Gənc kompüter istedadları müsabiqəsi keçirildi

Akademik Z.Əliyeva adına orta məktəbdə şagirdlər arasında kompüter layihələri üzrə "Gənc kompüter istedadları" Respublika müsabiqəsi keçirildi. Təhsil nazirinin müvafiq əmrinə uyğun olaraq təşkilat komitəsi, münsiflər heyətinin təşkili və müsabiqənin əsasnaməsi hazırlanıb təsdiq edilmişdir.

Təşkilat komitəsinin, eləcə də münsiflər heyətinin tərkibinə AMEA-nın, qeyri-dövlət qurumlarının, İKT şirkətlərinin nümayəndələri, orta ümumtəhsil məktəblərinin rəhbər və müəllimləri daxil edilmişdir. Təhsil Nazirliyinin şöbə müdiri İsmayıl Sadıqovun məlumatına görə, IV-XI sinif şagirdlərinin iştirak etdiyi müsabiqə üçün ayrıca elektron ünvan açılmış və bu ünvana 114 ərizə daxil olmuşdur.

Onlardan 69-u təqdimat, 28-i veb-sayt, 17-i isə kompüter proqramları nominasiyası üzrədir. Təqdim edilən ərizələrin 83-ü Bakıdan, 22-si Sumqayıtdan, 9-u isə respublikanın digər şəhər və rayonlarından verilib. 70 layihədən 47-si Bakıdan, 15-i Sumqayıtdan, 3-ü Mingəçevirdən, 2-si Şəkidən, hərəsindən 1 layihə olmaqla Zaqatala, Dəvəçi və Cəlilabad rayonlarından təqdim edilmişdir. İ.Sadıqov qeyd etdi ki, münsiflər heyətinə təqdim olunan layihələrə ilkin baxışdan sonra diskə yazılaraq bir daha baxılmaq üçün münsiflər heyətinin üzvlərinə paylanmışdır.

İştirakçılara müsabiqənin şərtləri barədə geniş məlumat verildikdən sonra onlar nəzarətçilərin müşayiəti ilə lazımi avadanlıqlarla təchiz edilmiş otaqlara yerləşdirildilər.

Sonra böyük ekran vasitəsilə layihələrin təqdimatı başlandı. Münsiflər heyətinin üzvləri işlərə öz fikirlərini bildirməklə lazımi təkliflərini verdilər.

"Gənc kompüter istedadları" müsabiqəsinin qalibləri yaxın günlərdə məlum olacaqdır.

Fazil İDRİSOĞLU,

foto müəllifindir