Təhsil Nazirliyində "Ən yaxşı müəllim" müsabiqəsinin II mərhələsi ilə bağlı müşavirə

Aprelin14-də Təhsil Nazirliyində "Ən yaxşı müəllim" müsabiqəsinin II mərhələsi ilə bağlı müşavirə keçirildi. Tədbirdə təhsil nazirinin müavinləri, nazirliyin müvafiq şöbələrinin və Bakı Şəhəri üzrə Təhsil İdarəsinin rəhbərliyi, təhsil ictimaiyyətinin nümayəndələri, eyni zamanda müsabiqə iştirakçılarının sınaq dərsi keçəcəkləri ümumtəhsil məktəblərinin direktorları və onların müavinləri iştirak edirdilər.

Tədbiri açan Azərbaycan Respublikasının təhsil naziri Misir Mərdanov artıq "Ən yaxşı ümumtəhsil məktəbi" və "Ən yaxşı müəllim" müsabiqələrinin I mərhələsinin başa çatdığını bildirdi və bir neçə ay ərzində Təhsil Nazirliyində bununla bağlı görülmüş işlər haqqında məlumatı iştirakçıların diqqətinə çatdırdı. O qeyd etdi ki, "Ən yaxşı müəllim" müsabiqəsinə Bakı şəhərinin məktəblərindən 123, nazirliyin tabeliyindəki ümumtəhsil məktəblərindən 28, Sumqayıt şəhərindən 21, respublikanın digər şəhər və rayonlarından 221 nəfər olmaqla cəmi 393 müəllim sənəd təqdim etmişdir. Onlardan 31 nəfərinin sənədi müəyyən edilmiş şərtlərə uyğun gəlmədiyindən müsabiqədə iştirakı qeyri-mümkün sayılmışdır. Sənəd təqdim edən müəllimlərin 15 meyar üzrə göstəriciləri qiymətləndirilmiş və buna uyğun olaraq onların hər birinə müvafiq bal verilmişdir. Təhsil Nazirliyində aidiyyəti şəxslərin iştirakı ilə keçirilən müzakirə zamanı növbəti mərhələyə keçid balı minimum 16 müəyyən edilmiş və buna müvafiq olaraq Təşkilat Komitəsinin qərarı ilə müsabiqənin növbəti mərhələsinə 208 müəllim buraxılmışdır.

Sözünə davam edən təhsil naziri  artıq yaxın günlərdə "Ən yaxşı müəllim" müsabiqəsinin iştirakçı müəllimlərin dərsinin dinlənilməsi, təhlil olunması və qiymətləndirilməsi prosesindən ibarət olan II mərhələsinə start veriləcəyini deyərək bu məqsədlə Bakının mərkəzi rayonlarında yerləşən və müvafiq şəraitə malik olan məktəblərin seçildiyini bildirdi.

Müsabiqənin II mərhələsində həmin təhsil müəssisələrinin rəhbərlərinin üzərinə düşən vəzifələrdən söz açan nazir onlara görüləcək işlərlə bağlı Təşkilat Komitəsinin  rəsmi məktubunun göndəriləcəyini qeyd etdi.

Misir Mərdanov bildirdi ki, aprelin 21-də Təhsil Nazirliyində bu mərhələyə vəsiqə qazanmış 208 müəllimin iştirakı ilə müşavirə keçiriləcək və ayrı-ayrı fənlər üzrə onların sınaq dərsləri keçəcəkləri məktəblərin adları elan olunacaq. Nəzərdə tutulub ki, tədbirdən sonra müəllimlər məktəbin nümayəndələri ilə birlikdə ora gedərək şəraitlə yaxından tanış olsunlar. Bu işə böyük məsuliyyətlə yanaşmağın zəruriliyini məktəb rəhbərlərinin diqqətinə çatdıran nazir tədbirin yüksək səviyyədə həyata keçirilməsinin bilavasitə onların təşkilatçılıq qabiliyyətindən asılı olduğunu vurğuladı. Hər bir direktor məktəbə seçilmiş müəllimlərin gəldiyini nəzərə almalıdır. Qonaqlar səmimi qəbul edilməli, onlara həssas yanaşılmalı, fəaliyyətləri üçün zəruri şərait yaradılmalıdır. Onlar əyani vəsaitlər və texniki vasitələrlə bağlı heç bir problemlə üzləşməməli, dərs keçdikləri sinifdə bütün şagirdlərin davamiyyəti təmin olunmalı, məktəbdə ciddi nizam-intizam olmalıdır.

