Prezident İlham Əliyevin beşillik fəaliyyətinə həsr olunmuş ikicildlik kitabın təqdimat mərasimi olub

Azərbaycan Respublikasının Prezidenti yanında Dövlət İdarəçilik Akademiyasında (DİA) "Dövlət idarəçiliyində varislik, novatorluq və dinamizm. İlham Əliyevin prezidentlik fəaliyyətinin xronikası: Rəsmi qəbul və səfərlərinin icmalı (2003- 2008)" adlı ikicildlik kitabın təqdimat mərasimi keçirilmişdir.

Elmi redaktoru, akademik Ramiz Mehdiyev olan kitabda İlham Əliyevin prezidentlik fəaliyyətinin beşillik dövrünün xronikası: rəsmi qəbul və səfərlərinin icmalı, habelə müxtəlif beynəlxalq qurumların nümayəndələri ilə görüşləri, məruzə, nitq, çıxış və müsahibələri əksini tapmışdır.

Mərasimdə DİA-nın rektoru, əməkdar elm xadimi, professor Seyfəddin Qəndilov ümummilli lider Heydər Əliyevin inkişaf strategiyasının layiqli davamçısı Prezident İlham Əliyevin siyasi xəttinin varislik, novatorluq və dinamizm prinsiplərinə əsaslandığını vurğulamışdır. Rektor dövlətimizin başçısının siyasi xəttinin cəmiyyətin mütləq əksəriyyəti tərəfindən dəstəkləndiyini və 2008-ci il oktyabrın 15-də ölkəmizdə keçirilmiş prezident seçkilərində bu həqiqətin bir daha təsdiqləndiyini söyləmişdir.

S.Qəndilov yeni nəşrin dövlətimizin başçısının idarəçilik fəaliyyətinin səmərəli nəticələrini öyrənmək baxımından məmurlarımız, eləcə də DİA-da hazırlanan ehtiyat kadrlar, təhsil alan müdavimlər, həmçinin geniş oxucu kütləsi üçün faydalı olduğunu bildirmişdir.

Təhsil Nazirliyi tərəfindən dərs vəsaiti kimi tövsiyə olunmuş kitabın rəyçisi professor Əli Həsənov, tərtibçiləri professor Seyfəddin Qəndilov, dosentlər Elçin Əhmədov və Elman Nəsirovdur.

AzərTAc