Konstitusion islahatlar zəruridir

Naxçıvan Dövlət Universitetində 18 martda keçiriləcək referenduma hazırlıq və qarşıda duran vəzifələrlə bağlı tədbir keçirilmişdir. Tədbirdə universitetin rektoru, akademik İsa Həbibbəyli Naxçıvan MR Ali Məclisi sədrinin referenduma hazırlıqla bağlı tədbirlər planı tərtib etdiyini və regionda ümumxalq səsverməsinin şəffaf və demokratik keçirilməsi üçün əhəmiyyətli işlər görüldüyünü vurğulamışdır. Millət vəkili ölkədə konstitusion islahatların aparılmasının daha ciddi və demokratik Konstitusiyanın yaradılması baxımından zəruri olduğunu qeyd etmişdir. Rektor Konstitusiyada vətəndaşların sosial-hüquqi azadlıqları ilə bağlı yenilikləri təhlil etmiş, bir şəxsin iki dəfədən artıq prezident seçilməsinə qoyulan məhdudiyyətin aradan qaldırılması ilə bağlı 101-ci maddəyə edilən düzəlişi hər bir şəxsin seçmək və seçilmək hüquqlarını təmin edəcək mühüm demokratik addım kimi dəyərləndirmişdir.

Naxçıvan MR Mərkəzi Seçki Komissiyası sədrinin müavini Səbuhi Sadiqov ümumxalq səsverməsinin mütəşəkkil təşkil olunması məqsədi ilə əhali arasında maarifləndirmə işi aparıldığını bildirmiş, seçicilərin siyahıya alınmasından, səsvermə ilə bağlı aparılan hazırlıq prosesindən danışmışdır.

Universitetin tərbiyə işləri üzrə prorektoru, fəlsəfə elmləri doktoru Məmməd Rzayev, universitetin ilk müəllimlərindən olan tarix elmləri namizədi İbrahim Hüseynov referendumla bağlı təşviqat kampaniyası çərçivəsində muxtar respublikada həyata keçirilən tədbirlərdən söz açmış, ümumxalq səsverməsində xalqın iradəsinin qalib gələcəyinə əminliklərini bildirmişlər.

Mehriban SULTAN,

NDU-nun mətbuat şöbəsinin müdiri

BDU-nun rektoru Avrasiya Universitetlər Assosiasiyasının XI qurultayında iştirak edib

Martın 10-da Qazaxıstanın paytaxtı Astanada Lev Qumilyov adına Avrasiya Milli Universitetində dünyanın 98 ali təhsil ocağının rektorlarının, digər rəhbər işçilərin və professor-müəllimin iştirak etdikləri Avrasiya Universitetlər Assosiasiyasının XI qurultayı keçirildi. Qurultayı Avrasiya Universitetlər Assosiasiyasının prezidenti, M.V.Lomonosov adına Moskva Dövlət Universitetinin rektoru Viktor Sadovniçi açdı.

Plenar iclasda cəmi 4 çıxış dinlənildi. İlk çıxış edən Qazaxıstan Respublikasının Prezidenti Nursultan Nazarbayev Avrasiya məkanına daxil olan universitet rektorlarının, məşhur alim və müəllimlərin bir araya gəlməsini böyük hadisə adlandıraraq yaradıcılıq və axtarış imkanlarını genişləndirmək üçün elmi ictimaiyyətə kömək etməyin, elmin birgə inkişafına nail olmağın vacibliyini vurğuladı. Eyni zamanda, nanotexnologiyalar, kosmos, texniki informasiya sahəsində tədqiqatların aparılması üçün proqram yaradılmasını təklif etdi.

Sonra AMA-nın prezidenti, M.V.Lomonosov adına Moskva Dövlət Universitetinin rektoru, akademik Viktor Sadovniçinin hesabatı dinlənildi. P.Lumumba adına Rusiya Xalqlar Dostluğu Universitetinin rektoru M.V.Filipov isə tədbirin əhəmiyyətindən söz açaraq, belə görüşlərin və dialoqların tədrisin və təhsilin inkişafına səmərə verəcəyini bildirdi.

Bu mötəbər tədbirdə çıxış edən Bakı Dövlət Universitetinin rektoru, millət vəkili, akademik Abel Məhərrəmov Azərbaycanda həyata keçirilən təhsil islahatlarından, Prezident İlham Əliyevin ölkədə təhsil sahəsində həyata keçirdiyi uğurlu layihələrdən və yeniliklərdən danışaraq qeyd etdi: "Məlum olduğu kimi, hər bir ölkənin universiteti dövlətin siyasi, iqtisadi və mədəniyyət səviyyəsinin barometridir. Azərbaycanda dövlətin bu sahəyə xüsusi qayğısı uzun illərdir ənənə halını almışdır. Buna görə də Bakı Dövlət Universiteti hazırda öz texniki bazası və elmi potensialı ilə bölgədə analoqu olmayan bir elmi-təhsil strukturudur. Əldə olunan nailiyyətlər beynəlxalq elm və təhsil sisteminə inteqrasiyaya yönəldilmiş islahatlar nəticəsində mümkün olmuşdur.

