Muğam festivalı ilk dəfə Bakıda keçiriləcək

Son illərdə Şərq xalqlarının ənənəvi musiqisinin özünəməxsus janrlarının, o cümlədən Azərbaycan muğamının qorunması və inkişafı ümumdünya miqyasında diqqət mərkəzindədir. YUNESKO-nun bəşəriyyətin şifahi və qeyri-maddi irsinə dair şah əsərlərindən ibarət dünya siyahısına Azərbaycan muğamının daxil edilməsi bədii dəyərə malik olduğunu sübut edir.

Heydər Əliyev Fondu, Mədəniyyət və Turizm Nazirliyi və Azərbaycan Bəstəkarlar İttifaqının təşkilatçılığı ilə Bakıda keçiriləcək "Muğam aləmi" Beynəlxalq musiqi festivalı - 2009"-a Azərbaycan Mədəniyyətinin Dostları Fondu və Təhsil Nazirliyi dəstək verir. Bakıda həmçinin festivalda iştirak hüququ verən 1-ci Respublika muğam müsabiqəsi keçirilib. Bu məqsədlə martın 7-də Təhsil Nazirliyində təşkil olunmuş mətbuat konfransında təhsil naziri Misir Mərdanov bildirdi ki, ölkəmizdə son dövrlərdə muğama, xalq sənətinə, milli adət-ənənələrə böyük diqqət yetirilir. Bu, əsasən YUNESKO və İSESKO-nun xoşməramlı səfiri, millət vəkili Mehriban xanım Əliyevanın adı ilə bağlıdır. Heydər Əliyev Fondunun bütün sahələrdə gördüyü işlərin sorağı təkcə ölkəmizdə deyil, dünyanın müxtəlif ölkələrindən gəlir. Heydər Əliyev Fondunun dəstəyi ilə keçirilən 1-ci Respublika muğam müsabiqəsinə 20-35 yaşlı ifaçılardan ibarət 104 nəfər müraciət edib.

1-ci turda iştirak edən 27 nəfər ifaçıdan 10-u 2-ci tura qatılıb. 2-ci turun 3 nəfər qalibi isə Beynəlxalq musiqi festivalında iştirak etmək hüququ qazanmışdır. Qaliblərə müvafiq olaraq 5000, 4000 və 3000 manat məbləğində pul mükafatı verilmişdir.

Sonra Milli Konservatoriyanın rektoru Səyavuş Kərimi keçiriləcək festivalın təşkili və şərtləri barədə geniş məlumat verdi. 18-25 mart tarixlərində keçiriləcək festivalda dünyanın 40-dək ölkəsindən ifaçı, tədqiqatçı, sənət adamları və musiqiçilər iştirak edəcəklər. Beynəlxalq münsiflər heyətində 3 azərbaycanlı təmsil olunacaq. Konsertlər isə müxtəlif mədəniyyət mərkəzlərində muğamsevərlərə təqdim ediləcək. Dünyada ilk dəfə təşkil olunan bu festival hər 2 ildən bir ayrı-ayrı ölkələrdə keçiriləcəkdir.

Beynəlxalq musiqi festivalının 4 qalibi yüksək məbləğdə pul mükafatına laiyq görüləcəkdir.

Sonda jurnalistləri maraqlandıran suallara cavablar verildi.

Fazil İDRİSOĞLU