant Tahir İsmayılov, AMİ-nin rəhbərliyi, professor-müəllim heyəti və tələbələri iştirak edirdi.

Konfransı giriş sözü ilə institutun rektoru, siyasi elmlər doktoru, professor A. Naxçıvanlı açaraq qloballaşan dünyanın ən geniş yayılmış cinayət növlərindən biri olan insan alverinin müasir dövrdə törətdiyi fəsadlardan və onun qarşısının alınması üçün geniş təbliğat işlərinin aparılmasının vacibliyindən danışdı. Gənclərin bu məsələdə ayıq-sayıq olmalarını, təmiz mənəviyyatlı vətəndaş kimi yetişməyə çalışmalarını tövsiyə etdi.

Sonra Tahir İsmayılov insan alverinin hansı bölgələrdə daha geniş yayılmasından və İnsan Alverinə Qarşı Mübarizə İdarəsinin bu problemlə bağlı apardığı təbliğat işlərindən geniş məruzə ilə çıxış etdi.

İnsan alveri dövrümüzün aktual problemi olduğu üçün onunla bağlı çoxlu sayda suallar yaranır. Elə bu baxımdan da çıxışlardan sonra professor Aqiyə Naxçıvanlı və polkovnik-leytenant Tahir İsmayılov konfrans iştirakçılarının onları narahat edən məsələlər barədə verdikləri çoxsaylı suallarını aydın şəkildə cavablandırdılar.

Tədbirdə xüsusi olaraq vurğulandı ki, mübarizənin əsaslı şəkildə təbliği sağlam insan həyatı üçün mühüm əhəmiyyət kəsb edir.