Bu gün Azərbaycanda təhsil sisteminin inkişafı, müasir texnologiyaların tətbiq edilməsi, dünya təcrübəsindən istifadə edilməsi və dünya təhsil məkanına inteqrasiya məsələsində müəyyən addımlar atılır. Hazırda ali təhsil sahəsində keyfiyyətli idarə, müştərək akademik proqramlar, universitetlərin sənaye zolaqları və yerli icmalarla əməkdaşlıq, inkişaf etdirilmiş tədris, texnologiyaların öyrənilməsi və texnoparkların yaradılması kimi aktual problemlər gündəmdədir. Xaricdə təhsil alan gənc kadrların tədrisə cəlb olunması məsələsinə xüsusi diqqət yetirilir. Bu, Azərbaycan Respublikasının təhsil siyasətinə də uyğundur. Baxmayaraq ki, Azərbaycan müharibə şəraitindədir, ölkəmizin iqtisadiyyatı yüksək templə inkişaf edir. Prezidentimiz İlham Əliyev ölkənin elm adamları qarşısına iqtisadi potensialımızı intellekt kapitalına çevirmək vəzifəsini qoymuşdur. Qabaqcıl dünya standartlarına nail olmaq üçün dövlətimizdə mümkün olan bütün vasitələrdən istifadə edilir".

Bu istiqamətlərin hər biri ilə bağlı fikir və mülahizələrini bildirən, Avrasiya məkanında elmin, alimlərin inteqrasiyasının əhəmiyyətini və əməkdaşlığın səmərəsini xüsusi vurğulayan akademik Abel Məhərrəmov sonda qurultay iştirakçılarını Bakı Dövlət Universitetinin 90 illik yubileyində iştirak etməyə dəvət etdi.

Qeyd edək ki, həmin ərəfədə Bakı Dövlət Universitetinin rektoru, akademik Abel Məhərrəmov ilə Avrasiya Milli Universitetinin rektoru Baxitjan Abdraimov "Qarşılıqlı anlaşma və əməkdaşlıq haqqında" Memorandum imzaladılar.

BDU-nun mətbuat və

informasiya şöbəsi

Azərbaycan Dillər Universitetində Milli TEMPUS Məlumat Günü qeyd olundu

Martın 6-da Azərbaycan Dillər Universitetində Milli TEMPUS Məlumat Gününə həsr olunmuş beynəlxalq konfrans keçirildi. Konfransda ADU-da keyfiyyətin təminatı ilə yanaşı, 2008-ci ildə TEMPUS IV proqramı üzrə təkliflərin nəticələri, 2009-cu ildə TEMPUS IV çərçivəsində təkliflərin verilməsinə dair II dəvət, Azərbaycanda ən keyfiyyətli TEMPUS layihələri, "Erazmus Mundus Xarici əməkdaşlıq təşəbbüsü" proqramında Azərbaycan universitetləri üçün imkanlar və ölkəmizdə TEMPUS və Milli TEMPUS Ofisinin rolu müzakirə olundu.

Tədbiri giriş sözü ilə ADU-nun rektoru, millət vəkili, professor Səməd Seyidov açaraq qeyd etdi ki, bu konfrans dövlətimiz və universitetlər üçün çox əlamətdar hadisədir. O, TEMPUS layihəsinin təkcə müəllim mübadiləsi kimi deyil, Azərbaycanda təhsil islahatlarının göstəricisi kimi dəyərləndirdi.

Təhsil nazirinin müavini Elmar Qasımov konfransın bu il daha geniş və yüksək səviyyədə təşkil edildiyini vurğulayaraq universitetlər arasında Azərbaycan Dillər Universitetinin TEMPUS proqramı çərçivəsində, həmçinin təhsil sahəsində beynəlxalq əməkdaşlıq prosesində ən üstün yer tutduğunu bildirdi.

AB-nin Bakıda xüsusi nümayəndəsi və ofisinin rəhbəri, səfir Alan Vaddams Avropa Birliyinin əməkdaşlıq etdiyi bütün ölkələrdə hər bir sahədə inkişafı qarşısına məqsəd qoyduğunu və əsas diqqəti təhsil sahəsinə yönəltdiyini qeyd etdi. "Avropa Komissiyası əməkdaşımız olan bütün ölkələrə, o cümlədən də Azərbaycana təhsil sahəsində qarşısına çıxan problemlərinin həlli üçün lazım olan dəstək verəcək".

TEMPUS  proqramı üzrə məsul şəxs, Təhsil və Mədəniyyət üzrə Baş direktorluğunun rəsmisi xanım Helen Skikos TEMPUS proqramı çərçivəsində həyata keçirilmiş layihələrə nəzər salaraq bildirdi ki, istənilən düzgün əsaslandırılmış layihə Avropa Komissiyası tərəfindən maliyyələşə bilər. "Layihələrin təklifində keyfiyyətin təmin olunması çox vacib məsələdir".

