Təhsil Nazirliyində görüş

Martın 7-də təhsil naziri Misir Mərdanov Avropa İttifaqının Təhsil və Mədəniyyət üzrə Baş Direktorluğunun TEMPUS üzrə nümayəndəsi xanım Helen Skikos və Azərbaycanda Milli TEMPUS  ofisinin rəhbəri Pərviz Bağırovla görüşüb.

Qonaqları səmimi salamlayan Misir Mərdanov son illər ölkəmizdə ali təhsilin inkişafı sahəsində görülən tədbirlərdən, bu istiqamətdə atılan addımlardan danışıb. Nazir Avropa İttifaqının  TEMPUS, Erazmus-Mundus proqramları çərçivəsində aparılan işlərdən söz açıb, ölkəmizdə bu proqramlar üzrə layihələrin sayının artırılması məsələsinə toxunub. Eyni zamanda nazir mövcud istiqamətdə dəstək göstərməyə hazır olduğunu bildirib.

Xanım Helen Skikos təmsil olunduğu qurumun fəaliyyəti, o cümlədən müvafiq proqramlar üzrə həyata keçirilən layihələrlə bağlı məlumat verib. Qonaq Avropa İttifaqının mövcud proqramları çərçivəsində Azərbaycanın ehtiyaclarına uyğun təhsil layihələrinin həyata keçirilməsini önə çəkib. Eyni zamanda qonaq "2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı" çərçivəsində görülən işlərdən məlumatı olduğunu qeyd edib.

Qarşılıqlı anlaşma şəraitində keçən görüşdə  gələcək əməkdaşlıq, Təhsil Nazirliyinin TEMPUS proqramının layihələrində birbaşa iştirakı,  müvafiq işçi qrupun səmərəli fəaliyyət göstərməsi, Avropa İttifaqı ekspertlərinin iştirakı ilə "dəyirmi masa" keçirilməsi və digər məsələlər  müzakirə olunub.