Daha sonra "Ən yaxşı ümumtəhsil məktəbi" müsabiqəsi haqqında məlumat verən Misir Mərdanov iştirak üçün 126 məktəbin müraciət etdiyini bildirdi. O qeyd etdi ki, sənədləri qəbul edilmiş məktəblərin göstəriciləri 14 meyar üzrə qiymətləndirilmiş və keçid balı 16 müəyyən olunmaqla 102 məktəbin II mərhələyə buraxılması məqsədəuyğun sayılmışdır.

Daha sonra müşavirədə "Ən yaxşı müəllim" müsabiqəsinin II mərhələsi ilə bağlı digər  məsələlər müzakirə olundu və nazir iştirakçıları maraqlandıran sualları cavablandırdı.

Hicran ZöHRABQIZI

 II  mərhələdə müəllimlərin sınaq dərsləri dinləniləcək

Aprelin 15-də Təhsil Nazirliyində nazir Misir Mərdanovun "Ən yaxşı müəllim" müsabiqəsinin II mərhələsini keçirən fənn komissiyalarının üzvləri ilə görüşü keçirildi.

Tədbiri təhsil naziri Misir Mərdanov açaraq ölkə başçısı cənab İlham Əliyevin 4 sentyabr 2007-ci il tarixli sərəncamına əsasən "Ən yaxşı ümumtəhsil məktəbi" və "Ən yaxşı müəllim" müsabiqələrinin keçirilməsi ilə bağlı ötən müddət ərzində xeyli təşkilati işlərin görüldüyünü dedi. Nazir qeyd etdi ki, bütün bu işlər nazirlikdə yaradılmış Təşkilat Komitəsi tərəfindən istiqamətləndirilir və koordinasiya edilir.Görüş iştirakçılarının diqqətinə " Ən yaxşı müəllim" müsabiqəsi ilə bağlı görülmüş işlər haqqında məlumatları çatdıran nazir bildirdi ki, adıçəkilən müsabiqədə iştirak etmək üçün Təşkilat Komitəsinə müraciət edənlərdən 208-i növbəti mərhələyə buraxılıb. İkinci mərhələdə həmin müəllimlər sınaq dərsi deməlidirlər. Artıq sınaq dərslərinin keçilməsi üçün Bakı şəhərində 28 məktəb müəyyənləşdirilib.Müsabiqənin ikinci mərhələsinin iştirakçıları arasında ingilis dili müəllimləri çoxluq təşkil edirlər. Onların sayı 31 nəfərdir. Müsabiqədə 47 rayon və şəhərin müəllimləri təmsil olunurlar. Ən çox müəllim Bakı şəhərindəndir. Bunların sayı 77 nəfərdir. İştirakçılar arasında Təhsil Nazirliyinin tabeliyindəki məktəblərdən 19, Sumqayıtdan 13, Cəlilabad və İsmayıllı rayonlarının hər birindən 6, Quba və Şəki rayonlarının hər birindən isə 5 müəllim vardır.13 rayonun müəllimləri 15 meyar üzrə göstəricilərinə görə 16-dan az bal topladıqları üçün II mərhələyə buraxılmayıblar.

Bütün bunlar haqqında geniş məlumat verən Misir Mərdanov dinləniləcək dərslərin qiymətləndirilməsi meyarlarının da artıq müəyyən edildiyini bildirdi. Nazir fənn komissiyalarının üzvləri tərəfindən müəllimlərin  dinləniləcək sınaq dərslərinin müəyyən edilmiş 12 meyar əsasında hər birinin maksimum 10 balla dəyərləndirilməsinin nəzərdə tutulduğunu söylədi.

Sınaq dərsləri dinləniləcək müəllimlərin qiymətləndirilməsi zamanı nəzərdə tutulan 12 meyarın hər biri barəsində ətraflı danışan nazir fənn komissiyalarının üzvlərinə öz işlərinə olduqca məsuliyyətli yanaşmağı və diqqətli olmağı tövsiyə etdi. Qeyd etdi ki, fənn komissiyalarının tərkibinə tanınmış müəllimlər, metodistlər, məktəbi yaxşı bilən şəxslərlə yanaşı, həmçinin Təhsil Nazirliyinin nümayəndələri də salınacaqlar. Onlar ixtisaslarına uyğun dərslərin dinlənilməsində iştirak etməklə bərabər, təşkilati işlərin həllinə kömək göstərəcəklər.   Fənn  komissiyalarının üzvləri dərsində iştirak etdiyi hər bir müəllimi yuxarıda qeyd olunan 12 meyar üzrə qiymətləndirəcəklər.Sınaq  dərsləri  videolentə alınacaq.

