Təhsil naziri Yevlax və Zaqatala rayonlarında olub

Mayın 5-də Yevlax rayonunun  Mərkəzi Elektron Kitabxanasında ümummilli lider Heydər Əliyevin anadan olmasının 86-cı ildönümünə həsr edilmiş "Heydər Əliyev- müasir Azərbaycan dövlətinin banisidir" mövzusunda elmi-praktik konfrans və Heydər Əliyev adına sarayda təhsil işçilərinin iştirakı ilə  müşavirə keçirildi.Tədbirdə Təhsil Nazirliyinin nümayəndələri, ali məktəb rəhbərləri, KİV əməkdaşları və  başqa qonaqlar iştirak edirdilər.

Tədbir iştirakçıları əvvəlcə Yevlax Rayon İcra Hakimiyyətinin qarşısında ucaldılmış ulu öndər Heydər Əliyevin abidəsi önünə gül dəstələri qoydular. Sonra rayondakı 8 nömrəli orta məktəbin açılış mərasimi oldu.

Tədbiri giriş sözü ilə Yevlax Rayon İcra Hakimiyyətinin başçısı Elmar Vəliyev açaraq sözü təhsil naziri Misir Mərdanova verdi. Nazir xalqımızın ümummilli lideri Heydər Əliyevin və onun layiqli davamçısı Prezident İlham Əliyevin ölkədə təhsilin inkişafına göstərdikləri əvəzsiz qayğı və diqqətdən ətraflı danışdı.

Qonaqlarla birlikdə Heydər Əliyev muzeyində olan nazir Xatirə kitabına ürək sözlərini yazdı.

Ertəsi gün Zaqatala rayonuna gələn təhsil naziri Misir Mərdanov rayon icra hakimiyyətinin başçısı Asif Əsgərovla  birlikdə Heydər Əliyev adına parkda ulu öndər Heydər Əliyevin abidəsi önünə gül dəstələri qoydu, sonra akademik  Zərifə  Əliyeva adına liseyə baş çəkdi.

Həmin gün təhsil naziri Misir Mərdanov Zaqatala şəhərində  320, Mazıx kəndində 220 şagird yerlik yeni inşa edilmiş orta məktəblərin və Mamrux kəndində təzə tikilmiş 40 yerlik uşaq bağçasının açılış  mərasimlərində  iştirak etdi.  Sonra rayonun Suvagil kənd Mədəniyyət evində təhsil işçilərinin iştirakı ilə  müşavirə  keçirildi.

Müşavirədə Azərbaycanda təhsil islahatlarının həyata  keçirilməsindən və təhsil işçiləri qarşısında duran mühüm vəzifələrdən söhbət açan nazir Misir Mərdanov bildirdi ki, ölkə başçısı, ölkə ictimaiyyəti təhsil işçilərindən bu gün  daha keyfiyyətli təhsil gözləyir.

Rayonlarda keçirilən sınaq imtahanlarının nəticələrinə də münasibətini bildirən nazir hər iki rayon üzrə nəticəsi aşağı olan məktəblərin rəhbərlərinin işindən narazı qaldığını vurğuladı və bu sahədə ciddi tədbir görüləcəyini nəzərə çatdırdı.

(Ətraflı məlumat qəzetimizin  növbəti nömrəsində dərc ediləcək).

Şakir CƏFƏROV  

Dövlət Proqramı çərçivəsində Fransada 40 azərbaycanlı gənc təhsil alır

"2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı" çərçivəsində 2007-2015-ci illər ərzində müxtəlif sahələr üzrə Azərbaycana  lazım olan  kadr potensialının gücləndirilməsi məqsədilə 5000 gəncin dünyanın nüfuzlu ali məktəblərində təhsil almağa göndərilməsi nəzərdə tutulmuşdur.         

Dövlət Proqramının icrasına başlanmasından ötən dövr ərzində azərbaycanlı gənclər Fransa, Türkiyə, Rusiya, Koreya, Almaniya və ABŞ-ın ali məktəblərində dövlət hesabına təhsil almaq hüququ qazanmışlar.2007-ci ildə Təhsil Nazirliyinin KNOUS təşkilatı ilə imzaladığı müqavilə çərçivəsində 13, 2008-ci ildə  isə 27 tələbə  Fransaya göndərilmiş və gələcəkdə onların sayının artırılması nəzərdə tutulmuşdur. Həmin tələbələr hazırda Fransanın müxtəlif universitetlərində təhsillərini  uğurla davam etdirirlər.   Beləliklə, bu gün Fransanın ali məktəblərində 40 azərbaycanlı tələbə  Dövlət Proqramı çərçivəsində təhsil alır. Onu da qeyd edək ki, 2009-2010-cu dərs ili üçün Fransanın ali məktəblərinə göndəriləcək azərbaycanlı tələbələri müəyyənləşdirmək  məqsədilə Təhsil Nazirliyi tərəfindən müsabiqə elan olunmuşdur.

R.ZİYADOV