"Enerji və ətraf mühit" beynəlxalq müsabiqəsində fərqlənənlərə mükafatlar təqdim olundu

Mayın 5-də "Kaspian plaza" otelinin konfrans zalında Norveç təbiəti mühafizə cəmiyyətinin "Enerji və resurslardan səmərəli istifadə" məktəbli proqramının təşkilatçılığı, Təhsil, Ekologiya və Təbii Sərvətlər nazirliklərinin dəstəyilə 2008-2009-cu dərs ilində təşkil edilən "Enerji və ətraf mühit" adlı beynəlxalq müsabiqənin milli mərhələsində fərqlənən şagird və müəllim işlərinin mükafatlandırılması mərasimi keçirildi. Tədbirdə təhsil nazirinin müavini İsgəndər İsgəndərov, Ekologiya və Təbii Sərvətlər Nazirliyinin məsul əməkdaşı Şövkət Bəkirov, Norveçin Azərbaycandakı səfiri Jon Romberq və digər şəxslər iştirak edirdilər. Mərasimdə proqramın milli koordinatoru Nailə İsmayılova şəbəkənin yaranması və müsabiqə haqqında məlumat verərək bildirdi ki, əsas məqsəd məktəbliləri qlobal ekoloji problemlərin müzakirələr zamanı daha çox praktik işlərə yönəltməklə şagirdlərə təbii ehtiyatlardan, enerjidən səmərəli istifadə etmək məsuliyyətini aşılamaqdır. Mərasimdə çıxış edən təhsil nazirinin müavini İsgəndər İsgəndərov bildirdi ki, tədbir əlamətdar günə - ümummilli lider Heydər Əliyevin anadan olmasının 86-cı ildönümünə təsadüf edir. Bu da məktəblilərimizə bir töhfədir. Layihənin əhəmiyyətindən danışan nazir müavini qeyd etdi ki, proqram çərçivəsində şagird və müəllimlərin iştirak etdiyi "İstixana qazlarını azalda bilərik" devizi altında keçirilən müsabiqədə ictimaiyyətin iqlim dəyişiklikləri məsələlərinə diqqətini yönəltmək, maarifləndirmə işlərini artırmaqdır. Təhsil, Ekologiya və Təbii Sərvətlər nazirliklərinin də dəstək verdiyi müsabiqədə Bakı şəhəri də daxil olmaqla respublikanın 11 bölgəsi iştirak etmişdir. Təqdim olunan müəllim və şagird işləri resurslardan səmərəli istifadə etməklə istixana qazlarının azaldılmasına təsir etməyin fərdi və eyni zamanda sadə yollarını nümayiş etdirir. Hər bir sahədə olduğu kimi, təhsilə də göstərilən dövlət qayğısını önə çəkən nazir müavini layihənin təşkilatçılarına minnətdarlığını bildirdi. Digər çıxış edənlər mövzu ilə bağlı öz fikirlərini açıqladılar.

ümumilikdə 4 nominasiya üzrə 48 işin təqdim olunduğu müsabiqədə Ucar, Qax və İsmayıllı rayonlarının məktəbləri daha fəal olmuşlar. Münsiflər heyəti 15 maraqlı işi qeyd etmişdir ki, bunların arasından 5-i müsabiqənin beynəlxalq mərhələsində iştirak etmək üçün tövsiyə edilmişdir.

Mərasimin sonunda müsabiqənin milli mərhələsində fərqlənən işlərin müəlliflərinə diplom, sertifikat və digər hədiyyələr təqdim olundu.

Fazil İDRİSOĞLU