Hazırkı dövrün müəlliminə verilən tələblərlə 15-20 il bundan əvvəl müəllimə verilən tələblər arasında xeyli fərqlərin olduğunu deyən nazir bu haqda bir qədər ətraflı danışdı. Bu günün müəllimi daha çox təşkilatçı, istiqamətverici keyfiyyətləri ilə fərqlənməli,şagirdlərə öyrənməyi öyrətməyi bacarmalıdır. Müasir müəllim şagirdlərlə əməkdaşlıq etməyi, onların təşəbbüskarlığını, təlim müstəqilliyini layiqincə qiymətləndirməyi bacarmalıdır. Nazir müsabiqənin keçirilməsində əsas məqsədin ən yaxşıların  yaxşısının seçilməsi, respublika miqyasında tanınması, onların biliyinin, peşəkarlığının layiqincə qiymətləndirilməsi olduğunu dedi. "Ən yaxşı ümumtəhsil məktəbi" və "Ən yaxşı müəllim" müsabiqələrinin keçirilməsinin Azərbaycanın təhsil tarixində mühüm bir hadisə olduğunu söyləyən Misir Mərdanov bunun gələcəkdə təhsil işçiləri arasında stimullaşdırmaya, təhsilin keyfiyyətinin yüksəldilməsinə imkan yaradacağını bildirdi. Respublika Prezidenti cənab İlham Əliyev tərəfindən təhsil işçilərinə daim diqqət göstərildiyini xüsusi vurğulayan nazir  müsabiqələrin keçirilməsinin buna bir daha bariz nümunə olduğunu söylədi. Misir Mərdanov fənn komissiyalarının üzvlərinin üzərilərinə düşən vəzifənin öhdəsindən  layiqincə gələcəklərinə ümidvar olduğunu bildirərək onlara müəyyən tövsiyələr verdi. Nazir aprelin 23-dən etibarən sınaq dərslərinin dinlənilməsinə başlanılmasının nəzərdə tutulduğunu söyləyərək, çox qısa bir vaxta  qədər müəyyən olunmuş hər bir məktəbdə fənn komissiyalarının üzvləri  tərəfindən dərslərin dinlənilməsi ilə bağlı qrafikin hazırlanıb onlara təqdim olunacağını, həmçinin meyarlar üzrə qiymətləndirmə cədvəlinin veriləcəyini dedi.

Sınaq dərslərinin dinlənilməsi  və bununla bağlı digər məsələlər haqqında geniş danışan Misir Mərdanov sonda fənn komissiyalarının üzvlərinin suallarını cavablandırdı,bir sıra məqamlara aydınlıq gətirdi.

Samirə KƏRİMOVA

Nazir amerikalı qonaqları qəbul edib

Aprelin 15-də təhsil naziri Misir Mərdanov ölkəmizdə işgüzar səfərdə olan ABŞ-ın Troy Universitetinin biznesin təşkili və idarə edilməsi fakültəsinin dekanı, professor Don C.Hinesi və universitetin beynəlxalq proqramlar üzrə direktoru Filip Lyonu qəbul edib. Həmin görüşdə Qafqaz Universiteti ilə Troy Universiteti arasında beynəlxalq proqramlar əsasında biznesin təşkili və idarə olunması, eləcə də iqtisadiyyatın müxtəlif sahələri üçün kadrların hazırlanmasına dair anlaşma memorandumu imzalanıb. Səmimi dostluq şəraitində keçən qəbulda "çağ" öyrətim İşlətmələri şirkətinin prezidenti Ənvər özərən, Qafqaz Universitetinin rektoru, professor Əhməd Saniç və təhsil ocağının digər nümayəndələri, eləcə də nazirliyin mərkəzi aparatının və müvafiq şöbələrinin rəhbərləri və əməkdaşları iştirak edirdilər.