Böyük ədibin yubileyi qeyd edildi

Naxçıvan özəl Universitetində görkəmli yazıçı Cəlil Məmmədquluzadənin 140 illik yubileyi ilə bağlı tədbir keçirildi. Tədbiri giriş sözü ilə universitetin rektoru, professor İsmayıl Əliyev açaraq qeyd etdi ki, Azərbaycan Prezidenti İlham Əliyevin "Cəlil Məmmədquluzadənin 140 illik yubileyi haqqında" 6 fevral 2009-cu il  tarixli sərəncamının icrası ilə əlaqədar Naxçıvan özəl Universitetində də böyük ədibin həyat və yaradıcılığının təbliği istiqamətində müxtəlif tədbirlər keçirilir. O, böyük ədib C.Məmmədquluzadənin həyat və yaradıcılığı barədə məlumat verdi.

Sonra ədəbiyyat kafedrasının baş müəllimi Rafiq Babayev çıxış edərək qeyd etdi ki, C.Məmmədquluzadə Azərbaycan ədəbiyyatı tarixinə böyük demokrat ədib, milli yazıçı, publisist, "Molla Nəsrəddin" ədəbi məktəbinin yaradıcısı və kiçik hekayənin böyük ustadı kimi daxil olmuşdur. "çay dəstgahı" pyesi ilə ədəbiyyatımıza mənzum alleqorik pyes janrını gətirmişdir. Onun bədii nəsri ədəbiyyatımızda yeni hadisə idi. C.Məmmədquluzadənin "Poçt qutusu", "Usta Zeynal" kimi nəsr əsərləri, "ölülər", "Danabaş kəndinin məktəbi" kimi dram əsərləri Azərbaycan dramaturgiyasının inkişafında yeni mərhələ təşkil edir.

Sonda tələbələr "Poçt qutusu" əsərindən səhnəciklər göstərdilər.

Mina QASIMOVA,

Naxçıvan özəl Universiteti

mətbuat xidmətinin rəhbəri

 Qaxda yeni məktəb binaları inşa olunur

 Son illərdə dövlət vəsaiti hesabına Qax rayonunun Qaşqaçay kəndində 360 şagird yerlik, Şıxlar kəndində 80 şagird yerlik, Heydər Əliyev Fondu hesabına şəhər 1 nömrəli orta məktəbi üçün 240 şagird yerlik, Turaclı kəndində 240 şagird yerlik, Yaponiya hökumətinin qrantı hesabına Güllük və İbaxlı kəndlərinin hər birində 240 şagird yerlik, Qazmalar və Amanlı kəndlərində yerli vəsait hesabına 60 şagird yerlik məktəb binaları inşa edilmişdir. Dövlət vəsaiti hesabına Qaxbaş kənd 2 nömrəli, Zərnə kənd orta məktəblərinin hər biri üçün 80 şagird yerlik, Qaxbaş kənd 1 nömrəli orta məktəb üçün yerli vəsait hesabına 80 yerlik əlavə sinif otaqları tikilib istifadəyə verilmişdir. 2008-ci ildə dövlət proqramına uyğun olaraq şəhər 2 nömrəli orta məktəbin binası əsaslı təmir edilmiş, şəhər 4 və 5 nömrəli orta məktəb binalarında istilik sistemləri yenidən qurulmuşdur.

Baydarlı kəndində 360 yerlik, Almalı kəndində 480 şagird yerlik orta məktəb binalarının inşasına başlanılmışdır. Baydarlı kənd orta məktəb binasında artıq son tamamlama işləri aparılır. Almalı kəndində isə tikinti işləri bu ilin may ayında başa çatacaqdır.

M.NOVRUZOV

 "Gəlin, planetimizi qoruyaq!"

Bakıdakı 8 nömrəli orta məktəbdə "Gəlin, planetimizi qoruyaq!" ekoloji tərbiyə mövzusunda tədbir keçirildi. Məktəbin təlim-tərbiyə işləri üzrə direktor müavini Sevinc Əliyeva günümüzün aktual mövzusu olan ekoloji problemlərin həllində ekoloji tərbiyənin elə orta məktəbdən aşılanmasının vacibliyini qeyd etdi.

Şagirdlərin ifasında "Meşə sakinlərinin həyəcan təbili", "çəmənlik çiçəklərinin hekayələri", "Dərman  bitkiləri haqda  bədiyələr"  və başqa səhnəciklər göstərildi.

"Gəlin, planetimizi qoruyaq!" ekoloji tərbiyə mövzusunda göstərilən səhnəciklərdə əsas məqsəd insanların təbiətə sevgisini artırmaq, onları təbiətə qarşı etdikləri haqsızlıqlardan çəkindirməkdir.

Səhnəciklərdə məktəblilər hamıya tanış olan nağıl qəhrəmanlarımızın simasında müasir dövrümüzdə təbiətə vurulan zərbələrdən, heyvanat və bitki aləminin "harayından" söhbət açdılar.

Sonda məktəbin direktoru Aytən Baxşıyeva bu maraqlı tədbiri hazırlayan müəllim və şagirdlərə təşəkkürünü bildirdi.

Şakir CƏFƏROV