Müsabiqə qalibləri mükafatlandırıldılar

Aprelin 22-də Təhsil Nazirliyində ali məktəb tələbələrinin   XXI  Respublika elmi konfransı çərçivəsində  keçirilmiş "Ən yaxşı tələbə elmi-tədqiqat işi" müsabiqəsinin qaliblərinin mükafatlandırılması mərasimi keçirildi.

ölkədə elmin, təhsilin inkişafına xüsusi diqqət və qayğı göstərildiyini qeyd edən təhsil  nazirinin müavini İradə  Hüseynova Respublika Prezidenti cənab İlham Əliyev tərəfindən bu istiqamətdə aparılan məqsədyönlü işlərdən danışdı.  Bildirdi ki, keçirilmiş "Ən yaxşı tələbə elmi-tədqiqat işi" müsabiqəsi  yüksək biliyə malik, elmi-tədqiqat işləri ilə məşğul olmağa maraq göstərən gənclərimizin aşkarlanmasına, onların tanınmasına imkan verdi. Qeyd olundu ki, müsabiqə 16-17 dekabr 2008-ci il tarixində  Azərbaycan Respublikası Təhsil Nazirliyinin təşkilatçılığı ilə  "Odlar yurdu" Universitetinin bazasında keçirilmiş, ali məktəb tələbələrinin XXI Respublika elmi konfransı çərçivəsində təşkil edilmişdir.Konfransın 16 bölməsində 320 tələbə məruzə ilə çıxış etmişdir. Müsabiqə cari  ilin fevral-mart aylarında keçirilmiş və bura  konfrans iştirakçılarının reytinq cədvəlinin yuxarı  üç pilləsində olan tələbələr buraxılmışdır. Təhsil  Nazirliyi  tərəfindən yaradılmış  tanınmış alimlərdən ibarət  münsiflər heyəti  müsabiqəyə buraxılmış hər bir tələbə ilə müsahibə aparıb və 16 qalib müəyyənləşdirib. Təqdim olunan elmi-tədqiqat işlərində gənclərin yüksək elmi hazırlıq, bilik nümayiş etdirdiyini deyən İ.Hüseynova "Ən yaxşı tələbə elmi- tədqiqat işi" müsabiqəsinin qaliblərini  mərasim iştirakçılarına təqdim etdi. Qaliblərə Təhsil Nazirliyinin diplomları təqdim olundu.Bütün qalibləri təhsil naziri Misir Mərdanovun adından  və öz adından təbrik edən nazir müavini onlara gələcək elmi yaradıcılıq işlərində müvəffəqiyyətlər arzuladı.

çıxış edənlər - Bakı Dövlət Universitetinin prorektoru İsmayıl Əliyev, AMEA-nın müxbir üzvü Vaqif Abbasov, Azərbaycan  Dövlət Pedaqoji Universitetinin fizika fakültəsinin dekanı, professor Mirzəli Murquzov, Bakı Slavyan Universitetinin  prorektoru Məmməd  Əliyev müsabiqənin keçirilməsinin əhəmiyyətinə toxunaraq,  qaliblərə ən xoş istəklərini çatdırdılar. 

Müsabiqənin qaliblərindən Heydər Əliyev adına Azərbaycan Ali Hərbi Məktəbinin tələbəsi Teymur Mustafayev, Bakı Dövlət Universitetinin magistrantı Şəbnəm Həsənli, Gəncə Dövlət Universitetinin tələbəsi Elnur Həsənov çıxış edərək ölkə başçısı cənab İlham Əliyev tərəfindən gənclərə göstərilən diqqət və qayğıdan söz açdılar. çıxış edən tələbə gənclər sonda  bütün qaliblər adından  onların əməyini belə yüksək qiymətləndirdiyinə görə təhsil naziri Misir Mərdanova və müsabiqənin keçirilməsində  zəhməti olan bütun şəxslərə  öz minnətdarlıqlarını bildirdilər.

Samirə KƏRİMOVA