Qonaqları səmimi salamlayan təhsil naziri Misir Mərdanov onları Təhsil Nazirliyində görməsindən məmnunluğunu ifadə etdi. ölkəmizdə təhsil sahəsində beynəlxalq əməkdaşlıq əlaqələrinin yaranmasına daim xüsusi önəm verildiyini vurğulayan nazir Azərbaycan Respublikasının ABŞ-la müxtəlif proqramlar çərçivəsində geniş miqyasda əməkdaşlıq əlaqələrinin mövcud olduğunu diqqətə çatdırdı. Misir Mərdanov yüksək intellektə malik insan kapitalının formalaşmasında, davamlı inkişafa zəmin yaradan güclü iqtisadiyyatın qurulmasında təhsilin, xüsusilə ali təhsilin böyük rolundan bəhs edərək qonaqlara son illər ölkəmizdə bu sahədə görülən işlər və həyata keçirilən tədbirlər haqqında məlumat verdi. O, imzalanacaq sənəd əsasında Qafqaz Universiteti ilə Troy Universiteti arasında yaranacaq əməkdaşlıq əlaqələrini yüksək dəyərləndirdiyini diqqətə çatdırdı. Görüşdə Türkiyə və Azərbaycan qardaşlığının ən parlaq simvolu olan Qafqaz Universitetinin böyük uğurlarından söz açan nazir Türkiyə Cümhuriyyətinin Prezidenti Abdullah Gülün "Qafqaz Universiteti bütün Qafqazın "Harvard"ı olacaq" fikrinin yaxın gələcəkdə gerçəkləşəcəyinə şübhə etmədiyini dedi.

Sonra çıxış üçün söz alan professor Don C.Hines Azərbaycanda qarşılaşdıqları yüksək qonaqpərvərlik və səmimiyyətə görə təşəkkürünü bildirdi. Qafqaz Universitetinin Troy Universitetinin Cənubi Qafqazda əməkdaşlıq edəcəyi ilk ali məktəb olduğunu deyən qonaq tədbir iştirakçılarına çalışdığı 130 yaşlı təhsil ocağı haqqında ətraflı məlumat verdi. O qeyd etdi ki, Troy Universiteti əlaqə yaratmaq istədiyi müəssisənin fəaliyyətini diqqətlə izləyir və yalnız bundan sonra işbirliyinə can atır. Bu mənada Qafqaz Universiteti də məhz Azərbaycanda fəaliyyət göstərən özəl ali məktəblər arasında ən yüksək reytinqə malik olması, beynəlxalq miqyasda böyük nüfuzu, məzunlarının dünya səviyyəsində əhəmiyyətli nailiyyətləri ilə diqqəti cəlb edib. İmzalanacaq müqaviləyə görə Qafqaz Universitetinin bir qrup tələbəsi 2 il öz ali məktəbində, 2 il ABŞ-da təhsil alacaq. Bu razılıq amerikalı tələbələrə də şamil olunur. Proqramı başa vurmuş tələbəyə hər 2 universitetin biznes bakalavr dərəcəsi veriləcək. Bundan başqa, biznes magistr proqramının (MBA) həyata keçirilməsi də gözlənilir ki, bunun üçün tələbə hər iki təhsil ocağında bir il oxumalıdır. Əməkdaşlıq çərçivəsində müasir dövrdə dünyanın hər bir guşəsində əsas rol oynayan 2 sahə üzrə - biznesin təşkili və idarə olunması, eləcə də iqtisadiyyatın müxtəlif sahələri üçün kadrların hazırlanması nəzərdə tutulub. Dünyanın hər bir yerində tanınacaq diplomlar məzunların istənilən ölkədə işləməsinə imkan yaradacaq. Beləliklə, Qafqaz Universiteti Azərbaycanın təhsil tarixində məzunlarına 2 universitetin diplomunu verən ilk ali təhsil ocağı olacaq. Don C.Hines yaranacaq əməkdaşlıq əlaqələrinin həm də ölkələr arasında dostluq münasibətlərinin inkişafına xidmət edəcəyinə əmin olduğunu bildirdi.

Səmimi şəraitdə keçən görüşün sonunda Qafqaz Universiteti və Troy Universiteti arasında qarşılıqlı əməkdaşlığa dair anlaşma sənədi imzalandı. Təhsil naziri Misir Mərdanov onları təbrik edərək gələcək fəaliyyətlərində uğurlar arzuladı və qonaqlarla xatirə şəkli çəkdirdi.

Hicran ƏKBƏROVA